Read Nyishi 1 LVPW ATWG 8 Bible Online

1 LVPW ATWG 8 - Nyishi bible

1 LVPW ATWG 8

¹Ho Solomon Israelwg nyiixa tulungam hoo nyob tulug nyiilo bo tulungam, Israelwg nyiilug nombu hoqg ab tulug dvparam nyigbo tulungam Lvpw at Solomon Jerusalemho, At Swg pvvb uddum mam Debidg bopam, Jaiyon hoqgam baqlin mvdwb goqkumnum.

²‍Hoo Israel nyi mwlwngam Lvpw at Solomon vly naal durum dvmin dvk pool kvnwg, Etanim pool ho goqkumnum.

³‍Hoo Israelwg nyi mwlwngv hookumnum, hoo nyub tulungv Xumk Pirram joorabnum.

⁴‍Hoo bulv kvvrwq minsko tombu hoqgv At Swg pvvb uddum mam joorab kunum, hoo dvrwqbo dupum-dvrab mwlwngam tombu hoqgam nyub tulu ngvla lebi nyi tulungv naarabl wgnum.

⁵‍Hoo Lvpw at Solomon la Israelwg nyiilu mwlwngv mwwg agaho hookum bov mwwg lvgab Xumk Pirr agaho naleqgo sviyangam hoo hvvbam bulv xinya lama dvb pwr jinum.

⁶‍Ho nyub tulungv At Swg pvvb uddum mam dvrwq namlog nam ura jaqg, Dvrwq Kwrwqbo dookwg cerubim alap niikum ho baqanum.

⁷‍Hoggab cerubim tulug alapv Xumk Pirr dookam lobyumnum, ho cerubim tulungv Xumk Pirram la hoqg lyvxar tulungam lobyuml doognum.

⁸‍Hoo lyvxarv aaso ko-gab Dvrwq Kwrwqbo urag haaga ho lyvxar niqtuq akwn kaapanum; hvbmabde lvvg hoqgv hoq tulu ham kaapa maanum. Hoo soq aal namgub hoq tuluhv doodwn.

⁹‍Xumk Pirram Mojesg Horeb ho wlw tvqnyig xeqtwl jinam aro hv doonum, hwdlo bulv Ijipt gvda hoqgv leng yikho, hogloq ham At Sw Israelwg nyiilu lvgab pvvb mvnum.

¹⁰‍Hoo hwdlo nyub tulungv Dvrwq Kwrwqbo dook hoqgv leng yikho At Swg dvrwq namlongam haapamv juulup tvl doonum,

¹¹‍Haapamv vcjaqb juugam gab, hoqgab nyub tulungv hoqho daqtwl bon nyijiq maanum, hoggab At Swg yuunamv At Swg dvrwq namlongam juulup tvl doonum.

¹²‍Ho Solomon benum, “At Sw benum mwv doomwq kan twdwqko ho doogw dvn.

¹³‍Ngo noqgab yuunam dvrwq namlongam jvqtw jaqb mvp pakun, noqg nwrba gob doogw nyookam mvp pakun.”

¹⁴‍Ho hwdlo hookumbo Israelwg nyiilungv doqdul dooyikho, lvpw at tobkur banv hookumbo Israelwg nyiilungam paqnum.

¹⁵‍Hoo mwv benum, “Israelwg Pwnbo At Sw xinam jaqkv, hoggv mwwg agam lvgab ngoqg ab Debidnvn mwv dingrwl benam mam mwwg alaqkv niqtuq nyilin mvpa ku, hoo begamv,

¹⁶‘Ngoqg Israelwg nyiilungam ngo hwdlo aalho Ijipt hoqgv boolin yukho, Israelwg nyob mwlwg bopam uraho ngoqg dvrwq namlongam mvm dvb xuqlin maanum, hoqho ngoqg eminam doom dvb xuqmanum. Hvbmabde ngoqg Israelwg nyiilu aoho Debidnvn ngo xuqlinum.’

¹⁷‍Ngoqg ab Debidg hang ura lo Israelwg Pwnbo At Swg emin gab dvrwq namlo ak mvdwb mwwnum.

¹⁸‍Hvbmabde At Sw ngoqg ab Debidnvn benum, ‘Noqg hang ura lo ngoqg emin ho dvrwq namlongam mvdwb mwwdo, noqg hang mwwnamv aljaqdo.

