Read Nyishi 2 LVPW ATWG 13 Bible Online

2 LVPW ATWG 13 - Nyishi bible

2 LVPW ATWG 13

¹Judag lvpw at Ahajiyag ko tuup Joas vnyw camnyi leq nywum go swwyikho, Jehug ko tuup Jehoahaj Samariya hoqgv Israelam pvvb bwwl doorab gvnum, hoo mwv vnyw camleq kvn go pvvb bwwl doognum.

²‍Mwv At Swg kaagaho hoggv almadwb ham nyinum hoo Nebatwg ko tuup Jeroboamwg nyic nyinam tulungam nyimin gvnum, hogloq hv Israelam nyic nyimnum; mwv hoq tulu hoqgv wleq maanum.

³‍Hoo At Swg hang lengnamv Israelwg aoho ceekol bioql doonum, hoo mwv bulam Siriyag lvpw at Hajael la Hajaelwg ko tuup Ben-hadadwg alaqho doodu mvdwb jinum.

⁴‍Ho Jehoahaj At Swg mwwlwqkam meegaqnum, hoo At Sw mwam birwqnum, hoggab mwv Israelam hoggub Siriyag lvpw atv bulam nyijab-nyiyiqnam mam kaapanum.

⁵(Hoqgab At Sw Israelam ywwlin bo ak jinum, ho bulv Siriya nyi tulug alaq hoqgv keleqnum, hoo Israel nyiilungv bulug namho otuqho hoggub doonam hvb dooknum.

⁶‍Hvbsujaqkam bulv Nebatwg ko tuup Jeroboamwg nombu hoqg nyic nyinam tulu hoqgv wleq maanum, hogloq hv Israelam nyic nyimnum, hvbmabde bulv hoq tuluho wnum; hoo Asera ngvkam Samariya ho hvraqb doonum.)

⁷‍Hoggab Jehoahaj camng laleq go svpur xarg bo nyi tulungam hoo ceriot wywngam hoo camg lwwyw go lvpiab wnbo sipai tulungv dook maanum, hoggab Siriyag lvpw atv hoq tulu ham la bulam deela ho diimwr hvb twryum kunum.

⁸‍Jehoahajwg asaq nyinam mwlwngam, hoo mwwg hoolu-deed nyinam mam, hoo mwwg atornam mam, Israelwg Lvpw at tulug Nwd Kitap xeqp ko ho xeqp maap nvi yv?

⁹‍Hoqgab Jehoahaj mwwg ab tulug sinam hvb siknum, hoo bulv mwam Samariya ho liiknum, mwwg kwlib mwwg ko tuup Joas pvvb bwwl doognum.

¹⁰‍Judag lvpw at Joas vnyw cammum leq kvn gob swwyikho, Jehoahajwg ko tuup Jehoas Samariya hoqgv Israelam pvvb bwwl doorab gvnum, hoo mwv vnyw camleq nywx go pvvb bwwl doognum.

¹¹‍Mwv kam At Swg kaagaho hoggv almadwn ham nyinum. Mwv Nebatwg ko tuup Jeroboamwg nyic nyinam tulu hoqgv wleq maanum, hogloq hv Israelam nyic nyimnum, hvbmabde mwv hoq tuluho wnum.

¹²‍Joas gv asaq nyinam mwlwngam, hoo mwwg hoolu-deed nyinam mam, hoo mwwg ator jaqb ceekol Judag lvpw at Amajiyanvn nyob panam mam, Israelwg Lvpw at tulug Nwd Kitap xeqp ko ho xeqp maap nvi yv?

¹³‍Hoqgab Joas mwwg ab tulug sinam hvb siknum, hoo Jeroboam mwwg pwqlw ho doonum. Hoo Joasnvn Samariya ho Israelwg lvpw at tulug lvgab liiknum.

¹⁴‍Ho hwdlo Ilisa vc looda vc kunum, hoqg vc hoqgv mwv sid jaqb vc yukho, Israelwg lvpw at Joas mwwg dookub innum hoo mwwg agaho xabnum, ho sogoqnum, “Ngoqg aba, ngoqg aba! No Israelwg ceriot tulungv hoo hoqg svpur xarg bo tulungv!”

¹⁵‍Hoo Ilisa mwam benum, “Illy daag la uppuq lo naato.” Ho mwv Eliyam la uppuqkam naanum.

¹⁶‍Ho mwv Israelwg lvpw atam benum, “Illiam seea to,” hoo mwv ham seenum. Hoo Ilisa mwwg alaqkam lvpw atwg alaq aoho idaqnum.

¹⁷‍Hoo mwv benum, “dou-caga pupum mam mvko to,” hoo mwv ham mvkonum. Ho Ilisa benum, “Abto,” hoo mwv abnum. hoo mwv benum, “At Swg mviyanan uppuqkv, Siriyangam mviyanan uppuqkv! Hoggab Siriya nyi tulungam no Apek ho bulam mingtwr maady deedib no nyob patayin.”

¹⁸‍Hoo mwv benum, “Uppuqkam naato,” hoo mwv uppuq tulu ham naanum. Hoo mwv Israelwg lvpw atam benum, “Hoq tulu hoqgv deelangam jwwdin to.” Hoo mwv loum go jwwdin tvl hoo heemonum.

¹⁹‍Ho Pwnbog nyi ak hv mwam hang lengl hoo benum, “No lwng maalo lwx go jwwdin nyiloqkam; ho no Siriyangam mingtwr maady deedib mengb nvpv, hvbmabde no sija Siriyangam loum gotwq nyob patayin.”

²⁰‍Hoqgab Ilisa siknum, hoo bulv mwam liiknum. Moab nyi dvpar go Israel gvdangam dug pool moodam nyob pa-a keenum.

²¹‍Hoo nyi akam svma liidu yukho, kaato, naalil naareqbo dvparam kaapanum hoo nyi akam Ilisag nyub ho joolwqnum, hoo hwdlo nyi ak hoqg svmangv Ilisag alongam mwsiq kalam, mwv lokta turabnum hoo mwv daqrabnum.

²²‍Ho Israelwg lvpw at Jehoahajwg swwnam bumpw ho Siriyag lvpw at Hajael nyijab-nyiyiqnum.

²³‍Hvbmabde At Sw bulam anya mwwpanum hoo bulam hang biinum, hoo mwv bulug daiyab tobkurnum, hoggab mwwg birnam pvvbv Abraham, Aisak, hoo Jakubnvn bulam twryum ram hvl birnum, ho mwv bulam sija namgub mwwg dook hoqgv roopaq maanum.

²⁴‍Hwdlo Siriyag lvpw at Hajael siyi kun, mwwg kwlib mwwg ko tuup Ben-hadad lvpw at gob swsiqnum.

²⁵‍Ho Jehoahajwg ko tuup Jehoas lokta Hajaelwg ko tuup Ben-hadad hoqgv mwwg abam nyob pal bopam naareqnam tulungam mwv nookur kunum. Joas mwam loum go mviyanum hoo Israelwg bopam tulungam nookur kunum.