Read Nyishi 2 LVPW ATWG 19 Bible Online

2 LVPW ATWG 19 - Nyishi bible

2 LVPW ATWG 19

¹Lvpw at Hejekiya hoqham tapa twqda kalam, mwv mwwg vjam twqjornum hoo mwv atv tuila vj lvgab tomlup tvl At Swg dvrwq namlob wnum.

²‍Hoo imiq dvparam kaaya bo Eliyakimnvn, hoo svkretvri Sebananvn, hoo axabo nyub tulungam tuila tomlup tvl, Amojwg ko tuup nyiqry benbo Aijaya dookub mwv kanamnum.

³‍Bulv mwam benum, “Soq sib Hejekiya bedo, soq aal si vs-axaq aalv, yolu ruqnam aalv, hoo ximanam aalv; ko tulungam bwwlin twqsvb nyipa ku, hvbmab ham bwwlin dvb ator dook ma.

⁴‍Noqg Pwnbo At Sw Rabsakeg gomcwr tulungam tapa kamyi nvpv, hiyam mwwg nyiit at Assiriyag lvpw at swwl doonbo Pwnboam bej-bepar mvdwb kanam paku, hoo noqg Pwnbo At Swg gomcwr tapanam tulungam yolu ruqtayin; hoqgab boumnam nyiilu gab noqg swgwnam mam nyirab to.”

⁵‍Hwdlo lvpw atv Hejekiyag nyera tulungv Aijaya dookho haanum,

⁶‍Aijaya bulam benum, “Nulug nyiit atam beta, ‘Soq sib At Sw bedo: hoggab nulug gomcwram tapa kunam ham bos maabv, Assiriyag lvpw atwg nyera tulungv ngam benyi-beya paku.

⁷‍Kaato, ngo mwam yal ak jilwqtayin, ho mwv xwwk-xwwyanam gon ak tapa tayin hoo mwwg gvdab wkur tayin, hoo mwwg atwg gvdaho ngo mwam lyoqr orioq niqtuqb haam dvb mvtayin.’”

⁸‍Rabsake hookurnum, hoo Assiriyag lvpw atv Libnangam ceekol nyob podul doonam mam kaapanum, hoggab Lakisam lvpw atv apaq paku hvl mwv tapanum.

⁹‍Lvpw atv Kuswg lvpw at Tirhaka pagoqkam tapanum, “Kaato, mwv nam ceekol nyob pata duku.” Hoqgab mwv Hejekiyanvn lokta pui baqn bo tulungam kanam nvmlwql begamv,

¹⁰“Soq sib Judag lvpw at Hejekiyanvn betayin: ‘Jerusalem mam Assiriyag lvpw atwg alaqho jilwqram hvl hiyam noqg mwwjwnam Pwnbov nam xaalyob dingrnam mam mwwjw maabv.

¹¹‍Kaato, Assiriyag lvpw atv gvda mwlwngam hoggub nyinum ham no atv tapa paku, Bulam twrkiq-twrmal twryumnum. Hoo nam ywwlin yin yv?

¹²‍Noqg ab tulungv twryumnam nyob tulungam, Gojan, Haran, Rejep, hoo Telassar ho doonbo Iden nyiilungam pwnbo tulungv bulam ywwlin gvn bai yv?

¹³‍Hogloq ho Hamatwg lvpw atv, Arpadwg lvpw atv, Separbaimwg bopam hoqg lvpw atv, Henag lvpw atv, ho Ibbag lvpw atv doodwn?’”

¹⁴‍Hejekiya potangam pui baqn bo tulug alaq hoqgv nvvrwq layil hoo ham poorynum; hoo Hejekiya At Swg dvrwq namlob wnv At Swg agaho taapurl ap jinum.

¹⁵‍Hoo Hejekiya At Swg agaho swgwl hoo benum: “Israelwg Pwnbo At Swa, cerubimwg aoho pwqlw dootam ho doon boa, no Pwnbov, no aro twq swcw nvg ao soqg lvpw atv; no swcwngam la nyodongam bvl pwnbov.

¹⁶‍Noqg nyurungv tagab tvbv, At Swa, hoo tagab tvbv; At Swa, noqg vnyiqkv nyiqbio to, hoo kaato; hoo Sennakeribg gomcwr tulungam taka suto, mwv swwl doonbo Pwnboam bej-beparl bilwq paku.

¹⁷‍Jvqtw jaqb, At Swa, Assiriyag lvpw at tulungv nyob tulungam la bulug gvdangam dooxa dukub mvpa ku

¹⁸‍hoo bulug pwnbo tulungam wmho joolwq paku, hoggab bulv jvqtw pwnbo ma, hvbmabde nyi tulug alaq hoqgv bonam nyinam wlw-wswngv. Hoqgab bulam twryumnum.

¹⁹‍Hoqgab sija, ngulug Pwnbo, At Swa, ngulam anya mwwpal mwwg alaq hoqgv ywwlin tvbv, At Sw no aro twq Pwnbov hvl swcw nvg lvpw-haty tulungam cengm to.”