¹⁹‍Hvbsujaqkam, no dvrwq namlongam mvnyiram, hvbmabde nam ko tuup bwwjnam noqg ko tuupv ngoqg emin ho dvrwq namlongam mvtayin.’

²⁰‍Hoqgv sija At Sw mwwg dingr kunam mam mwv niqtuq nyilin paku. Hoggab ngoqg ab Debidg kwlib swwrab pakun, hoo At Swg dingrnam hvb Israelwg pwqlw aoho doodwn, hoo Israelwg Pwnbo At Swg emin ho ngo dvrwq namlongam mvpa kun.

²¹‍Hoo ngulug ab tulungam At Swg pvvb birnam mam jinum, hwdlo mwv bulam Ijipt gvda hoqgv boolin yukho, hoq Xumk Pirram pvvk nyookam ngo jipa kun.”

²²‍Ho Solomon Israel nyi mwlwg hookumbo kaagaho At Swg yugw agaho daqtwl hoo mwwg alaqkam doa aob icanum,

²³‍hoo benum, “Israelwg Pwnbo At Swa, swcw nyodo so noq hvb nyinbo Pwnbo dooma dvn, pvvb birnam mam pvvdwn hoo hiyv noqg agaho bulug hvvjw lvgab mwwjwl wnbo noqg nyera tulungam noqg tumanam abiam kaakin dvn,

²⁴‍ho noqg nyera ngoqg ab Debidnvn hoggv no bibwq kunam ham pvvl ap jipa ku. Noqg agam hoqgv goonam mam noqg alaqkv soq aal so niqtuq nyilin paku.

²⁵‍Hoqgab sija, Israelwg Pwnbo At Swa, noqg nyera ngoqg ab Debidnvn hoggv no dingr kunum ham no pvvj paku, begamv, ‘Noqg ko tuup tulungv bulug nyij-mujam hengabl nyib nyiloqkam, ngoqg agaho noqg nyinam wnam hvb bulv nyib wb nyiloqkam, ngoqg agaho Israelwg pwqlw ho doody bo nyiingv nywywngam xooram.’

²⁶‍Hoqgab sija, Israelwg Pwnboa, noqg nyera ngoqg ab Debidnvn noqg gomcwr gooknam ham pwbw jaqb niqtuq lengm tukbv.

²⁷“Hvbmabde Pwnbov jvqtw jaqb swcw so doota yin yv? Kaato, doa aongv hoo ao nyookv kam nam dook doog dvb jila maadwn; ngoqg soq namlo sam mvnam si vcjaqb anyo dvn!

²⁸‍Hvbsujaqkam noqg nyerag swgwl hoo mwwg xumnam sam, ngoqg Pwnbo At Swa mwwka tvbv, soq aal so noqg nyerangv noqg agaho xabnam mam la swgwnam mam tatbv,

²⁹‍ho noqg bepko nyookub, noqg vnyiqkv ai-aalwb soq namlo daiyab tuury tuuiya tvbv, ‘Ngoqg eminv hoqho dootayin hvnum,’ ho soq namlo daiyab noqg nyerangv nam swgw baloqkam no tatayin.

³⁰‍Hoo hwdlo bulv soq nyook daiyab noqg nyera tulungv la noqg Israelwg nyiilungv swgw yikam no tatayin. Hoo noqg doogw ko ao nyookho tapa dvn, hoo hwdlo no tapayin, ngulam hwwmab apaq paqnyi jitan.

³¹“Nyi ak mwwg door-doopwngam ceekol nyic nyipel hoo soqg namlog noqg yugw agaho mwwg dingnam mam dingb nyiloqkam,

³²‍ho ao nyookv tapa dvn hoo noqg nyera tulungam pw-hwwdwn, mwwg nyixiaqkam mwwg atwg dumpo ho haam dvn, hoo mwwg nyedar nyiib nyigam gab mwam jvqtwngv ywwlin dvn.

³³“Bulv nam ceekol nyic nyigam gab, hwdlo noqg Israelwg nyiilungam ceebio tulug agaho mviya yin, hoo bulv noqg dookub tobkurl hoo noqg eminam bepa yin hoo soq namlo soqgv swgwl hoo noqg lvgab xuml koikam,

³⁴‍ho ao nyookho tapa dvn hoo noqg Israelwg nyiilug nyicam hwwmab apaq paqnyi jidwn hoo bulug ab tulungam gvda jinam ho bulam lokta boa dvn.

