Read Nyishi 2 LVPW ATWG 20 Bible Online

2 LVPW ATWG 20 - Nyishi bible

2 LVPW ATWG 20

¹Hoq moodho Hejekiya vcnum hoo sisv twqb nyinum. Hoo Amojwg ko tuup nyiqry benbo Aijaya mwwg dookub haanum hoo mwam benum, “Soq sib At Sw bedo, ‘Noqg nam mam anya jaqb mvdar-mvparto, hoggab no sita yuku, no al kuram.’”

²‍Ho Hejekiya gurum daiyab mwwg nyuqm mam nywwkur tvl hoo At Swn swgwl hoo begamv,

³“At Swa, sija anya mwwpa gvdwl ngo hoggub noqg agaho dengky jaqb ngoqg hvvjw-hara lvgab wl yvknum, hoo hognvkv noqg kaagaho aldvb nyil yvknum hoq tulu ham mwwpa labka.” Hoo Hejekiya vcjaqb xabnum.

⁴‍Hoo Aijaya nam ra lvpa hoqgv wleq kunum, ho At Swg gomcwrv mwam haanum:

⁵“Wkur gvdwl ngoqg nyiilug nyiilo bo Hejekiyanvn beta, soq sib noqg ab Debidg Pwnbo, At Sw bedo: ngo noqg swgwnam mam tapa paku; ngo noqg nyiqs dinam mam kaapa paku. Kaato, ngo nam mwp tayin. Aal loum deenam no At Swg dvrwq namlob wtayin,

⁶‍hoo ngo nam vnyw camleq nywng gota swwgam vbw jitayin. Ngo nam la soq bopam sam Assiriya lvpw atwg alaq hoqgv naalin tayin, hoo soq bopam sam ngoqg atwg emin gab la ngoqg nyera Debidg emin gab ceetor tayin.

⁷‍Hoo Aijaya benum, “Taoq aaxy hoqgv seenam wtw loq ak bwa to. Hoo hoq tulu ham hil pwp aoho puulwqto, ho mwv al taikun.”

⁸‍Hoo Hejekiya Aijayanvn benum, “Ngam At Sw mwp pakun hvl hoggv ngam kaacin dvb nyitayin, hoo At Swg dvrwq namlob ngo aal loum deenam mam wdwb nyitayin yv?”

⁹‍Hoo Aijaya benum, “Soq sib At Sw mwwg dingr kunam mam nam kaacin mvdwb swrdorxeq ak At Sw nyijtayin: vbia pakapho yal bobongv pakap kvbyw go otuqb, ho pakap kvbyw go kokwb wkur-wxeq tai nvi yv?”

¹⁰‍Hoo Hejekiya birwqnum, “Yal bobongv pakap kvbyw otuqb wco dvn. Hvbmabde pakap kvbyw kokwb wkur nyok maadwn.”

¹¹‍Hoo nyiqry benbo Aijaya At Swn goqnum, hoo Ahajwg pakapho pakap kvbyw go yal bobo wk boam mwv yal bobongam pakap kvbyw go wkur mvknum.

¹²‍Baladanwg ko tuup Merodak-baladan Bebilonwg lvpw atwb swwd moodho hvvky pootam lvgab potangam la aky ak jilwql kanamnum, hoggab mwv Hejekiyag vc pekul hoo alkunum mam tapanum.

¹³‍Hoo Hejekiya bulam hempwl svgagvrwqnum, hoo mwv bulam mwwg gumn noosungam kaakinum, rupam, hunam, duiyup-twwgapam, xinam kutiam, mwwg nwwxo svtam illy-uppuq mwlwngam, mwwg pvvkuml apko nam tulu hoqg kaapanam mwlwngam kaakinum. Bulam mwwg noosu uraho, lvpw-haty ho Hejekiyag kaakin maanam hog akkam dook maanum

¹⁴‍Ho nyiqry benbo Aijaya lvpw at Hejekiya dookub haanum, hoo mwam benum, “Hoggv soq nyi tulu si bede? Hoo hogloqkv bulv haanum?” Hoo Hejekiya benum, “Bulv aado kiyo Bebilon nyook hoqgv ngoqg dook si haanum.”

¹⁵‍Mwv benum, “Hog nvkv bulv noqg namho kaanum?” Hoo Hejekiya birwqnum, “Ngoqg nam uraho hog mwlw doon boam bulv kaapa ku; ngoqg noosu tulug uraso bulam kaakin maanam hog akkam dookma.”

¹⁶‍Ho Aijaya Hejekiyanvn benum, “At Swg gomcwr sam tato:

¹⁷‍Kaato, aalv hoodu do, noqg noosu uraho doonbo mwlwngam, hoo soq aal nagub noqg abwg noosu tulu uraho gumn-ran doognam mam Bebilonwb baqtayin. Hog akjijaqkam dookram, At Sw bedo.

¹⁸‍Hoo noqg atwg ko tuup tulu gon, hiyv nulug hoqgv haata boam bulam nyumwb bool wgtayin, hoo Bebilonwg lvpw atwg lvpw-haty ho nyiipium nyiib nyitwl bulam bon nyim dvb pvvtayin.”

¹⁹‍Ho Hejekiya Aijayanvn benum, “At Sw nam gomcwr goonam hv alpa.” Hoggab mwv mwwgamv, “Swrso bvla bos haai maab ngoqg swwca so dooinvp mwwnum?”

²⁰‍Hejekiyag asaq nyinam mwlwngam, hoo mwwg atornam mam hoo hoggub mwv sviyin hingtuml bopam urab iss boanum hoqg nyinam mwlwngam, Judag Lvpw at tulug Nwd Kitap xeqp ko ho xeqp maap nvi yv?

²¹‍Hoo Hejekiya mwwg ab tulug sinam hvb siknum, hoo mwwg kwlib mwwg ko tuup Manasse pvvb bwwl doognum.