Read Nyishi 2 LVPW ATWG 22 Bible Online

2 LVPW ATWG 22 - Nyishi bible

2 LVPW ATWG 22

¹Hwdlo Josiya pvvb bwwl doorab gviyikho, mwv vnyw piin go akamnum, hoo mwv Jerusalemho vnyw cammum leq nywg pvvb bwwl doognum. Mwwg ann hoqg eminv Jedida, Bojkatwg Adaiyag ko nyemv.

²‍Hoo mwv At Swg vnyiq kaagaho hoggv aldvn mwwg ab Debidg nyinam wnam hvb nyinum, hoo mwv laqc-lvqbwqb wkub wxeq maanum.

³‍Vnyw camleq piin deenho lvpw at Josiya, lvpw atv Mesullamwg ko hosiq Ajaliyag ko tuup Sapan, At Swg dvrwq namlog svkretvringam kanaml begamv,

⁴“Nyub but Hilkiya dookub caan, ho At Swg dvrwq namlog haaga toggoqho daqg bo tulug nyiilu hoqgv twngkam nookumnam mam xika mvto.

⁵‍Hoo hoq tulu ham At Swg dvrwq namlongam kaal nyig boam jitwl hoo bonam nyinbo nyi tulug alaqho jim to, hoo ham At Swg dvrwq namlongam mvdarl bon nyinbo tulungam jim to

⁶‍(hoqhv svvtaq jem mvnbo tulungam, nam mvnbo tulungam, hoo simit mvnbo tulungam), hoo nammam mvdar nvdwb bulam svvtaqkam la wlwngam rvn mvto.

⁷‍Hvbmabde bulug alaqho twngk jilwqnam mam bulug hoqgv twngkam hwwkram, hoggab bulv jvqtw jaqb nyinum.

⁸‍Hoo nyub but Hilkiya svkretvri Sapannvn benum, “At Swg dvrwq namlo ura lo ngo Pvvb Kitap pam kaapa paku.” Hoo Hilkiya Sapannvn kitap pam jinum hoo mwv ham poorynum.

⁹‍Hoo svkretvri Sapan lvpw atwg dookho haanum, hoo lvpw atam puiyam betamnum, “Noqg nyera tulungv dvrwq namlo ho twngkam doon boam noojur layil hoo ham At Swg dvrwq namlongam bonam nyigbo alaqho jilwq peekun.”

¹⁰‍Ho svkretvri Sapan lvpw atam betamnum, “Nyub Hilkiya ngam kitap pam jinum.” Hoo Sapan ham lvpw atwg agaho poory jinum.

¹¹‍Hwdlo lvpw atv Pvvb Kitap hoqg gomcwr tulungam tapa yin, mwwg vjam mwv pumwq sunum.

¹²‍Hoo lvpw atv nyub Hilkiya nvla Sapanwg ko tuup Ahikam, nvla Mikaiyag ko tuup Akbornvn, la svkretvri Sapannvn, hoo lvpw atwg nyera Asaiyanvn gaml jil begamv,

¹³“Wn, ngoqgab, hoo nyiilu gab, hoo Juda mwlw gab kaapanum kitap hoqg gomcwr tulungam, At Swn tox ta. Hoggab At Swg hang lingtwrnamv ngulam koijaqb ceeko twqto, hoggab ngulug ab tulungv soq kitap so ngulam nyim dvb pagoq xeql apnam hvbjaq soqg kitap soqg gomcwr tulungam tvjw maanum.”

¹⁴‍Hoqgab nyub Hilkiya nvla Ahikam, hoo Akbornvn, hoo Sapan, hoo Asaiya, kamt vjam kaaya bo Harhaswg ko hosiq, Tikbag ko tuup Sallum nywxw nyiqry benbo Hulda dookub wnum (mwn Jerusalemwg Vnyi deen Namho doonum), hoo bulv mwnwg lvgab goonum.

¹⁵‍Hoo mwn bulam benum, “Soq sib Israelwg Pwnbo, At Sw bedo: ‘Nam ngoqg dookub kanam bo nyiam betam to,

¹⁶‍Soq sib At Sw bedo, kaato, Judag lvpw atv kitap hoqgv poory kunam gomcwr mwlwngam, ngo soq nyook so hoo soq so doonbo nyi mwlwg aoho ciqcaq-bviyaqkam haam tayin.

¹⁷‍Hoggab bulv ngam haqpaq paku hoo asaq pwnbo tulungam aky jil, ho bulv ngam haaxaq dvb bulug alaq hoqg bonam nyinamv hang nyiluq paku, hoqgab ngoqg hang lingtwrnamv soq nyook sam ceeko tayin, hoo hoq ham mwmiq laram.

¹⁸‍Hvbmabde At Swn tox mvdwb kanam bo Judag lvpw atam, no soq sib mwam betayin, soq sib Israelwg Pwnbo, At Sw bedo: noqg poorynam gomcwr tulug pagoqkam bedo,

¹⁹‍hoggab ngo soq nyook gab hoo hoqho doonbo nyi tulu gab ceeko yukam hoo bulv dooxa bo nyook gob hoo beenam gob nyitayin hvnam agam goonam mam hwdlo no tapayin, noqg hangv nyinyiaqnum, hoo no atv atam At Swg agaho yannum, hoo noqg vjam no atv pumwq sunum hoo ngoqg agaho xabnum, ngo kam noqg xabnam mam tapa paku, At Sw bibwqdo.

²⁰‍Hoqgab, kaato, noqg ab tulug dookho ngo nam bookum tayin, hoo noqg nyubu ho no swrsob hookum tayin, hoo soq nyook so ngoqg ciqcaq-bviyaq haam tanam mam noqg vnyiqkv kaapa ram.’” Hoo lvpw atam bulv gomcwram boqkur baqa jinum.