Read Nyishi 1 LVPW ATWG 9 Bible Online

1 LVPW ATWG 9 - Nyishi bible

1 LVPW ATWG 9

¹Hwdlo Solomon At Swg dvrwq namlongam la lvpw atwg dook nammam mwwg mwwby ko jaqb mvnya yukho,

²‍Gibeon ho mwam kvvrwqnam hvb, At Sw Solomonnvn lwnyi dvb kvvrwqnum.

³‍Hoo At Sw mwam benum, “Ngoqg agaho noqg swgwnam mam la noqg konam mam ngo tapa paku. Ngoqg eminam nwrba gob doom dvb noqg nam mvnam sam ngo darxaq pakun. Ngoqg vnyiq kvla hangv hoqho lwxiam dootayin.

⁴‍Hoo no, noqg ab Debidg nyinam hvb no ngoqg agaho wb nyiloqkam, ho lootw bvla jvqtw hangv, ngoqg nam gaml jinam jaqb nyib nyiloqkam, hoo ngoqg nyij-mujam la ngoqg pvvb tulungam pvvbnyiloqkam,

⁵‍hoggub ngo noqg ab Debidnvn dingrwl begamv, Israelwg pwqlw aoho noqg hoqgv doody bo nyiv nywywngam doomab nyiram, ho noqg xinam pwqlwngam ngo nwrba xaqb Israel aoho mvko jitayin.’

⁶‍Hvbmabde no la noqg ko tulungv ngam wmin gvma baloqkam, hoo ngoqg gaml tulungam hoo ngoqg nyij-mujam nam jinam mam pvvmab asaqb wl hoo asaq pwnboam bon nyijil hoo bulam xumb nyiloqkam,

⁷‍ho ngo Israelam gvda jinam hoqgv bulam mvpaq tayin, hoo ngoqg kaaga soqgv ngoqg emin gab ngoqg soq darxaqnam namlo sam apaq tayin, hoo Israelv nyiilu mwlwg pengko ho dootin tingnam gob la gomcu pui gob nyitayin.

⁸‍Hoo soq nam si yuupaqbo hwwpum gob nyitayin. Hoqb wpeq bo nyiicwr-cwrxiv ham lomtayin hoo bulv tacor curpaql betayin, ‘Hoggub yu soq gvda sam la soq nam sam soq siib At Sw mvpa kun?’

⁹‍Ho bulv betayin, ‘Hiyv bulug ab tulungam Ijipt gvda hoqgv boolin boam bulug Pwnbo At Swn bulv apaq ko-gab hoo asaq pwnboam swgwl hoo hoq tulu ham xuml hoo hoq tulu ham bon nyij ko gab. Hoqgab soqg ciqcaq-bviyaq sam bulug aoho At Sw haamnum.’”

¹⁰‍At Swg dvrwq namlongam la lvpw atwg nammam, Solomon soq nam nvmnyi sam vnyw camnyi gob mvnum,

¹¹‍hoo Taiyarg lvpw at Hiram Solomonnvn sidar hoo saipres svvtaqkam la hunam mwwg mwwbynam mam jil dooiyanum, ho Lvpw at Solomon Galili gvdaho Hiramnvn bopam camnyi go jinum.

¹²‍Hvbmabde hwdlo Hiram Taiyar hoqgv Solomon mwam bopam jinam tulu ham mwv kaatab haai yikho, ho hoq tulu ham mwv kvvlwq maanum.

¹³‍Hoqgab mwv benum, “Ngoqg vbw-bor, noqg ngam jinam bopam tulu si hoggv yu?” Hoqgab soq aal namgub bulv ham Kabul hvl emin dvn.

¹⁴‍Hiram lvpw atam hunv 120 telent go jilwqnum.

¹⁵‍Hoo soq sib nyil Lvpw at Solomon At Swg dvrwq namlongam hoo mwwg atwg doogw nammam hoo Millongam hoo Jerusalemwg gurum mam hoo Hajor la Megiddo hoo Gejer nyi tulungam nwwteq tvl bon nyimnum

¹⁶(Ijipt gv lvpw at Paro Gejer caanv hoo ham naareqnum hoo ham wm tolwqnum hoo bopam ho doonbo Kanaan nyi tulungam mengnum, hoo hoq ham mwwg nyem ko Solomonwg nywxwngam gujgob jinum;

¹⁷‍ho Solomon Gejerngam mvdarnum) hoo ako daiyag Bet-horon namgub mvnum

¹⁸‍hoo Baalat la Tamar Juda gvdag deexa-rara uraho doonum,

¹⁹‍hoo Solomon dis silko noosu bopam mam, hoo mwwg ceriot bopam mam, hoo mwwg svpur xarnbo tulug doogw bopam mam, hoo Jerusalem, Lebanon, hoo mwwg pvvb bwwl doog ko gvda mwlw ho Solomon bopam tulungam mvnum.

²⁰‍Amor nyi tulu, Hittait nyi tulu, Perijj nyi tulu, Hibitait nyi tulu, hoo Jebus nyi tulu hoqgv nyiilu mwlwngam apaq kunam Israelwg nyiilu maan nyi tulungam-

²¹‍bulug hotam mam gvdaho apaq peel wleqnam mam, ho hiyam Israelwg nyiilungv twryum maanum mam—hoq nyi tulu ham Solomon nyera-paqn hvb bon nyim dvb gaml jiknum, hoo soq aal xaqb bulv hvb nyil doodwn.

²²‍Hvbmabde Solomon Israelwg nyiilungam nyera raasur gob mvmanum. Bulv sipai gob nyinum, bulv mwwg saab gob, mwwg sipai saab gob, mwwg kepten gob, mwwg ceriot sipai saab gob hoo mwwg svpur xargbo nyi tulu gob mvnum.

²³‍Soq tulu si Solomonwg peelo saab gob nyil bon kvvyw-tadanum: Nyiilungam bonam nyim dvb la nyig dvb saabv 550 go nyinum.

²⁴‍Hvbmabde Parog nyem kov Debidg bopam hoqgv Solomon mwn gab nam mvp jik mwnwg at nammwb caanum. Ho mwv Millo ho nammam mvpnum.

²⁵‍Solomon vnywngam luum go At Sw gab mwwg yugw mvpnam ho boyuqnam akiam la swrso akiam At Swg agaho jinum. Ho mwv dvrwq namlongam mvnya kunum.

²⁶‍Lvpw at Solomon Swlw-Sag sugurg Elot ogumg Ejion-geber ho iss jaaj ak mvl apnum.

²⁷‍Hoo Hiram mwwg nyera tulungam hiyv sa-svlongam pwbwb cengn boam Solomonwg nyera tulu lvgab lvkin gob bon nyibam mvdwb kanamnum.

²⁸‍Hoo bulv Opir gvdab wnum hoo hunam 420 telent go baqanum, hoo bulv hoqham Lvpw at Solomonnvn baqa jinum.