Read Nyishi 2 LVPW ATWG 1 Bible Online

2 LVPW ATWG 1 - Nyishi bible

2 LVPW ATWG 1

¹Ahab sixo kokw so, Moabv Israelam ceekol taleqnum.

²‍Samariya ho Ahajiya mwwg odum pwqlwg baag hoqgv yoqlnum, hoo mwv vc cil doonum; ho mwv pui baqn bo tulungam kanaml hvl bulam benum, “Wn, ngo soq vc soqgv al hind yv hvl, Ekronwg pwnbo, Baal-jebubnvn taka ta.”

³‍Hvbmabde At Swg ao gumtwngv Tisbeg Ilijanvn benum, “Gorabto, wgdvl Samariyag lvpw atwg pui baqn bo tulungam wrwq gvdwl hoo bulam beta, ‘Israel ho Pwnbo dooma tvl yam nulv Ekronwg pwnbo Baal-jebub dookub wl tox taden?’

⁴‍Hoqgab sija soq sib At Sw bedo, noqg caol kartam hoqgv no ipoq nyokram, hvbmabde no hoggub nyijaqkam sitayin.’” Ho Ilija wknum.

⁵‍Pui baqn bo tulungv lvpw at dookub hookurnum, hoo mwv bulam benum, “Hoggub nulv hookur yin?”

⁶‍Hoo bulv mwam benum, “Ngulam nyi ak wrwqnum, hoo ngulam benum, ‘Nulam kanam bo lvpw at dookub wkur nuk hvl benum, hoo mwam soq sam beta hvnum, soq sib At Sw bedo, ‘Israelho Pwnbo dooma tvl yam nulv Ekronwg pwnbo Baal-jebub dookub taka mvdwb kanam nomdu dvn?’ Hoqgab noqg caol kartam hoqgv no ipoq nyokram, hvbmabde no hoggub nyijaqkam sitayin.’”

⁷‍Mwv bulam benum, “Hoggub nyinbo nyi go nulam wrwql hoo soq pagoq tulu sam betamnum?”

⁸‍Bulv mwam birwqnum, “Mwv vm-rvsab bo vj ak koode, ho mwwg hwwpo ho vpin soruqkam gvde.” Hoo mwv benum, “Hoqhv Tisbeg Ilija.”

⁹‍Ho lvpw atv Ilija dookub kepten ak la nyi camng go kanamnum. Mwv Ilijag yorn puutu aoho doodu kob caanum, hoo mwam benum, “Pwnbog nyi aka, lvpw atv bedo, ‘Akob Ito.’”

¹⁰‍Hvbmabde Ilija camng hoqg kepten akam birwqnum, “Ngo Pwnbog nyi baloqkam, ao toloqkv wmv bioqal hoo nam la noqg nyi camngam guiyum xaato.” Ho wmv ao hoqgv bioqanv kepten ham la mwwg nyi camngam guiyumnum.

¹¹‍Lvpw atv lokta camngwg kepten akam la mwwg lvgab nyi camng go kanamnum. Hoo mwv mwam birwql hoo benum, “Pwnbog nyi aka, soq si lvpw atwg gaml jinamv, ‘Akob nyebia jaqb ito!’”

¹²‍Hvbmabde Ilija bulam birwqnum, “Ngo Pwnbog nyi akv baloqkam, wm mam ao toloqkv bioqal hoo nam la noqg nyi camngam guiyum xaato.” Ho Pwnbog wmv ao hoqgv bioqanv mwam la mwwg nyi camngam guiyumnum.

¹³‍Camng hoqg oum deen kepten akam la mwwg lvgab camng go Lvpw atv lokta kanamnum. Hoo oum deen kepten ak si nyi camngam boolayil caanum hoo Ilijag agaho mwwg lwbwngv kump tvl hoo mwam modul xuml benum, “Pwnbog nyi aka, anya mwwpa gvdwl ngoqg swwgam, hoo noqg nyera tulug nyi camngwg swwgam noqg kaagaho xinam gob mvt bvka.

¹⁴‍Kaato, ao toloqkv wmv bioqanv otuq kepten vnyiam la bulug lvgab nyi camng gogab wmin gvnboam guiyumnum, hvbmabde sija noqg swwgam noqg kaagaho xinam gob nyim tvbv.”

¹⁵‍Ho At Swg ao gumtwngv Ilijanvn benum, “Mwwg lvgab imin gvn; mwam bos maabv.” Hoqgab mwv gorabnum hoo mwwg lvgab lvpw at dookub imin gvnum

¹⁶‍hoo mwam benum, “Soq sib At Sw bedo, ‘Hoggab no Ekronwg pwnbo, Baal-jebub dookub pagoqkam tox mvdwb nyi tulungam kanamnum—mwwg gomcwram taka dvb, Israelho Pwnbo dooma dvn yv? —hoqgab noqg caol kartam hoqgv no ipoq nyokram, hvbmabde no hoggub nyijaqkam sitayin.’”

¹⁷‍Hoqgab At Swg gomcwram Ilijag gook jaqb mwv sinum. Judag lvpw at Jehosapatwg ko tuup Jehoram vnyw nywnyi go Judaho lvpw at gob swwknum, Ahajiya ko tuup dooma ko-gab Jehoram mwwg kwlib lvpw at gob swwnum.

¹⁸‍Ahajiyag asaq bon nyinam mam la mwwg hog mwlwngam nyinam mam, Israelwg Lvpw at tulug Nwd Kitap lo xiqtul ap map nvi yv?