Read Nyishi 1 LVPW ATWG 7 Bible Online

1 LVPW ATWG 7 - Nyishi bible

1 LVPW ATWG 7

¹Solomon mwwg atwg doogw nammam vnyw camleq nywum go mvnum, hoo mwwg nam nvmpwngam mwv muiyumnum.

²‍Mwv Lebanonwg nyoro hoqgv nammam mvn nanum. Hoqg aasongv lwwg kiubitnum hoo hoqg taqtv camng kiubit hoo hoqg aongv cammumnum, hoo hoqham sidar tvrgw lvgab tvmpy go diical hoo sidar xaapo daag-daagwb tvrgwho joolwqnum.

³‍Hoo hoqham sidar lvgab pwqlw tulug tam-tamho camleq daang go diilwql, campy leq daang go tvrgwngam diilwqnum.

⁴‍Cwqc taqc-loosaqb pupum mam tommum gob mvcanum, hoo taqc-loosaq pupum mam tommum gogaqb mvcanum.

⁵‍Mwlw viyap pam la pupum toggoq goqt-goqnyongam homyin lvkin dvb mvnum, hoo cwqc taqc-loosaqb pupum tommum go mvcanum.

⁶‍Hoo mwv nam hoqg tvrgw tulungam mvknum; hoqg aasongv camng kiubitnum, hoo hoqg taqtv cammum kiubitnum. Hoqg otuqho tvrgw tulu lvgab baagam mvnum, hoo hoq tulu ham tomlupnum.

⁷‍Hoo mwv pw-hwwdy ko Pwqlw Cwwrwngam mwv mvnum, hoqho mwv pw-hwwl pvvb mvdwb nyinum. Hoqham sidar lvgab doopy hoqgv xaapo namgub mvnya kunum.

⁸‍Mwv hogloq ho mwwg atwg doody koam mwv pwqlw haagag langk ho mvnum, hoqhv bon nyikumko hvb nyinum. Solomon hoqhvb nyita bo pwqlw nam namg mwwg nyem naanam Parog nyem ko gab mwjnum.

⁹‍Soq tulu sam xinam wlw hoqgv mvnum, xika-xikal taqnam hoqgv, taqg-taqsab mvlapnam, hoqgv, nam gwwlam mvnum, hoo aga hoqgv koibo cwwrw namgub mwlwqnum.

¹⁰‍Gwwlam vcjaqb xinam wlw tulungam, wlw pwt bo tulungam, hoo wlw tuugin aasongv piin gola camg kiubitnum.

¹¹‍Hoo hoq aoho vcjaqb xinam wlw tulungam, xika-xikal taqnam wlwngam la sidar svvdangam mwlwqnum.

¹²‍Koibo cwwrwngam wlwngv tommum go pvvywql paacanum hoo sidar svvtaqkv tamg paacanum; At Swg dvrwq namlo uraho mvnam hvbjaq hoq koibo cwwrw ham mvnum.

¹³‍Hoo Lvpw at Solomon pui kanam tvl hoo Taiyar hoqgv Hiramnvn haamnum.

¹⁴‍Mwv Naptali nyob hoqg xwwmy ko tuupv, hoo mwwg abv tama bonam nyinbov, Taiyar hoqg nyiingv. Hoo mwv naleqgo mwwlaqkv, cenglaqkv, hoo hoolu luuxig tama bonam nyilaq dvb pwbwnum. Mwv Lvpw at Solomonwg dookub haanum hoo mwwg nyis mwlwngam nyinum.

¹⁵‍Mwv tama tvrgw dvvnyi go joolwqnum. Tvrgw daakinv camleq piin kiubit go aonum hoo camleq vnyi kiubit go pootnum. Hoqhv raaroqnum, hoo hoqg jwwkamv lvqcw hvqpy gob nyinum. Dvvnyi deen hvvkam aiyinum.

¹⁶‍Mwv tvrgw dvvnyig niqtuq tulu jaqho vlwq dvb tama dumtup purlwqnam vnyi go mvnum. Hoq dumtup purlwq tanam daagwn hv ang kiubit go aonum, hoo asaq dumtup purlwq tanam daagwn hvvkam ang kiubitnum.

¹⁷‍Tvrgw tulug niqtuq jaqho dumtup purlwq tanam tulu ham gai kvrlwq pan hvb hamko-hampeql hvmlwqnam mam dumtup purlwq tanam akwn hookam hoo asaq dumtup purlwq tanam hookam ojam pilwqnum.

