Read Nyishi 2 LVPW ATWG 12 Bible Online

2 LVPW ATWG 12 - Nyishi bible

2 LVPW ATWG 12

¹Jehu vnyw kvn deen go swwyikho, Jehoas pvvb bwwl doorab gvnum, hoo mwv Jerusalemho vnyw campy go pvvb bwwl doognum. Mwwg ann hoqg eminv Jibiya, Beerseba hoqgv.

²‍Hoo Jehoas mwwg swwnam bumpw ho hoggv jvqtw dvn At Swg vnyiq kaagaho nyinum, hoggab nyub Jehoiada mwam tomswrnum.

³‍Hvbsujaqkam puutu aoho xumk nam tulungam mvpaq maanum; hoqgab nyiilungv hvraqb puutu aoho pwr jinam mam la aky jinam tulungam nyidul doonum.

⁴‍Jehoas nyub tulungam benum, “At Swg dvrwq namlo ho bwanam twngk tulu ham, nyi vxiv twngk jidwb nyinam ham jikumnam ham—nyi tulu hoqgv nookum dvb nyinam twngkam—hoo nyi akv mwwg mwwlwqb twngk jib mwwnam mam At Swg dvrwq namlo ho baqanam mam pvvcuml apto,

⁵‍ho nyiicwr-cwrxig mwwg twngk jikumnam mam, nyub tulungam naamto, hoo hwdlo jaqkam nammv mvdar dvb nyiyikam, bulam nammam mvdarl mvn mvto.”

⁶‍Hvbmabde Lvpw at Jehoas vnyw camnyi leq nywum go swwnam xaqgub nyub tulungv nammam mvdar maanum.

⁷‍Hoqgab Lvpw at Jehoas nyub Jehoiada nvla asaq nyub tulungam goqkumnum hoo bulam benum, “Hoggub nulv nammam mvdar maadwn? Hoqgab sija twngk jikum bo hoqgv twngk naakmabv, hvbmabde twngkam nam mvdar mvdwb gvqlwq tuku.”

⁸‍Hoqgab nyub tulungv bulv nyiilu hoqgv twngk naama dukub, hoo bulv nammam mvdar maadkub loor kunum.

⁹‍Ho nyub Jehoiada uddum ak mvnum hoo hoqg putup ho ung ug roqko tvl hoo ham At Swg dvrwq namlo yugwg lvqbwq taqc ho joopnum. Hoo haaga rvky yaanbo nyub tulungv At Swg dvrwq namlo xumn bo tulug twngk bwal jinam mam hoqho vlwq mvnum.

¹⁰‍Hoo hwdlo lajaqkam uddum ho twngkv vigo dooikam, lvpw atwg svkretvri ngvla nyub but akv haal hoo bulv At Swg dvrwq namlo ho twngk jikumnam mam pusuml xikal apnum.

¹¹‍Ho bulv twngkam xika tvl hoo At Swg dvrwq namlongam kaal bonam nyinbo tulug alaqho jidwn. Hoo bulv hoq ham At Swg dvrwq namlo svvtaq jem mvnbo tulu ngam la nammam mvnbo tulungam nyijob jidwn,

¹²‍hoo simit bon nyinbo tulungam hoo wlw taqn bo tulungam, hoq lvg-lvgab svvtaq rvl hoo wlw rvl hoo At Swg dvrwq namlongam mvdar nandwb, hoo nammv hogloq-hogloqho almadwn ham mvdar nvm dvb jinum.

¹³‍Hvbmabde At Swg dvrwq namlog rupwg pukaq tulungam, sulum parnan tulu gab, pukaq tulu gab, tuuly tulu gab, ho hun dupum-dvrab pam ho rupam At Swg dvrwq namlo ho bwanam hoqg twngkam rvn dvb nyimanum,

¹⁴‍hoggab hoq tulu ham bonam nyinbo nyi tulungam At Swg dvrwq namlongam mvdar mvdwb jinum.

¹⁵‍Hoo bonam nyinbo tulungam twngk jim dvb jilwqnam nyi ak hoqgv bulv twngkam hwwmanum, hoggab bulv jvqtw jaqb nyinum.

¹⁶‍Nyimur gab aky jinam twngkam la nyic gab aky jinam twngkam At Swg dvrwq namlo ho baqa maanum; hoggab hoqhv nyub tulu gab doonum.

¹⁷‍Hoq moodho Siriyag lvpw at Hajael Gat bopam mam nyob paiyal hoo ham naaknum. Hvbmabde hwdlo Hajael mwwg nyuqmv Jerusalem mam ceekol nyob patayin,

¹⁸‍Judag lvpw at Jehoas mwwg ab tulug Jehosapat, Jehoram hoo Ahajiya, Judag lvpw at tulug darxaqnum dvrwqbo aky tulungam la mwwg atwg dvrwqbo aky tulungam, hoo hun mwlwngam At Swg dvrwq namlog gumn uddum hoqgv la lvpw atwg gumn uddum ho doon boam naanum, hoo Siriyag lvpw at Hajaelnvn jilwqnum. Ho Hajael Jerusalem hoqgv wleq kunum.

¹⁹‍Joas gv asaq nyinam mwlwngam, hoo mwwg hoolu-deed nyinam mam, Judag Lvpw at tulug Nwd Kitap xeqp ko ho xeqp maap nvi yv?

²⁰‍Mwwg nyera tulungv mwam hima bwwrab banv hoo Sillab ik lamtag Millo namho Joasnvn mengnum.

²¹‍Mwam mengn bo mwwg nyera tulu Simeatwg ko tuup Jojakar hoo Somerwg ko tuup Jehojabad, hiyv mwam patabnum, hoqgab mwv siknum. Hoo bulv mwam Debidg bopam, mwwg ab tulug svma lvgab liiknum, hoo mwwg kwlib mwwg ko tuup Amajiya pvvb bwwl doognum.