Read Nyishi 2 LVPW ATWG 14 Bible Online

2 LVPW ATWG 14 - Nyishi bible

2 LVPW ATWG 14

¹Israelwg lvpw at Joahaj gv ko tuup Joas vnyw nywnyi go swwyikho, Judag lvpw at Joas gv ko tuup Amajiya pvvb bwwl doorab gvnum.

²‍Hwdlo mwv pvvb bwwl doorab gviyikho, mwv vnyw camnyi leq nywng go akamnum, hoo mwv Jerusalemho vnyw camnyi leq kiya go pvvb bwwl doognum. Mwwg annwg eminv Jehoaddin, mwn Jerusalem hoqgv.

³‍Hoo mwv At Swg vnyiq kaagaho hoggv aldvn ham nyinum, hvbsujaqkam mwwg ab Debid hvb nyimanum. Mwwg ab Joas gv nyinam hvb mwv hog mwlwngam nyinum.

⁴‍Hvbmabde puutu aoho xumk nam tulungam mvpaq maanum; nyiilungv hvraqb pwr aky tulungam la aky jinam mam puutu aog xumk nam tuluho jidul doonum.

⁵‍Hoo mwwg alaqho xinam huqlwngv haaxy kalam twqda, mwwg abam mengn bo mwwg nyera tulungam mwv mengnum.

⁶‍Hvbmabde mengn bog ko tulungam mwv mengmanum, hoggab soq sib At Swg gamlv Mojesg Pvvb Kitap lo bel appan, “Ko tulug nyigo gab ab tulungam mengmabv, ho ab tulug nyigo gab ko tulungam mengmabv. Hvbmabde nyiicwr-cwrxiv mwwg atwg nyic nyigam gab sitayin.”

⁷‍Mwv Al Lywpa ho Idom nyi tulungam lwwyw camg mengnum, hoo Sela bopam mam doogum-dooiyib nyil naanum, hoo ham Jokteel hvl eminum, hoq eminamv soolo godab doodwn.

⁸‍Ho Amajiya Israelwg lvpw at Jehu ko tuup hosiq hoqg Jehoahajwg ko tuup Jehoasnvn pui bilwql begamv, “Haato, ngunyiv akwn-akwn nyuqm mam kvvrwq mins tuj.”

⁹‍Hoo Israelwg lvpw at Jehoas Judag lvpw at Amajiyanvn gomcwr bilwql kanamnum, “Lebanon aoho doonbo taa soog Lebanon aoho doonbo sidar akam pui bilwql begamv, ‘Noqg nyem koam ngoqg nyega ko nywxw gab jila bv hvl benum,’ hoo Lebanonwg nyoro svdin tulungv hoqb sool wpeqnum hoo taa soam coiyu-cacanum.

¹⁰‍Jvqtw jaqb no Idom nyi tulungam mengnum, hoo noqg hangv nam larm gvdo. Noqg yuunam ho xumtwl dooto, hoo noqg namho dooto, hoggab no atv la Judangam noqg lvgab yoql mvdwb vs-axaqkam hoqpup dvn.

¹¹‍Hvbmabde Amajiya tamanum. Hoqgab Israelwg lvpw at wnum, hoo mwv la Judag lvpw at Amajiya, Juda gvdag Bet-semes ho akwn-akwn wrwq minsnv nyob pamin sunum.

¹²‍Hoo Judangam Israelv mviyanum, hoo nyiicwr-cwrxiv mwwg at nammwb keknum.

¹³‍Hoo Israelwg lvpw at Jehoas Judag lvpw at Ahajiyag ko tuup hosiq, Jehoaswg ko tuup Amajiyanvn Bet-semes hoqgv nootul nyumwb boonum, hoo mwv Jerusalemb haanum hoo Iprayim Toggoq hoqgv Cuukiq Toggoq namgub Jerusalem gurum mam lwwpy kiubit go dwwpianum.

