Read Nyishi 2 LVPW ATWG 11 Bible Online

2 LVPW ATWG 11 - Nyishi bible

2 LVPW ATWG 11

¹Ahajiyag ann Ataliya hwdlo mwnwg ko tuupam mengnam mam tapa yin, mwn gorabnum hoo xinam imiq dvpar mwlwngam twryumnum.

²‍Hvbmabde, Lvpw at Joramwg nyem ko Jehoseba, Ahajiyag bwrmv, Ahajiyag ko tuup Joasnvn lvpw atwg ko tuup tulungam mengta tanam pengko hoqgv boosil wgnum, hoo mwn mwam la mwam kaanbo nwbwngam yubk cwwrwho pvvl apnum. Soq sib bulv mwam Ataliya hoqgv kvsnum, ho mwam mengm mvmanum.

³‍Hoo hwdlo Ataliya gvdangam pvvb bwwl doog yukho, mwnwg lvgab mwv vnyw nywx go At Swg dvrwq namlo uraho kvsil doognum.

⁴‍Hvbmabde vnyw deen kvn yukho Jehoiada sipai saab kepten tulungam hoo pwqlwngam rvky bo tulungam pui bilwq tvl, hoo bulam mwwg dookwg At Swg dvrwq namlo ho haamnum. Hoo mwv birnam pvvb ak bulug lvgab mvnum hoo hoq tulu ham At Swg dvrwq namlo uraho dingnum, hoo mwv hoq tulu ham lvpw atwg ko tuupam kaakinum.

⁵‍Hoo mwv bulam gaml jinum, “Nulv soq pagoq sam nyidwb nyitayin: oum hoqgv akwn hwdlo nulv Doonu aalam la lvpw atwg nammam rvkil bon nyitab haaikam

⁶(asaq oum hoqgv akwn Sur toggoqho hoo oum hoqgv akwn rvkil daqk toggoq lvvg ho) lvpw-haty pwqlwngam rvkil daqg tayin.

⁷‍Hoo Doonu aalam la lvpw atwg kwlib At Swg dvrwq namlongam rvky taab bon nyitab haan boam jvqnyi gob nulv mvto,

⁸‍ho nyiicwr-cwrxiv mwwg alaqho nwwxo-svtam bwwtwl lvpw atam gooyum tayin. Hoo hiyv lajaqkam ogum hvvnwq boam mengto. Hwdlo lvpw atv haagwi hoo lengwi nyiyikam nulv mwwg lvgab dooba to.”

⁹‍Kepten tulungv nyub Jehoiadag gaml jinam jaqb nyinum, hoo hiyv Doonu aalho bon nyitab haanbo mwlwngam, ho Doonu aalam bon nyitab haady bo mwlwngam, bulv nyiicwr-cwrxiv mwwg nyi tulungam boanum, hoo nyub Jehoiada dookub haanum.

¹⁰‍Hoo nyubv At Swg dvrwq namlo ho Debidg nwwxo ngamla svtam doon boam kepten tulungam jinum.

¹¹‍Hoo nyiicwr-cwrxiv mwwg alaqho mwwg nwwxo-svtam mam bwwtwl nammwg nyooko daiya hoqgv nammwg nyoodum daiya namgub, hoo yugw bviywr-bvcarho hoo nammam lvpw atwg kwlib rvky bo tulungv daqgnum.

¹²‍Ho mwv lvpw atwg ko tuupam boolwqnum hoo mwam ywr dumtupam tulwqnum hoo mwwg swwi-swwcangam pui betamnum. Hoo bulv mwam lvpw at gob beknum hoo mwam darxaq kunum, hoo bulug alaqkam bulv cupup kunv hoo benum, “Lvpw at swwiyu nvka!”

¹³‍Hwdlo Ataliya rvky bo tulu ngvla nyiilungv hur-marab dunam mam tapayin, mwn nyiilug dookub At Swg dvrwq namlo urab haanum.

¹⁴‍Hoo hwdlo mwn kaanamv, lvpw at ak ab apag nyicw jaqb mvtwl daqnum, hoo kepten tulu ngvla tuuly miqnbo tulungv lvpw atwg bviywrho daqnum, hoo gvda hoqg nyiilungv hemp-hvnyirl hoo tuuly miqnum. Hoo Ataliya mwnwg vjam pumwq sunum hoo sogoqnum, “Nyipin namgo! Nyipin namgo!”

¹⁵‍Ho nyub Jehoiada sipai kepten tulungam gaml jinum, “Mwnwn pengko ho boolin to, hoo hiyv lajaqkam mwnwn wmin gvnboam lyoqr orioq hoqgv mengpaqto.” Hoggab nyub akv benum, “At Swg dvrwq namlo uraso mwnwn mengmabv.”

¹⁶‍Hoqgab bulv mwnwn alaq nootu layil; hoo mwnwn svpur haagag lvpw atwg nammwb wgnum, hoo hoqho mwnwn mengknum.

¹⁷‍Hoo Jehoiada bulam At Swg nyiilub nyim dukub, At Sw gvla lvpw at gvla nyiilug pengko ho birnam pvvb ak mvnum, hoo lvpw at gvla nyiilug pengko hookam birnam pvvbam mvnum.

¹⁸‍Ho gvda hoqg nyiilu mwlwngv Baalwg nammwb wnum hoo Baalwg nammam mviyaqnum; mwwg yugwngam hoo mwwg guss tulungam bulv vmwq yumgub mvnum, hoo bulv yugw agaho Baalwg nyub Mattannvn mengnum. Hoo Jehoiada At Swg dvrwq namlongam rvky bo nyi tulungam pvvl apnum.

¹⁹‍Hoo mwv kepten tulungam, saab tulungam, rvky bo tulungam, hoo gvda hoqg nyiilu mwlwngam naanum, hoo rvky bo tulug toggoq hoqgv lvpw atwg nam namgub bulv lvpw atam At Swg dvrwq namlo hoqgv taqg-loosaqb soolwl bool ignum.

²⁰‍Hoqgab gvda hoqg nyiilu mwlwngv hemp-hvnyirnum, hoo lyoqr orioq hoqgv lvpw atwg namho Ataliyanvn mengxo kokw so bopamv cooikab doonum.

²¹‍Hwdlo Jehoas pvvb bwwl doorab gviyikho mwv vnyw kvn go akam kunum.