Read Nyishi 2 LVPW ATWG 17 Bible Online

2 LVPW ATWG 17 - Nyishi bible

2 LVPW ATWG 17

¹Judag lvpw at Ahaj vnyw camleq nywnyi go swwyikho, Elag ko tuup Hosiya Samariya ho Israelam pvvb bwwl doorab gvnum, hoo vnyw kiya go mwv pvvb bwwl doognum.

²‍Hoo mwv At Swg kaagaho hoggv almadwn ham nyinum, Mwwg otuqho Israelwg lvpw at tulug nyimanam mam nyinum.

³‍Assiriyag lvpw at Salmaneser mwam ceekol nyob patab haanum. Hoo Hosiya mwwg nyerab nyinum hoo mwam nyooga jinum.

⁴‍Hvbmabde Assiriyag lvpw atv Hosiyag xaalyonam mam kaapanum, hoggab mwv Ijipt gv lvpw at Sonvn pui baqn bo tulungam kanam tvl hoo vnyw-vnywngam Assiriyag lvpw atam nyooga jinam mam jik maanum. Hoqgab Assiriyag lvpw atv mwam mutum kunum hoo pvtwq uraho tumpnum.

⁵‍Ho Assiriyag lvpw atv gvda mwlwngam nyob panum hoo Samariya ho haanum, hoo vnyw nywum go hoq ham mwv doqyuml apnum.

⁶‍Hosiyag vnyw kiya go swwyikho, Assiriyag lvpw atv Samariyangam naareqnum, hoo mwv Israelwg nyi tulungam Assiriyab bool wgnum hoo bulam Hala ho, hoo Habor ho, Gojan pobu ho, hoo Medes bopam tuluho pvvl apnum.

⁷‍Hoo soq sib nyinam si hvbnyiloqkam Israel nyiilungv bulam Ijipt gvdag Ijipt gv lvpw at Paro hoqgv boolin bo bulug Pwnbo At Swn ceekol nyic nyigam gab nyinum, hoo asaq pwnbo tulungam bos sogam gab

⁸‍hoo Israelwg nyiilug aga hoqgv At Sw ruqpaqnam nyob tulug nyij-mujam nyigam gab, hoo Israelwg lvpw at tulug nyicwngam nyigam gab nyinum.

⁹‍Hoo Israel nyiilungv hoggv kvtaq maadwn ham kvsil bulug Pwnbo At Swn ceekol nyic nyinum. Rvkil dook soja hoqgv bopamg gurum namgub bulv atgab koibo xumk nammam bulug pamda tuluho mvnum.

¹⁰‍Bulv bulug atgab murty tulungam hoo yorn yorxy ho hoo jeen bo svvn nwwxig niikum ho Aserim mvl apnum,

¹¹‍hoo hiyam At Sw bulug aga hoqgv mvpaqnum nyob tulug nyinam hvb bulv puutu aog xumk nam tuluho aky jinum. Hoo bulv nyic-nyia pagoq tulungam nyil At Swg haaxaq dvb hang nyiluqnum,

¹²‍hoo bulv murty tulungam xumnum hogloq ham At Sw bulam benum, “Nulv soq sam nyimabv.”

¹³‍Hvbsujaqkam At Sw Israelam la Judangam nyiqry benbo tulungam hoo nyig-wg boam kanam tvl begamv, “Nulug ab tulungam ngo pvvb gaml jinam hvb, nulug almab nyinam hoqgv wkur to hoo ngoqg gamlam la pvvb tulungam pvvto, hoo ngoqg nyera nyiqry benbo tulungam ngo kanamnum.”

¹⁴‍Hvbmabde bulv tvjw maanum, bulug ab tulungv bulug Pwnbo At Swn mwwjw maab nyinam hvb bulv tamil mwwjw maanum.

¹⁵‍Bulug ab tulu lvgab mwwg birwl pvvb mvnam mam hoo bulam mwv beo-belamnam mam hoo mwwg pvvb tulungam haqpaqnum. Bulv xaalyo bo murty tulungam wmin gvnum hoo xaalyo bob nyiknum, hoo hiyvg pagoqkam At Sw bulam gaml jil bulam bulug nyinam hvb nyima bvk hvl benum, hvbmabde bulug diis-paap ho nyob tulug nyinam hvb bulv nyinum.

¹⁶‍Hoo bulug Pwnbo At Swg gaml tulungam apaqnum, hoo bulv atv dvvcw hoqgv svv ko dornyig guss tulungam mvnum; hoo bulv Asera ak mvnum hoo doonyi-pool takaram xumnum hoo Baal gab bon nyijnum.

¹⁷‍Hoo bulug ko tuup tulungam hoo bulug nyem ko tulungam bulv boyuql aky jinum hoo nyioky hiql hoo pwp-pocu cwwl koql kaanum hoo At Swg kaagaho bulv atv puqpaq sunv, mwam haaxaq dvb hang nyiluqnum.

¹⁸‍Hoqgab At Swg Israelam vcjaqb haaxaqnum hoo bulam mwwg kaaga hoqgv mvpaqnum. Akkam apaq maanum hvbmab Judag nyob arongv doonum.

¹⁹‍Juda ngvkam bulug Pwnbo At Swg gamlam pvvmanum, hvbmabde Israelwg nyij-muj nyil wkwb wmin gvnum.

²⁰‍Hoo At Sw Israelwg hotam tulungam haqpaqnum hoo bulam hentwr hemnum hoo bulam mwwg kaaga hoqgv hurpaq kunv bulam ceebio tulug alaqho jilwqnum.