³⁵“Hwdlo doangam mutum yin hoo nyodo homa dvn hoggab bulv nam ceekol nyic nyipa ku, ho bulv soq nyook daiyab pwrarl swgw baloqkam hoo noqg eminam bepal hoo bulug nyic hoqgv wkur baloqkam, hwdlo bulam no hentwr hem yin,

³⁶‍hoo ao nyookv tapa dvn hoo noqg Israelwg nyiilu, noqg nyera tulug nyicam hwwmab apaq paqnyi jidwn, hwdlo no bulam albo lamtangam bulam wwm dvb tomswr dvn, hoo hogloq ham noqg nyiilungam otu gob jiknam, noqg gvda aoho nyodongam hom dvn.

³⁷“Gvda ho dwr-kano wikam, iicw-tobum dooiyv nyiyikam, ho vly-aaxeqkv yaaikam, ho takam-yorup pv wikam, ho liilungv piiyikam, bulug ceebiongv bulam bulug gvda toggoq tulu namgub naareq yin, hoolu luuxy swlin-momin nyiyikam, ho hoqho hoolu luuxy vc-apiv ciyikam,

³⁸‍noqg Israelwg nyiilu ngvla nyiicwr-cwrxiv, at atwg hentwr-kaasam mwwg atwg hang ho mwwgab tvl hoo mwwg alaqkam soq namlo daiyab ijin tvl, hoggv xeq swgw dvn, hoggv xeq kodwn,

³⁹‍ho noqg doogw ko ao nyookv tapa dvn hoo hwwmab paqnyi dvn hoo hiyvg hangam no cendwn, mwwg nyicw-wcwb jaqb nyiicwr-cwrxiam nyij to (hoggab no, no aro twq nyia ko mwlwg hangam cengdwn),

⁴⁰‍ho ngulug ab tulungam noqg gvda jinam ho bulv doody deedib bulam nam bos mvm to.

⁴¹“Hoq hvbkalam, hwdlo nyoodo nyi akv, hiyv Israelwg nyiilu maanbov, noqg emin gab aado gvda hoqgv haalayil

⁴²(hoggab bulv noqg yuunam eminam hoo noqg atorbo alaqkam, hoo noqg laqpo laqtornam mam tapa tayin), hwdlo mwv haalayil hoo soq namlo daiyab swgw yin,

⁴³‍noqg doogw ko ao nyookho tapa dvn hoo nyoodo nyi ak hv nam kok jaqb nyij dvn, ho noqg Israelwg nyiilungv nyinam hvb, noqg eminam swcw soqg nyiilu mwlwngv cengtayin hoo nam bos tayin, hoo soq namlo sam ngoqg mvnam si noqg eminam goqknamv hvl bulv cengtayin.

⁴⁴“Noqg nyiilungv bulug ceebiongam ceekol nyob patab lengyikam, no bulam hogloq lamta bvxeq kanam jaqkam, hoo bulv noqg xuqlin ko bopam daiya bvla noqg emin gab ngoqg namlo mvpko daiyab At Swn swgw baloqkam,

⁴⁵‍ho ao nyookho bulug swgwnam mam la bulug konam mam tapa dvn hoo bulug pagoq gab svka dvn.

⁴⁶“Bulv nam ceekol nyic nyiba loqkam—hoggab nyic nyima bo nyi akkam dooma—hoo no bulam hang lengnum hoo bulam ceebio alaqb jinum, ho bulam ogum bvla aadob ceebio tulug gvdab nyumwb booknum,

⁴⁷‍hvbsujaqkam bulam nyumwb book gvda hoqgv bulug hangv mwwdil hoo mwwkurl hoo bulam nyumwb boop ko gvda hoqgv nam xuml begamv, ‘Ngulv nyic nyipa ku hoo nyic-nyia looda nyixiaq tukba hvl beikam,’

⁴⁸‍bulug mwwnam lvgab hoo bulug hang lvgab bulam nyumwb boop ko ceebio tulug gvda hoqgv bulv mwwkurl, bulug ab tulungam noqg xuqlin layil bopam jinam ho, hoo noqg emin gab ngoqg namlo mvnam bulug gvda daiyab swgw baloqkam,

⁴⁹‍ho noqg doogw ko ao nyook hoqgv bulug swgwnam mam la bulug konam mam tapa dvn, hoo bulug pagoq gab svka dvn

⁵⁰‍hoo nam ceekol nyic nyinbo noqg nyiilungam, hoo bulug nam ceekol nyic nyiknam mwlwngam, no hwwmab apaq paqnyi jidwn, hoo bulam nyumwb boon boam bulug aoho anya kaapa mvto, ho bulv bulam anya kaapa tayin

⁵¹(hoggab bulv noqg nyiilungv, hoo noqg gumnv, hogloq ham no yoqdwr xvwr jwr-jwrko pengko hoqgv Ijipt gvda hoqgv boolinum).