¹⁴‍Hoo mwv At Swg dvrwq namlo ura hoola lvpw atwg nam uraho gumn doonbo hog mwlw hunam hoo rupam, hoo dupum-dvrab kaapanam hog mwlwngam naanum, hoo mwv Samariyab wkur kunum.

¹⁵‍Jehoaswg asaq nyinam mwlwngam, hoo mwwg ator jaqb Judag lvpw at Amajiyanvn nyob panam mam, Israelwg Lvpw at tulug Nwd Kitap xeqp ko ho xeqp maap nvi yv?

¹⁶‍Hoo Jehoas mwwg ab tulug sinam hvb siknum hoo Israelwg lvpw at tulu liik ho Samariya ho liiknum, hoo mwwg kwlib mwwg ko tuup Jeroboam pvvb bwwl doognum.

¹⁷‍Judag lvpw at Joas gv ko tuup Amajiya, Israelwg lvpw at Jehoahajwg ko tuup Jehoaswg sixo kokw so vnyw camleq nywng go swwl doonum.

¹⁸‍Amajiyag asaq nyinam mwlwngam, Judag Lvpw at tulug Nwd Kitap xeqp ko ho xeqp maap nvi yv?

¹⁹‍Hoo Jerusalemho bulv mwam ceekol hima bwwrab yin, hoo mwv Lakiswb keleqnum. Hvbmabde bulv mwwg kokwb Lakis namgub nyi kanam tvl hoo mwam hoqho mengmnum.

²⁰‍Hoo bulv mwam svpur ho baqanum; hoo Jerusalemho mwwg ab tulug lvgab Debidg bopam ho mwam liiknum.

²¹‍Hoo Judag nyiilu mwlwngv vnyw camleq nywx bo Ajariyanvn naanum, hoo mwwg ab Amajiyag kwlib mwam lvpw atwb mvknum.

²²‍Lvpw atv mwwg ab tulug sinam hvb sixo kokw so, mwv Elatngam mvdarnum hoo Judaho nookurl nvvlwq kunum.

²³‍Judag lvpw at Joas gv ko tuup Amajiya vnyw camleq nywng go swwyikho, Joas gv ko tuup Jeroboam Israelwg lvpw atwb nyirab kunum, ho Samariya hoqgv pvvb bwwl doorab gvnum, hoo mwv vnyw campy leq nywg pvvb bwwl doognum.

²⁴‍Hoo mwv At Swg kaagaho hoggv almadwn ham nyinum. Mwv Nebatwg ko tuup Jeroboamwg nyic tulu hoqgv wleq nyomanum, hogloq hv Israelam nyic nyimnum.

²⁵‍Israelwg Pwnbo, At Sw mwwg gomcwram, Gat-heper hoqg mwwg nyera nyiqry benbo Amittaiywg ko tuup Jonanvn goom kunam hvb, mwv Israelwg vrram Lebo-hamat hoqgv Araba sa-svlo namgub nookur kunum.

²⁶‍Hoggab At Sw Israelwg kacaq bviyaq dvb hentwr henam mam kaanum, hoggab hoqho nyumwb ge ho nyiidu ge akkam dook maanum, hoo Israelam nyi akkam svka bo doomanum.

²⁷‍Hvbmabde At Sw hvl bemanum, Israelwg eminam nyodo nvg niikum soqgv niipaq mvdwb, hoqgab mwv Joas gv ko tuup Jeroboamwg alaq hoqgv bulam ywwlin mvnum.

²⁸‍Jeroboamwg asaq nyinam mwlwngam, hoo mwwg hoolu-deed nyinam mam, hoo mwwg ator jaqb nyob panam mam, hoo hoggub mwv Damaskas sam la Hamatam Judag Israel uraho, Israelwg Lvpw at tulug Nwd Kitap xeqp ko ho xeqp maap nvi yv?

²⁹‍Hoo Israelwg lvpw at, Jeroboam mwwg ab tulug sinam hvb siknum, hoo mwwg kwlib mwwg ko tuup Jakariya pvvb bwwl doognum.