²¹‍Hwdlo mwv Israelam Debidg nombu hoqgv mvpin yukho, bulv Nebatwg ko tuup Jeroboamnvn lvpw at gob mvnum. Hoo Jeroboam Israelam At Swn wmin gvm mvmab booxar kunum hoo bulam koijaqb nyic nyimnum.

²²‍Israel nyiilungv Jeroboamwg nyic nyinam tulu ham nyinum. Bulv hoq tulu hoqgv wleq maanum,

²³‍Mwwg nyiqry benbo tulungam mwv bemnam hvb, At Sw Israelam mwwg kaaga hoqgv mvpaqnum. Hoqgab Israelam bulug at gvda hoqgv Assiriyab nyumwb boomnum, ho soq aal namgub bulv hoqho doodwn.

²⁴‍Hoo Assiriyag lvpw atv Bebilon hoqgv, Kuta hoqgv, Abba hoqgv, Hamat hoqgv, hoo Separbaim hoqgv nyiilungam boolayil, hoo Israelwg nyiilu kwlib bulam Samariya bopam tuluho pvvnum. Hoo bulv Samariyangam gumn naaknum hoo hoq bopam tuluho bulv doonum.

²⁵‍Hoo bulv hoqho doorab yukho, bulv At Swn bos maanum. Hoqgab At Sw sony nyot tulungam kanam tvl bulug pengko hoqgv nyi tuugin mengmnum.

²⁶‍Hoqgab Assiriya lvpw atam betamnum, “Noqg nyob tulungam nyumwb booronam ho hoo Samariya bopam tuluho gvdag pwnbog pvvbam cengmanum. Hoqgab mwv sony nyot tulungam bulug pengko ho kanamnum, hoo kaato, sony nyot tulungv bulam mingdu do, hoggab bulv gvdag pwnbog pvvbam cengma ko-gab.”

²⁷‍Ho Assiriyag lvpw atv gaml jinum, “Hiyam nyumwb booknum ak gon nyub ak gon kanam to, hoo mwam wwm to hoo hoqho doogw tvl hoo gvdag pwnbog pvvbam bulam tomswr mvto.”

²⁸‍Hoqgab bulv Samariya hoqgv nyumwb boonam nyub ak haanum hoo Betel hoo doonum hoo hoggub At Swn bos tayin ham bulam tomswrnum.

²⁹‍Hvbmabde nyob luuxiv hvraqb bulug atwg pwnbo tulungam pwnum hoo Samariya nyi tulungv puutu aog xumk nam mam mvnam ho apnum, ho bulug bopam dootaq mwlw ho, nyob luuxiv at-atwg murtiam mvnum.

³⁰‍Bebilon nyi tulungv Sukkot-benotangam mvnum, Kut nyi tulungv Nergalam mvnum, Hamat nyi tulungv Asimangam mvnum,

³¹‍hoo Abba nyi tulungv Nibaj la Tartakngam mvnum; hoo Separbai nyi tulungv bulug ko tulungam Adrammelek la Anammelekngam pwr jinum, soq tulu si Separbaimwg pwnbov.

³²‍Bulv At Swn bosnum hoo bulug kwlib puutu aog murty tuluho pwr jim dvb, bulug pengko hoqgv bulv atv nyiilu gotwq boolo puutu aog xumk nam tulu gab nyubwb xuqnum.

³³‍Hoqgab bulv At Swn bosnum hvbmabde bulug nyumwb booknam nyob tulug nyinam hvb bulug pwnbo tulungam kam xumnum.

³⁴‍Soq aal namgub bulv kolwg nyicwb nyil doodwn. Bulv At Swn bos maanum, hoo At Sw hiyam Israel hvl eminam Jakubg ko tulungam gaml jinam nyij-mujam ho gaml tulungam ho pvvb tulungam bulv nyil wmanum.

³⁵‍At Sw bulug lvgab bulam gaml jinum, “Nulv asaq pwnbo tulungam bosmabv ho nulv atv bulam xumabv ho bul gab bon nyimabv ho bulam pwr jimabv,

³⁶‍hvbmabde nulv At Swn bos tayin, hiyv nulam Ijipt gvda hoqgv mwwg huqlw ngvla laqpo atorv naalinum. Nulv atv mwam pvxwl xumtayin, hoo mwam nulv pwr jitayin.

³⁷‍Hoo nulgab nyij-muj tulungam hoo gaml tulungam hoo pvvb tulungam xeqknam ham, nulv lwxiam hengab jaqb nyito. Nulv asaq pwnbo tulungam bos maabv.

³⁸‍hoo ngoqg nulug lvgab pvvb birnam mam nulv mwwpa maab nyimabv. Nulv asaq pwnbo tulungam bos maabv,

³⁹‍hvbmabde nulug pwnbo At Swn nulv bos tayin, hoo nulug ceebio tulug alaq hoqgam mwv nulam naalin tayin.”

⁴⁰‍Hvbsujaqkam, bulv tamanum, hvbmabde bulug otuqg nyicwb bulv nyinum.

⁴¹‍Hoqgab soq nyob tulu si At Swn bosnum hoo bulug pwnam guss tulungam kam bulv xumnum. Bulug ko tulungv hvbkalam nyinum, hoo bulug koog ko siqdangv hvb nyinum—bulug ab tulungv nyinam hvb soq aal namgub bulv nyidu dvn.