Read Nyishi 2 LVPW ATWG 15 Bible Online

2 LVPW ATWG 15 - Nyishi bible

2 LVPW ATWG 15

¹Israelwg lvpw at Jeroboam vnyw camnyi leq kvn go swwyikho, Judag lvpw at Amajiyag ko tuup Ajariya pvvb bwwl doorab gvnum.

²‍Hwdlo mwv pvvb bwwl doorab gviyikho, mwv vnyw camleq nywx gob akamnum, hoo mwv Jerusalemho vnyw camng leq nywnyi go pvvb bwwl doognum. Mwwg annwg eminv Jekoliya, mwn Jerusalem hoqgv.

³‍Hoo mwv At Swg vnyiq kaagaho hoggv aldvn ham nyinum. Mwwg ab Amajiyag nyinam hvb mwv hog mwlwngam nyinum.

⁴‍Hvbmabde puutu aoho xumk nam tulungam mvpaq maanum. Nyiilungv hvraqb pwr aky tulungam la aky jinam mam puutu aog xumk nam tuluho jidul doonum.

⁵‍Hoo At Sw lvpw atam idaqnum, hoqgab mwwg sinam xaqb mwv tviyiq nyinum, hoo mwv nam namsaqho doonum. Hoo lvpw atwg ko tuup Jotam nombungam la gvdag nyiilungam pvvb bwwl doognum.

⁶‍Ajariyag asaq nyinam mwlwngam, hoo mwwg hoolu-deed nyinam mam, Judag Lvpw at tulug Nwd Kitap xeqp ko ho xeqp maap nvi yv?

⁷‍Hoo Ajariya mwwg ab tulug sinam hvb siknum hoo mwwg ab tulug lvgab Debidg bopam ho bulv mwam liiknum, hoo mwwg kwlib mwwg ko tuup Jotam pvvb bwwl doognum.

⁸‍Judag lvpw at Ajariya vnyw cammum leq piin go swwyikho, Jeroboamwg ko tuup Jakariya Israelam Samariya hoqgv pool barx go pvvb bwwl doognum.

⁹‍Hoo mwv At Swg kaagaho hoggv almadwn mwwg abwg nyinam hvb nyinum. Mwv Nebatwg ko tuup Jeroboamwg nyic tulu hoqgv wleq nyomanum, hogloq hv Israelam nyic nyimnum.

¹⁰‍Jabeswg ko tuup Sallum mwam hima baqrabnv hoo mwam Ibleam ho patabnum hoo mwam simnum hoo mwwg kwlib pvvb bwwl doognum.

¹¹‍Jakariyag asaq nyinam mwlwngam, kaato, Israelwg Lvpw at tulug Nwd Kitap xeqp ko ho xeqpwl ap pakun.

¹²(Soq dingrnam sam At Sw Jehunvn jinum, “Noqg ko tuupv Israelwg pwqlw ho hotam vpy namgub dootayin.” Hoo hoqhv hvb nyil wknum.)

¹³‍Judag lvpw at Ujjiya vnyw cammum leq kiya go swwyikho, Jabeswg ko tuup Sallum pvvb bwwl doorab gvnum, hoo mwv Samariya ho pool bargwb pvvb bwwl doognum.

¹⁴‍Ho Gadig ko tuup Menahem Tirja hoqgv Samariya ho haal svmcw mvl doonum, hoo Jabeswg ko tuup Sallumnvn mwv patabnum hoo mwam simnum hoo mwwg kwlib pvvb bwwl doognum.

¹⁵‍Sallumwg asaq nyinam mwlwngam, hoo mwwg hima bwwnam mwlwngam, kaato, hoq tulu ham Israelwg Lvpw at tulug Nwd Kitap xeqp ko ho xeqpwl ap pakun.

¹⁶‍Hoq moodho Menahem Tipsangam hoo hoq uraho doonbo mwlwngam hoo Tirja hoqg dwrbu-dwrya mwlwngam twryumnum, hoggab bulv mwam jipaq maanum. Hoqgab mwv ham twrnum, hoo ko gvnbo nyem mwlwg kepongam mwv padeq-paiyeql mvnum.

¹⁷‍Judag lvpw at Ajariya vnyw cammum leq kiya go swwyikho, Gadig ko tuup Menahem Israelam pvvb bwwl doorab gvnum, hoo Samariya ho vnyw nywyw go mwv pvvb bwwl doognum.

¹⁸‍Hoo mwv At Swg kaagaho hoggv almadwn ham nyinum. Mwwg swwnam bumpw ho mwv Nebatwg ko tuup Jeroboamwg nyic tulu hoqgv wleq nyomanum, hogloq hv Israelam nyic nyimnum.

¹⁹‍Assiriyag lvpw at Pul Israel gvdangam nyob paanum, hoo Menahem lwwyw ak telent go rupam Pulnvn jinum, mwv lvpw at gob dooky dvb hoo mwwg nyob paikam mwam ator svka kodwb jinum.