²⁰‍Ho Amojwg ko tuup Aijaya Hejekiyanvn pui kanaml begamv, “Soq sib Israelwg Pwnbo, At Sw bedo: Noqg ngam Assiriyag lvpw at Sennakerib gab swgwnam mam ngo tapa paku.

²¹‍Soq sib At Sw mwwg pagoqkam gomcwr goopa ku: “Jaiyonwg mvvngam nyem koam— mwn nam xaalyonam, mwn nam benyi-beyanam; Jerusalemwg nyem koam— mwnwg dumpongv nam dumpwq kwtwql moiyeq do.

²²“Hiyam no bej-beparl hoo oyum pakun? Hiyam no ceekol no gamtor jaqb goonum hoo noqg vnyiqkv puutu tulug xumk nammam koodu paku? Hoq ak hv Israelwg Dvrwqbo Akam ceekonum!

²³Ho noqg pui baqn bo tulu hoqgv no At Swn bej-bepar paku, hoo no benum, ‘Ngoqg naleq ceriot tulu lvgab ngo puutu tulu aob ngo caapa ku, ho Lebanon puutu ao namgub caanum; ngo mwlwngam ao yaan bo sidar tulungam kwrtabnum, hoqg mwlwngam alyanbo saiprass tulungam kwrtabnum; ngo mwlwngam ura yaak dook nyook ho, ho mwlwngam aaxy xeebin yaak nyoro ho haanum.

²⁴Ngo sokum hengnum hoo nyoodog issam twwnum, hoo ngoqg lvpia hoqgv Ijipt gv pobu kucw tulungam pwtw dvb cvvpnum.’

²⁵“Ngo sam otuq hoqgv mwol apnum ham no tapa maan mvi yv? Hoggv sija ngo nyim tag dvn sam, kol mood hoqgv mwol apnum, ho no gurum nwqtumnam bopam tulungam yaqpia-yaqya bo hwwpum gob mukub tayin,

²⁶hoqho doonbo nyi tulungv ator dooma maanum, ho mooka-saq kunv hoo mwwdar-mwwpar maanum, hoo nyorog svvn hvb, nwmw jurlin bo hvb nyinum, nam mwwlo ho nwmw buqlin boam swwrab maatab simnam hvb nyinum.

²⁷“Hvbmabde noqg doal doodunam mam hoo noqg lvvgwb lengnam mam la urab haanam mam, hoo noqg vc loodab ngam ceekol hang lengnam mam ngo cengdo.

²⁸Hoggab no ngam vc loodab ceekol hang lengdwn hoo noqg atv larnam mam ngoqg nyuru si hvvc paku, Noqg nyupum ho ngoqg vkaram ngo haqgab tayin hoo noqg agam ho ngoqg swwxiam vlwq tayin, hoo noqg lamta haakwb ngo nam wkur mvtayin.

²⁹“Hoo soq si nam kaacin dvb nyitayin: soq vnyw so hoggv atv swwlin boam dvtayin, hoo vnyw nywgwn oso hoggv dug pool ho mwlwqnam mam dvtayin. Ho nywum deen vnywngam vly liitayin hoo vly naatayin hoo roo boolungam liilwq tayin, hoo hoq aaxiam dvtayin.

³⁰‍Hoo Judag nombu ho boumnam tulungv rwbv ura jaqb hurlwq yukam aongv aljaqb aaxy xeenam hvb nyidwn.

³¹‍Hoggab Jerusalemho boumnamv dootayin, hoo Jaiyon puutu ho nyi acam go doom tayin. At Swg mwwbil nyinwnam mam soq sam nyitayin.

³²“Hoqgab soq sib At Swg Assiriyag lvpw atwg pagoqkam bedo: Mwv soq bopam so haanyi ram ho uppuq abnyi ram, ho svtam koolayil haanyi ram ho ham ceekol naareq nyoram.

³³‍Hogloq lamtab mwv haanum, mwv hoq lamtab wkur taikun, hoo mwv soq bopam uraso haanyi ram, At Sw bibwqdo.

³⁴‍Hoggab ngoqg atwg emin gab hoo ngoqg nyera Debidg emin gab, ngo soq bopam sam ceetorl hoo ywwlin tayin.”

³⁵‍Hoo At Swg gumtwngv ai wnv Assiriya svmcw hoqgv 185,000 go nyiam mengnum. Hoo hwdlo nyiilungv ar komc gorabl kaanamv svmcw dook ho svma rooxo tvl doonum.

³⁶‍Assiriyag lvpw at Sennakerib wleqnum hoo nammwb wknum hoo Nenibi ho dooknum.

³⁷‍Hoo mwwg pwnbo Nisrokwg xumk namho mwv xumdul dooikam, mwwg ko tuup Adram-melek la Sarejar mwam lyoqr orioq hoqgv patabnum hoo Araratwg gvdab kilwqnum. Mwwg kwlib mwwg ko tuup Esarhaddon pvvb bwwl doognum.