¹⁸‍Hoqhvb kalam dumtup purlwq tanam akwn ho mwv annar aaxiam hib biinyi go mwiyw-mvc tvl tvrgw niqtuqho vlwqnum, hoo mwv dumtup purlwq tanam akwn haam kam aiyin dvb oj mvnum.

¹⁹‍Tvrgw tulug niqtuq jaqho dumtup purlwqnam tuluhv lili opu tulu hvb nyinum, hoqhv vpy kiubit go aonum.

²⁰‍Tvrgw dvvnyi niqtuqho dumtup purlwqnam tuluhv doonum hoo aoho gaiyam soryiq dvb mwlwqnum. Hoqho annar aaxiam mwiyw-mvcnam mam lwwnyi gob mwlwq tvl tvmnyi gob soryiqnum, hoo asaq dumtup purlwqnam ak hamkam hvb mvnum.

²¹‍Mwv hoq tama tvrgw dvvnyi ham dvrwq namlog haaga daiya ho diipnum. Nyooko daiyag tvrgw ham mwv Jakin hvl eminum, hoo nyoodum daiyag tvrgw ham Boaj hvl eminum.

²²‍Hoo tvrgw tulug niqtuqho vlwqnam hv lili opu hvb nyinum. Soq sib nyil tvrgw tulug bonam nyinya kunum.

²³‍Ho mwv iss hingkum nannam tama hoqgv mvnum. Hoqham camg kiubit ura dvb, ang kiubit aodvb ho cammum kiubit poot tvl obu dvb mvnum.

²⁴‍Hoqg gambv obunum, hoggab iss hingkum koob mvnam hv camg kiubit rootonum. Gambam tvmnyi gob yirnum, ham iss hingkum ko mwlw ham soryiqnum.

²⁵‍Hoqham hvvb camleq dornyig tama lvgab mwiyw-mvc tvl apko aoho joopnum, oum gon nyoodum daiyab tuunum, oum gon dou-haaga daiyab tuunum, oum gon nyooko daiyab tuunum, hoo oum gon dou-caga daiyab tuunum. Iss hingkum koam hoq aoho pvvnum, hoo hoq tulug loqjum mam urab juurwq minsnum.

²⁶‍Hoqhv lvqcw cwrum gob jwwkamnum, hoo hoqg gambv pvtaq gamb hvb la lili opu hvb nyinum. Hoq iss hingkum ko hv lwwyw vnyi bat gob nyinum.

²⁷‍Mwv tama hoqgv dvqgwnan dvviyw go mvnum. Dvvx cwr hv vpy kiubit go aasonum, taqtv vpy kiubitnum hoo aongv oum kiubitnum.

²⁸‍Soq sib dvqgw tulungam mvnum: hoqho twgwnan svvtaqkv doonum, hoo twgwnan svvtaq tulungam twlwqko ho apnum,

²⁹‍hoo twgwnam svvtaq tuluho sony nyot tulungam, hvvbam, hoo cerubim mam mwiyw-mvcnam mam mwlwq tvl twgwko ho tvpnum. Twgwl twlwqko ura aob sony nyot tulungam la hvvbam mwlwqnum, hoqham guusiq-guumeq dvb mvtwl apnum.

³⁰‍Hoq aoho dvqgwnan dvvx cwrho tama kookwr kwrpy gola tama dvvp dvvpy go mwlwqnum, hoo hoqhv pukaqg cwwrw rwwpiam torl daqgnum. Tvrgw tulu ham guusiq-guumeqnam lvgab oj pilwqnum.

³¹‍Pukaq aoho ywr dumtup kookwr mwlwqnam ak doonam hv kiubit aknum. Hoq pukaq ak hv kookwrnun, lamta ngam mvnam hvb mvnum, kiubit akla papo gob uranum. Hoqg gambv obunum, hoo hoqg twgwnan svvtaqkv cuurw vpynum.

³²‍Hoo kookwr kwrpy hv twgwnan niikum ho doonum. Tama dvvpv daag-daagwb dvqgwnan dvvx cwrho doonum, hoo kookwr hv kiubit akla papo go aonum.

³³‍Kookwr tuluhv ceriot kookwr hvb nyinum; hoqg tama dvvp tuluhv, hoqg gamb tuluhv, hoqg swwxo tuluhv, hoo hoqg dvvp tulu mwlw hv tama hoqgv mvnum.