²⁰‍Menahem Israelwg hoqgv twngk jidwb birnum, hoqhv nyetbo nyi tulu hoqgv naal jidwb nyinum, nyiicwr-cwrx hoqgv Assiriyag lvpw atam jim dvb camng sikil rup nookumnum. Hoqgab Assiriyag lvpw atv gvdaho dookmab mwv atwg gvdab wkur kunum.

²¹‍Menahemwg asaq nyinam mwlwngam, hoo mwwg hoolu deedy nyinam mwlwngam, Israelwg Lvpw at tulug Nwd Kitap xeqp ko ho xeqp maap nvi yv?

²²‍Hoo Menahem mwwg ab tulug sinam hvb siknum, hoo mwwg kwlib mwwg ko tuup Pekahiya pvvb bwwl doognum.

²³‍Judag lvpw at Ajariya vnyw camng go swwyikho, Samariya ho Israelam pvvb bwwl doog dvb Menahemwg ko tuup Pekahiya pvvb bwwl doorab gvnum.

²⁴‍Hoo mwv At Swg kaagaho hoggv almadwn ham nyinum. Mwv Nebatwg ko tuup Jeroboamwg nyic tulu hoqgv wleq nyomanum, hogloq hv Israelam nyic nyimnum.

²⁵‍Hoo Remaliyag ko tuup Pekanvn, mwwg keptenv hima bwwrabnv mwwg lvgab Gileadwg nyiilu camng go boolayil, hoo mwam lvpw atwg nam pwqlw ura, Samariya ho Argob la Arie lvgab patabnum; mwam mwv mengnum hoo mwwg kwlib mwv pvvb bwwl doognum.

²⁶‍Pekahiyag asaq nyinam mwlwngam, hoo mwwg hoolu deedy nyinam mam, kaato, hoq tulu ham Israelwg Lvpw at tulug Nwd Kitap xeqp ko ho xeqpwl ap pakun.

²⁷‍Judag lvpw at Ajariya vnyw camng leq nywnyi go swwyikho, Remaliyag ko tuup Peka Samariya ho Israelam pvvb bwwl doorab gvnum, hoo vnyw camnyi go mwv pvvb bwwl doognum.

²⁸‍Hoo mwv At Swg kaagaho hoggv almadwn ham nyinum. Mwv Nebatwg ko tuup Jeroboamwg nyic tulu hoqgv wleq nyomanum, hogloq hv Israelam nyic nyimnum.

²⁹‍Israelwg lvpw at Pekag moodho Assiriyag lvpw at Tiglat-pileser haanum hoo Ijon, Abel-bet-maaka, janoa, Kedes, Hajor, Gilead, hoo Galili, hoo Naptali gvdangam, naareqnum, hoo nyiilungam Assiriyab nyumwb bool wgnum.

³⁰‍Ho Elag ko tuup Hosiya Remaliyag ko tuup Pekanvn hima bwwrabnv hoo mwam patabnum hoo mwam mengnum hoo mwwg kwlib mwv pvvb bwwl doognum, Hoq moodho Judag lvpw at Ujjiyag ko tuup Jotam vnyw camnyi go swwknum.

³¹‍Pekag asaq nyinam mwlwngam hoo mwwg hoolu deedy nyinam mam, kaato, hoq tulu ham Israelwg Lvpw at tulug Nwd Kitap xeqp ko ho xeqpwl ap pakun.

³²‍Israelwg lvpw at Remaliyag ko tuup Peka vnyw nywnyi go swwyikho, Judag lvpw at Ujjiyag ko tuup Jotam pvvb bwwl doorab gvnum.

³³‍Hwdlo mwv pvvb bwwl doorab gviyikho, mwv vnyw camnyi leq nywng go akamnum, hoo mwv Jerusalemho vnyw camleq nywx go pvvb bwwl doognum. Mwwg annwg eminv Jerusa, Jadokg nyem kov.

³⁴‍Hoo mwv At Swg vnyiq kaagaho hoggv aldvn ham nyinum, mwwg ab Ujjiyag nyinam hvb mwv hog mwlwngam nyinum.

³⁵‍Hvbmabde puutu aoho xumk nam tulungam mvpaq maanum. Nyiilungv hvraqb pwr aky tulungam la aky jinam mam puutu aog xumk nam tuluho jidul doonum. Mwv At Swg odum daiyag toggoqkam pwnum.

³⁶‍Jotamwg asaq nyinam mwlwngam hoo mwwg hoolu deedy nyinam mam, kaato, hoq tulu ham Judag Lvpw at tulug Nwd Kitap xeqp ko ho xeqp maap nvi yv?

³⁷‍Hoq moodho At Sw Siriyag lvpw at Rejinnvn kanam namrabnam hoo Remaliyag ko tuup Peka Judangam ceekol nyob panum.

³⁸‍Jotam mwwg ab tulug sinam hvb siknum hoo mwwg ab tulug lvgab Debidg bopam ho liiknum, hoo kwlib mwwg ko tuup Ahaj pvvb bwwl doognum.