Read Nyishi 2 LVPW ATWG 16 Bible Online

2 LVPW ATWG 16 - Nyishi bible

2 LVPW ATWG 16

¹Remaliyag ko tuup Peka vnyw camleq kvn go swwyikho, Judag lvpw at Jotamwg ko tuup Ahaj pvvb bwwl doorab gvnum.

²‍Hwdlo mwv pvvb bwwl doorab gviyikho, Ahaj vnyw camnyi go akamnum, hoo mwv Jerusalemho vnyw camleq nywx go pvvb bwwl doognum. Hoo mwv At Swg vnyiq kaagaho hoggv aldvn mwwg ab Debidg nyinam ham nyimanum,

³‍hvbmabde mwv Israelwg lvpw at tulu nyinam wnam hvb nyinum. Hiyvg nyob tulungam At Sw Israelwg nyiilu aga hoqgv ruqpaqnam nyob tulug bulum-kac dvb nyinam hvb mwv mwwg atwg ko tuupam wm parl aky jinum.

⁴‍Hoo mwv puutu aog xumk nam tuluho hoo yorn yorxho hoo jeenbo svvn nywxwg niikum ho pwram la akiam jinum.

⁵‍Ho Siriyag lvpw at Rejin la Israelwg lvpw at Remaliyag ko tuup Peka Jerusalemb wnv nyob panum, hoo bulv Ahajnvn doqyumnum hvbmabde mwam mviyal munyiub nyomanum.

⁶‍Hoq moodho Siriyag lvpw at Rejin Elatam Siriya gab nookur kunum hoo Juda nyi tulungam Elat hoqgv ruqpaqnum, hoo Idom nyi tulungv Elat ho haanum, ho soolo xaqb bulv hoqho doodwn.

⁷‍Hoqgab Assiriyag lvpw at Tiglat-pilesernvn Ahaj nyi kanaml pui bilwql begamv, “Ngo noqg nyerangv hoo noqg ko tuupv. Siriyag lvpw at gvla Israelwg lvpw atwg alaq hoqgv ngam haal hoo ngam ywwlin tvb, hoggab bulv ngam nyob podul doodo.”

⁸‍Ahaj At Swg dvrwq namlo hoola lvpw atwg nombu ho rupam hoo hunam gumn kaapanam mam mwv Assiriyag lvpw atam akib jilwqnum.

⁹‍Hoo Assiriyag lvpw atv mwam tanum. Assiriyag lvpw atv Damaskasam ceekol nyob panum hoo ham naaknum, hoo hoqg nyiilungam Kirwb nyumwb boonum, hoo mwv Rejinnvn mengnum.

¹⁰‍Hwdlo Lvpw at Ahaj Assiriyag lvpw at Tiglat-pilesernvn Damaskas ho wrwq yukho, mwv Damaskaswg yugwngam kaapanum. Hoo Lvpw at Ahaj nyub Uriyanvn yugwngam mwiyw-mvcnam mam kanamnum, hoo hoqhvb nyin boam hoo hog mwlwngam rwmwq twqb betamnum.

¹¹‍Hoo nyub Uriya yugwngam Lvpw at Ahajwg Damaskas hoqgv kanam nvmlwqnam hvb jaq mvnum, ho ham nyub Uriya, Lvpw at Ahaj Damaskas hoqgv hvvc maatab mvnum.

¹²‍Hoo lvpw atv Damaskas hoqgv haanum, lvpw atv yugwngam kvviyiq-kaaxeqnum. Ho lvpw atv yugw ogumb haanum hoo hoq aob caonum

¹³‍hoo mwwg boyuqnam akiam la mwwg dvs akiam hoo twws akiam hoo mwwg swrso gab hijum akiam yugw aoho aky jinum.

¹⁴‍Hoo mwwg yugw gvla At Swg dvrwq namlo pengko hoqgv At Swg agaho tama yugwngam nam haaga hoqgv naaginum, hoo ham nyoodum daiyag mwwg yugw ho pvvnum.

¹⁵‍Hoo Lvpw at Ahaj nyub Uriyanvn gaml jil begamv, “Hoq koibo yugw ho arwg boyuqnam akiam hoo ariyumg dvs akiam hoo lvpw atwg boyuqnam akiam hoo mwwg dvs akiam nyiilu mwlwg boyuqnam akiam parl dooto, hoo bulug dvs akiam hoo bulug twws akiam jito. Hoo hoqho boyuqnam hijum mam hoo pwr jinam hijum mam hurp jito, hvbmabde tama yugwngam ngoqg xumk gab doom to.”

¹⁶‍Lvpw at Ahajwg gaml jik jaqb, nyub Uriya soq mwlw sam nyinum.

¹⁷‍Hoo Lvpw at Ahaj daqtam dvb yarpnam tulungam la moomiq-losuq pagam mam mvpaqnum, hoo hvvbam tama lvgab mwiyw-mvc tvl iss hengkum mvdwb joopko hoqgv naapaq tvl hoqho wlwngam diilwqnum.

¹⁸‍Hoo nam uraho Doonu aalam wiyiq ko lamtangam mvpaqnum hoo At Swg namlo ho lvpw atwg vpwb haak haagangam mutumnum, hoggab Assiriyag lvpw atam paqk dvb hvl soq mwlw sam nyinum.

¹⁹‍Ahajwg asaq nyinam mwlwngam Judag Lvpw at tulug Nwd Kitap xeqp ko ho xeqp maap nvi yv?

²⁰‍Ahaj mwwg ab tulug sinam hvb siknum hoo mwwg ab tulug lvgab Debidg bopam ho liiknum, hoo kwlib mwwg ko tuup Hejekiya pvvb bwwl doognum.