Read Nyishi 2 LVPW ATWG 21 Bible Online

2 LVPW ATWG 21 - Nyishi bible

2 LVPW ATWG 21

¹Hwdlo Manasse pvvb bwwl doorab gviyikho, mwv camleq nywnyi go akamnum, hoo mwv Jerusalemho vnyw camng leq nywng go pvvb bwwl doognum. Mwwg ann hoqg eminv Hepjiba.

²‍Hoo mwv At Swg kaagaho hoggv almadwn ham nyinum, ho hiyam At Sw Israelwg nyiilu aga hoqgv ruqpaqnum nyob tulug bulum-kac dvb nyinam tulu hvbjaq nyinum.

³‍Hoggab mwwg ab Hejekiya puutu aoho mvpia kunam xumk nam tulungam mwv mvdarnum, hoo Baal la Aserag yugw tulungam Israelwg lvpw at Ahabwg mvnam mam mwv diirabnum, hoo doonyi-pool takaram mwlwngam xumnum hoo bul gab bon nyijnum.

⁴‍Hoo hogloq ho, “Ngoqg eminam Jerusalemho ngo pvvtayin hvl At Swg bek ho.” At Swg dvrwq namlo ho mwv yugw tulungam mvpnum.

⁵‍Hoo At Swg dvrwq namlo urag haaga vnyi gon ho mwv doonyi-pool takarg yugw tulungam mvpnum.

⁶‍Hoo mwwg ko tuupam boyuqnam aky gob mwv jinum hoo sootu tul hoo pwp-pocu ciil-koql hoo nyioky nyub lvgab gwwlyw jaqb nyinum. Mwv At Swg kaagaho koi jaqb almanam nyil mwam haaxaq dvb hang nyiluqnum.

⁷‍Hoo mwwg Aserag guss sam mvnam mam mwv At Swg dvrwq namlo ho pvvnum, hogloq ham At Sw Debidnvn la mwwg ko tuup Solomonnvn benum, “Soq nam so, hoo Jerusalemho ngo Israelwg nyob tulug pengko hoqgv daalin pakun, ho ngoqg eminam nwrba gob pvvtayin.

⁸‍Hoo bulv ngoqg gaml jinam tulu ham la, hoo ngoqg nyera Mojesg bulam Pvvb jinam tulu ham hengab jaqb nyib nyiloqkam, bulug ab tulungam ngo gvda jiknam hoqgv ngo Israelam asaq gvdaho gaqkarl yvm kuram.”

⁹‍Hvbmabde bulv tamanum, hoo At Sw Israel nyiilug agaho hiyam twryumnam nyob tulungam laabo yaab almab nyignv bulam Manasse gaqxar gvnum.

¹⁰‍Hoo At Sw mwwg nyera tulu nyiqry benbo tulungam benum,

¹¹“Hoggab Judag lvpw at Manasse soq bulum-kac dvb nyinam tulu sam nyinum hoo mwwg otuqho swwn bo Amor nyi tulungam laabo yaab almab nyinum, hoo mwwg murty tulungam xumnam lvgab Judangam kam nyic nyim paku,

¹²‍hoqgab, soq sib Israelwg Pwnbo At Sw bedo: Kaato, nyiicwr-cwrxiv hiyvg nyurungv ham tapa bov hvi-gwri daqdwb ngo Jerusalem mam la Judangam ciqcaq-bviyaqkam haam tayin.

¹³‍Hoo Samariyangam mvnam hvb ngo Jerusalem mam mvtayin, hoo Ahabwg nombungam mvnam hvb mvtayin, hoo dupum-dvrab pam hwrxaqnam hvb Jerusalem mam ngo hwrxaq tayin, ho ham hwrxaq tvl likubl ap tayin.

¹⁴‍Hoo ngoqg otu boumnam ham ngo ludum tayin hoo bulam bulug ceebio tulug alaqho jilwq tayin, hoo bulug ceebio tulug mwlw gab bulv mengnam ak bvla muiyu-mvcanam ak gob nyitayin,

¹⁵‍hoggab bulug ab tulungv Ijipt hoqgv lingd aal hoqgv jaq soq aal namgub, bulv ngoqg kaaga lo hoggv almadwn ham nyipa ku hoo ngam haaxaq dvb hang nyiluq paku.”

¹⁶‍Hoq aoho, Jerusalem vtwr gon hoqgv vtwr gon namgub Manasse nyiisam nyiingam vijaqg ywlw twwnum, hoq lvgab Judangam nyic nyig paku, hoggv almadwn ham At Swg kaagaho bulv nyinum.

¹⁷‍Sija Manasseg asaq nyinam mwlwngam, hoo mwwg hog mwlw nyinam mam hoo mwwg nyic nyiknam mam, Judag Lvpw at tulug Nwd Kitap xeqp ko ho xeqp maap nvi yv?

¹⁸‍Hoo Manasse mwwg ab tulug sinam hvb siknum hoo mwwg boolu ho liiknum, Ujjag boolu ho, mwwg kwlib mwwg ko tuup Amon pvvb bwwl doognum.

¹⁹‍Hwdlo Amon pvvb bwwl doorab gviyikho, mwv camnyi leq nywnyi go akamnum, hoo mwv Jerusalemho vnyw nywnyi go pvvb bwwl doognum. Mwwg ann hoqg eminv Mesullemet, mwn Jotbag Haruj gv ko nyemv.

²⁰‍Hoo mwv At Swg kaagaho hoggv almadwn, mwwg ab Manasseg nyinam hvb nyinum.

²¹‍Mwwg abwg nyinam wnam hvb mwv nyin-wnum hoo mwwg abv murty tulungam xumnam hvb mwv xumnum.

²²‍Mwwg ab tulug Pwnbo At Swn, mwv apaqnum, hoo At Swg lamtab wmanum.

²³‍Hoo Amonwg nyera tulungv mwam hima bwwrabnum hoo mwwg namho lvpw atam mengnum.

²⁴‍Hvbmabde Lvpw at Amonnvn hima bwwl mengn bo nyi tulu ham gvda hoqg nyiilungv bulam mengpaqnum, hoo gvdag nyiilungv mwwg ko tuup Josiyanvn mwwg kwlib lvpw atwb mvknum.

²⁵‍Amonwg asaq nyinam mwlwngam, Judag Lvpw at tulug Nwd Kitap xeqp ko ho xeqp maap nvi yv?

²⁶‍Hoo Ujjag boolu ho mwwg nyubu ho mwam liiknum, hoo mwwg kwlib mwwg ko tuup Josiya pvvb bwwl doognum.