Read Nyishi 2 LVPW ATWG 10 Bible Online

2 LVPW ATWG 10 - Nyishi bible

2 LVPW ATWG 10

¹Ahab Samariya ho ko tuupv cam kvn go doonum. Ho Jehu pota tulungam xeqtwl hoo ham Samariyag bopam tulungam pvvb bwwl doogbo tulungam, nyiixa tulungam, hoo Ahabwg ko tuup tulungam doogbo tulungam jilwqnum,

²“Ho nulug nyiit atwg ko tuup tulungam, hoo nulug lvgab ceriot tulungam la svpur tulungam, hoo gurum nwqtumnam bopam tulungam, hoo nwwxo-svtam tulungam doog bov, soq pota si nulam hvvc yin ho ham kaapa kalam twqda,

³‍nulug nyiit atwg ko tuup tulug hoqgv dengky jaqn boam xuqlin to hoo mwwg abwg pwqlw ho doom to hoo nulug nyiit atwg nombu gab nyob pvjto.”

⁴‍Hvbmabde bulv vc loodab bosil hoo benum, “Kaato, lvpw at vnyiv mwwg agaho daqrwq nyomanum. Hvnyiloqkam hoggub ngulv dvqrwq nyotayin?”

⁵‍Hoqgab hiyv lvpw pwqlw uraho doon bov, hoo hiyv bopam uraho doon bo nyiixa tulu ngvla hoq tulu ham rvkil doog bo tulungv lvkin gob Jehunvn pui kanaml begamv, “Ngulv noqg nyerangv, hoo no hoggv betayin hog mwlw ham ngulv nyitayin. Ngulv hiyam kam lvpw at gob mvram. Hoggv noqg vnyiqkv kvvlwq dvn ham nyis to.”

⁶‍Ho Jehu lwnyi dvb bulam pota xeql begamv, “Nulv ngam nyemaq ceeba dvloqkam, hoo ngam tvjw dvb mwwd nyiloqkam, nulug nyiit atwg ko tuup tulug dumpongam naalayil aaram mam soq mood so Jejreel ho ngoqg dookub haato.” Lvpw atwg cam kvn ko tuup tulungv, bulam soca bog bopam hoqg xinam koibo nyi tulu lvgab doonum.

⁷‍Hoo hwdlo potangv bulam hvvc kalam da, bulv lvpw atwg ko tuup tulug, cam kvn dumpongam pvriqnum, hoo bulug dumpongam paaxa ho vlwq tvl hoo hoq tulu ham mwam Jejreel ho kanamnum.

⁸‍Hwdlo pui baqn bov haanv hoo mwam betamnum, “Bulv lvpw atwg ko tuup tulug dumpongam baqa paku,” hoo mwv benum, “Hoq tulu ham haagag toggoqho pvmnyi gob paaptvl aaram ar namgub doom to.”

⁹‍Ho arho mwv lvvgwb lengdwkho, hoo mwv daqtwl hoo nyiilu mwlwngam benum, “Nulv nyi nyiisam mwji. Soq tulu sam ngo hima bwwlayil ngoqg nyiit atam mengnum, hvbmabde hiyv soq mwlw sam mengn bov?

¹⁰‍Cengto At Swg gomcwr goonamv niqtuq lengmab nyiram, At Sw Ahabwg nombu pagoqkam goonum, hoggab At Sw mwwg nyera Ilijag lvgab mwv agam goonam ham niqtuq nyilinum.”

¹¹‍Hoqgab Jejreelho Ahabwg nombu ho doonyu bo tulungam Jehu mengnum, mwwg koibo nyi tulungam hoo mwwg ajin jimbw tulungam hoo mwwg nyub tulungam akkam dooma dvb mwv mingtwrnum.

¹²‍Ho mwv wrab kunv hoo Samariyab wknum. Lamta ho hwdlo mwv Sviya Rvkybo tulug Bet-eked nyookho haai yikho,

¹³‍Jehu Judag lvpw at Ahajiyag lwrw ata go wrwqnum, hoo mwv benum, “Nulv hiyv?” Hoo bulv birwqnum, “Ngulv Ahajiyag lwrwngv, hoo xinam lvpw atwg ko tuup tulungam la ko tuup tulug vi-koory ann ham kaatab haaiyin.”

¹⁴‍Mwv benum, “Bulam tordwb nootu to.” Hoo bulam bulv tordwb nootunum hoo campy leq vnyi go nyiingam bulv Bet-ekedwg ungho mengnum, hoo mwv bulam akkam apaq maanum.

¹⁵‍Hoo hwdlo mwv hoqgv wleq yukun, mwam kvvrwqtab hoodu bo Rekab gv ko tuup Jehonadabnvn mwv kvvrwqnum. Hoo mwam mwv salam jil hoo mwam benum, “Noqg hangv ngoqg hang hvb lootw dvn yv?” Hoo Jehonadab birwqnum, “V lootw dvn.” Jehu benum, “Hvbnyiloqkam, noqg alaqkam ngam jito.” Ho mwv mwwg alaqkam mwam jinum. Hoo Jehu mwam mwwg ceriot lvgab boocal wgnum.

¹⁶‍Hoo mwv benum, “Ngoqg lvgab haato, hoo At Sw gab ngoqg hwrcwb nyinam mam kaaka to.” Hoqgab mwwg ceriot ho mwam mwv xarg mvnum.