⁵²‍Noqg nyera ngvla noqg Israelwg nyiilug konam sam noqg vnyiqkv tuugab yaatwb, ho hogloq gvjaqkam bulv nam goqyi nyiloqkam bulam no tvmw maabv.

⁵³‍Hoggab Pwnbo At Swa, hwdlo no ngulug ab tulungam Ijipt hoqgv boolin yukho, noqg nyera Mojes lvgab no bibwq kunv bulam swcw soqg nyiilu pengko hoqgv noqg gumn gob no xuqxubl xuqlinum.”

⁵⁴‍Solomon soq sib At Swn swgwnam mam la konam akiam nyinya peekul, hogloq ho mwv lwbw kumbw tvl ao nyookub alaq yamjinl xuml dook hoqgv mwv At Swg yugw agaho hoqgv gorabnum.

⁵⁵‍Hoo mwv daqtwl hoo Israel nyi hookum bo mwlwngam vcjaqb goql lvqc cil hoo begamv,

⁵⁶“At Sw xinam jaqkv, hiyv mwwg Israelwg nyiilungam mwwg dingr ko jaqb doonu dvb jipa ku. Mwwg nyera Mojesnvn mwwg alboam dingr kunam gomcwr gamg kam kvxaqmab niqtuq lengm paku.

⁵⁷‍Ngulug ab tulu lvgab mwv doobanam hvb ngulug Pwnbo At Sw ngulug lvgab dooba dvn,

⁵⁸‍ho ngulug ab tulungam mwwg gaml jinam ham, mwwg nyij-mujam nyil swwm dvb hoo mwwg gaml tulungam, mwwg mwwj-hingjam, hoo mwwg pvvb tulungam, ngulug hangam tvjwl swwm dvb mwv mvdwn.

⁵⁹‍At Swg agaho ngoqg soq gomcwr tulu sam, ngulug Pwnbo At Swg ogum ho aal-aiyib doomto, hoo aal looxiam daagabnam mam mwwg nyerangam la mwwg Israelwg nyiilug pagoqkam mwv svka dvn,

⁶⁰‍hoo swcw soqg nyiilu mwlwngv cengtayin At Sw Pwnbov; mwwg lvvg ho asaq pwnbo dooma dvn.

⁶¹‍Hoqgab soq aal so hoggub nyidwn hvb nulug hangam jvqtw jaqb ngulug Pwnbo At Swg, mwwg nyij-mujam nyigdvl hoo mwwg gaml tulungam pvvt ju.”

⁶²‍Ho lvpw atv la mwwg lvgab dooba bo tulungv At Swg agaho pwr jinum.

⁶³‍Solomon At Swn swrso aky gab hvvbam 22,000 go hoo sviyangam 120,000 go aky jinum. Ho lvpw atv la Israelwg nyiilu mwlwngv At Swg dvrwq namlongam darxaqnum.

⁶⁴‍Hoq aal lookin ho lvpw atv At Swg dvrwq namlog lvpa ra dookum ko baagam garxaqnum, hoggab mwv boyuqnam akiam hoo dvs-twws akiam hoo swrso gab ox akiam hoqho jinum, hoggab At Swg agaho tama yugw hv boyuqnam akiam la dvs-twws akiam hoo swrso gab ox akiam jikgab anyonum.

⁶⁵‍Lebo-hamat hoqgv Ijipt gv kucw namgub ngulug Pwnbo At Swg agaho, aal kvn go, Solomon la mwwg lvgab mvqlw jaqb hookum layil dooba bo Israel mwlwngv hoq moodho durum dvnum.

⁶⁶‍Aal piin deen ho mwv nyiilungam kanam tvl wwm kunum, hoo bulv lvpw atam paqnum hoo bulug nammwb hwnyir-hvmarl wknum hoo mwwg nyera Debid nvla mwwg Israelwg nyiilungam At Swg alboam kaakinam mam bulug hangv vcjaqb hemp-hvnyirnum.