³⁴‍Dvqgwnan dvvx cwrwg cwwrw rwwpy ho torgwngv dvvpy gogaqb mwlwqnum. Torgwngam daag-daagwb dvqgwnan ho mwlwqnum.

³⁵‍Hoo dvqgwnan dvvx cwrwg niqtuq aoho kiubit ak twrku tvl haqgab nannam aodvb mwlwqnum; hoo hoq tulu ham dvqgwnan aoho apnum hoo hoqg twgwnan svvtaqkv akin go hoq lvgab doonum.

³⁶‍Hoo hoqg torgw ao hoola hoqg dvqgwnan aoho mwv cerubim mam, sony nyot tulungam, hoo pvng svvn tulungam pagoq-pagoqho mwiyw-mvcil mwsiq-mvmeql mwlwql apnum.

³⁷‍Soq sib mwv dvqgwnan dvviywngam mwlwqnum. Mwlwngam aiyin lvkin dvb mvnum, hoqg daat-daanyongv hoo poo-ngv aiyinum.

³⁸‍Hoo mwv tama pukaq kvqywngam mvnum. Pukaq kvqxv campy bat go rootonum, pukaq kvqxam xinamv vpy kiubitnum, ho pukaq kaqg-kaqgwb dvqgw dvvyw ho doonum.

³⁹‍Hoo dvqgwnan daang gon namwg nyooko daiya ho mwv mvnum, hoo daang gon namwg dou-cagag nyooko daiyag cuurw ho mwv mvnum.

⁴⁰‍Hiram pwcw tulungam, tuqn nan tulungam, hoo pukaq tulungam kam mvnum. Hoqgab Hiram Lvpw at Solomon gab At Swg namho bon tulungam mwv nyinya jiknum:

⁴¹‍tvrgw dvvnyi ho, dumtup purlwqnam pukaq kvqnyiv tvrgw tulug niqtuq jaqho apnum, hoo tvrgw tulug niqtuq jaqho dumtup purlwqnam pukaq vnyiam, gaiyam soonyi go hvmsiq-hameq tvl siilupnum;

⁴²‍hoo lwwpy go annar aaxiam mwiyw-mvcnam mam hib biinyi gob mvtwl tvrgw tulug niqtuqho dumtup purlwq tanam pukaq vnyiam gaiyam hvmsiq-hameq tvl siilupnum;

⁴³‍dvqgwnan dvvyw go, hoo pukaq kvqyw go dvqgwnan ho tvpnum;

⁴⁴‍hoo iss hingkum ko ak, hoo iss hingkum koam hvvb camleq dornyi go mwiyw-mvcnam niikum ho doomnum.

⁴⁵‍Pwcw tulungam, tuqn nan tulungam, hoo pukaq tulungam, ho At Swg namho hog mwlw pwcw uddungam, Hiram Lvpw at Solomon gab kwlwq-kvlaqbo tama hoqgv pwj kunum.

⁴⁶‍Sukkot gvla Jaretanwg deekam deelag Jordon haapa ho lvpw atv hoq tulu ham joopnum.

⁴⁷‍Hoo Solomon pwcw-uddu tulug vgwngam jaaka maanum, hoggab hoqho naleqgo doonum; tama hoqgv vgwngam jaaka nan doomanum.

⁴⁸‍Ho Solomon At Swg nam hoqg pwcw-uddu mwlwngam mvknum: hun yugwngam, hun tebolam Pwnbon wtw jiigwnan dvb mvnum,

⁴⁹‍dvrwqbo hun hoqgv lemp twgwnanam daang gon nyooko daiya ho hoo daang gon nyoodum daiyag dvrwq kwrwqbo nam uraho; opu tulungam, lemp tulungam, hoo sabku tulungam hun lvgab mvnam mam pvvnum;

⁵⁰‍pvtaq tulungam, suunan tulungam, pukaq tulungam, sulum mwwnan tulungam, cvvkaq tulungam loodwr jaqnbo hun hoqgv mvnam mam; hoo Dvrwq Kwrwqbo nam ura jaqg viyap tulungam mwgwnanam, hoo dvrwq namlog lvvg hoqg viyap tulungam hun hoqgv mwlwqnum.

⁵¹‍Soq siib Lvpw at Solomon At Swg nam hoqg bonam mwlwngam nyiyum kunum. Hoo Solomon mwwg ab Debidg darxaq kunam rupam, hunam, hoo pwcw-uddu tulungam At Swg nam gumn uddum uraho hoq tulu ham vlwql ap kunum.