¹⁷‍Hoo hwdlo mwv Samariya ho haanum, hoo mwv Samariya ho Ahabwg lwrw doonbo mwlwngam mingyum maady deedib mengnum, At Swg gomcwram Ilijag goonam hvb bulam twryumnum.

¹⁸‍Ho Jehu nyiilu mwlwngam goqkumnv hoo bulam benum, “Ahab Baal ham anyo go xumnum, hvbmabde Jehu mwam vigo xumtayin.

¹⁹‍Hoqgab sija Baal nyiqry benbo mwlwngam, hoo mwam xumn bo mwlwngam hoo mwwg nyub mwlwngam ngoqg dookub goqa to. Akkam haamab nyim mvmabv, hoggab ngo Baal ham koi jaqb pwr aky jitayin. Hiyv lajaqkam haama bov swwkram.” Hvbmabde Baalnvn xumn bo tulungam twryum dvb Jehu sur jaqb nyinum.

²⁰‍Hoo Jehu gaml jinum, “Baal gab piwr jwr-jwr dvb garxaq dvb mwlwngam hookum mvto.” Hoqgab hoq ham bulv pui beknum.

²¹‍Hoo Jehu Israel mwlw ho puiyam kanamnum, hoo Baalnvn xumn bo mwlwngv haanum, hoqho nyi haama bo akkam doomanum. Hoo bulv Baalwg nam urab haanum, hoo Baalwg nammv tuur gon hoqgv tuur gon namgub nyiingv bwwrnum.

²²‍Jehu nyub kamt vjam kaaya bo nyub akam benum, “Baalnvn xumn bo tulu gab kamt vjam bwa to.” Hoqgab bul mwlw gab mwv kamt vjam bwa jinum.

²³‍Ho Jehu Rekab gv ko tuup Jehonadab lvgab Baalwg nam urab haanum, hoo mwv Baalnvn xumn bo tulungam benum, “Meegaql hoo kaagaqto nulug pengko ho At Swg nyera akkam doom mvmabv, hvbmabde Baalnvn aro xumn boam doom to.”

²⁴‍Ho bulv pwr akiam la boyuqnam aky jitab haanum. Jehu lvvg ho nyi cam piin go pvvl apnum hoo bulam benum, “Hiyvg nyi alaqho ngoqg nyi jilwqnam mam keleq mvnbov mwwg swwgam kaapa kuram.”

²⁵‍Hwdlo mwv mwwg aky jinam mam la boyuqnam akiam jinya kalam, Jehu rvky boam la saab tulungam benum, “Urab haan hoo bulam mengta; nyi akkam kelin mvmabv.” Hoqgab hwdlo bulv bulam lyoqr orioq hoqgv mengnum, rvky bov la saab tulungv bulam lvvgwb joopaqnum hoo Baalwg nam cwwrw ura jaqb haanum,

²⁶‍hoo Baalwg nam uraho murty doon boam bulv lvvgwb joolinum hoo ham wm parnum.

²⁷‍Hoo Baalwg murtiam jwwmwqnum, hoo Baalwg nammam sapianum, hoo hoq ham usum-ee gumr gob mvtkul soolo namgub doodwn.

²⁸‍Soq sib Jehu Israel hoqgv Baalnvn twryuml twrpaqnum.

²⁹‍Hvbmabde Nebatwg ko tuup Jeroboamwg nyic tulu hoqgv Jehu wleq nyomanum, hogloq hv Israelam nyic nyimnum—hun svv ko tulungam xumnamv, hoqhv Betel la Dan ho doonum.

³⁰‍Hoo At Sw Jehunvn benum, “Hoggab ngoqg vnyiq kaagaho hoggv aldvn ham no aljaqb nyipa ku, hoo ngoqg hang lo Ahabwg nombungam nyidwb mwwk jaqb no nyipa ku, hoqgab noqg ko tuup tulungv hotam vpy namgub Israelwg lvpw at gob swwl dootayin.”

³¹‍Hvbmabde Jehu Israelwg Pwnbo At Swg pvvb ho mwwg hangv hengab lalal wmanum. Jeroboamwg nyic nyinam tulu hoqgv mwv wkur maanum, hoq ham mwv Israelam nyic nyimnum.

³²‍Hoq moodho At Sw Israelwg gvda meegwn mvpaqnum. Israelwg dwrbu-dwrya mwlw ho Hajael bulam mviyanum:

³³‍Jordonwg dou-cagag, Gilead gvda mwlwngam, Gad nyi tulungam, hoo Reuben nyi tulungam, hoo Manasse nyi tulungam, Aroyer hoqgv Arnon haapa namgub naareqnum, hoqhv Gilead la Basan gvdangv haataqnum.

³⁴‍Jehug asaq nyinam mwlwngam, hoo mwwg hoolu-deed nyinam mam, hoo mwwg ator tornam mwlwngam, Israelwg Lvpw at tulug Nwd Kitap xeqp ko ho xeqp maap nvi yv?

³⁵‍Hoqgab Jehu mwwg ab tulug sinam hvb siknum, hoo bulv mwam Samariya ho liiknum. Hoo mwwg kwlib mwwg ko tuup Jehoahaj pvvb bwwl doognum.

³⁶‍Ho Jehu Samariya hoqgv Israelam vnyw camnyi leq piin go pvvb bwwl doognum.