Read Nyishi 2 LVPW ATWG 23 Bible Online

2 LVPW ATWG 23 - Nyishi bible

2 LVPW ATWG 23

¹Ho lvpw atv pui kanamnum, hoo Juda la Jerusalemwg nyiixa tulungam mwwg dookho goqkumnum.

²‍Hoo lvpw atv At Swg dvrwq namlob wnum, hoo mwwg lvgab Judag nyi mwlwngv hoo Jerusalemho doonbo nyi mwlwngv hoo nyub tulungv hoo nyiqry benbo tulungv, nyiilu mwlwngv anyo ge hoo koi ge wnum. At Swg dvrwq namlo hoqgv Pvvb Birnam Kitap pam kaapanam hoqgv bulug tapa dvb mwv gomcwr tulungam poory jinum.

³‍Hoo lvpw atv swwrw lwkw ho daqnum hoo At Swg kokwb wdwb hoo mwwg gaml tulungam pvvdwb hoo mwwg nyij-mujam nyidwb hoo mwwg pvvbam mwwg hvvjw-haara hoqgv hoo mwwg yvj-yal hoqgv soq pvvb birnam kitap so xeqp kunam mam nyidwb, mwv At Swg agaho pvvb birnam mam mvnum. Hoo nyiilu mwlwngv pvvb bir ko ho nyiba mingnum.

⁴‍Hoo lvpw atv nyub but Hilkiyanvn hoo dvqsin bo nyub tulungam hoo haaga toggoqkam daqgbo tulungam, At Swg dvrwq namlo ura hoqgv Baal gab, Asera gab, hoo doonyi-pool takar tulu gab dupum-dvrab mvtwl apnam tulu ham agab baqlin tvk hvl gaml jinum. Hoo mwv Kidronwg rongo Jerusalem lvvgho hoq tulu ham wm rampaqnum hoo hoqg muiyam Betelwb baqnum.

⁵‍Hoo mwv Judag lvpw atv Juda la Jerusalem puutu aog xumk nam tuluho; hoo hiyam Baal gab, doonyi-pool gab hoo ao gumtw tulu gab hoo takar gab aky jim dvb xuqlinam nyub tulu ham mvpaqnum.

⁶‍Hoo mwv At Swg dvrwq namlo hoqgv Aserangam lvvgwb baqlinum, hoo ham Jerusalem lvvgwg Kidron kucwho baqlinum, hoo Kidron kucw ho ham wm rampaqnum hoo ham diimwrb nyidwb dwwmwq tvl hoo diimwram nyiisam nyiilug nyubu ho taapaqnum.

⁷‍Hoo mwv At Swg dvrwq namlo ho meqkarbo nyega tulug dook nammam mvpaqnum, hogloq ho Asera gab nyem tulungv vj cuml doonum.

⁸‍Hoo mwv Geba hoqgv Beerseba namgub puutu aog xumk nam tulu gab nyub xuqlin tvl aky jim dvb mvnam tulu, nyub tulungam Judag bopam hoqgv lvvgwb boolinum. Hoo bopamg nyiit rad, Josuag toggoq hoqg koibo haagag toggoq tulungam mwv mvpianum, hoqhv lok golo bopamg laqc daiyag toggoqho doonum.

⁹‍Hvbsujaqkam, puutu aog xumk nam gab nyub xuqlinam tuluhv Jerusalemho At Swg yugw lwkw ho caamanum, hvbmabde bulug vbw-bor pengko ho bulv opap kiilwq maanam wtwngam dvnum.

¹⁰‍Hoo Hinnomwg ko tuup Lywpa ho doonbo Topetngam mwv kacdvb mvnum, hoggab hoqho nyi tulungam mwwg ko tuupam ho mwwg nyem kongam Moleknvn boyuqnam aky gob jim kumanum.

¹¹‍Hoo Judag lvpw at tulungv At Swg dvrwq namlo haagaho svpur tulungam doonyi gab darxaqnam mam mwv mvpaqnum, hoqhv Natan-melek pwqlwngam doogbo ogumg pwqlwho doonum. Hoo mwv doonyi hoqg ceriot tulu ham wm lvgab rampaqnum.

¹²‍Hoo Judag lvpw at tulungv Ahajwg odum pwqlw ho yugw mvpnam tulungam, hoo At Swg dvrwq namlog baag vnyi ho Manasseg yugw mvpnam tulungam, mwv sapianum hoo ham vmwq gob mvnum hoo Kidron kucw ho hoqg diimwram joolwql joopaqnum.

¹³‍Hoo Israelwg lvpw at Solomonwg Jerusalemwg dou-cagag puutu aog xumk nam tulungam, nyooko daiyag twryumnam puutu ho Sidon nyi tulu gab Astoretngam, hoo Moab gab Kemosngam, hoo Ammon nyi tulu gab Milkomngam bulum-kac dvb xumb dvb mvp jinam mam lvpw atv kacdvb mvknum.

¹⁴‍Hoo mwv swwrw tulungam vmwq gob mvnum hoo Aserim pageqnum hoo bulug dook tuluho nyi alongam bwwr mvnum.

¹⁵‍Hoq aoho, Nebatwg ko tuup Jeroboam Betel puutu aoho yugw mvptvl Israelam nyic nyimnum, hoq puutu aoho doonbo yugwngam mwv pageqnum hoo wm rampaqnum, hoo ham diimwrb mvnum. Mwv Aserangam wm rampaqnum.

¹⁶‍Hoo Josiya wkur yukho, mwv puutu ho nyubu tulungam kaapanum. Hoo mwv nyi kanamnum hoo nyuum tulu hoqg alo tulungam naalinum hoo hoq tulu ham yugw ho kacdvb wm parnum, soq pagoq sam nyiqry benbo At Swg gomcwr gook jaqb nyinum.

¹⁷‍Ho mwv benum, “Ngoqg soq soogw kaag dvn si hoggv yu?” Hoo bopamg nyi tulungv mwam betamnum, “Soq si Juda hoqgv haanbo Pwnbog nyi akwg nyubungv hoo hiyv noqg Betel yugwngam ceekol soq nyinam pagoq sam mwv beol apbov.”

¹⁸‍Hoo mwv benum, “Mwam doom to; mwwg alongam nyi akkam mwby maabv.” Samariya hoqgv haan bo nyiqry benbo mwwg alo tulungam vpwb apaqnum.

¹⁹‍Hoo Israelwg lvpw at tulug At Swn haaxaq dvb hang nyiluqnam mam, Josiya Samariyag bopam mwlw hoqgv puutu aog xumk nam tuluho murty tulungam mvpaqnum.

²⁰‍Hoo mwv puutu aog xumk nammwg yugw tuluho nyub doonbo tulungam pwr jipaqnum, hoo bulam nyia koog alo lvgab wm parnum. Ho mwv Jerusalem wkurnum.

²¹‍Hoo lvpw atv nyiilu mwlwngam gaml jinum, “Birnam pvvbam Kitap ho xeqpnam hvb nulug Pwnbo At Swg ho Dvtv Durum dwcwngam pvvto.”

²²‍Hoggab Israelam nyegam tulungv pvvb bwwl doog yuk hoqgv la Israelwg lvpw at tulu gvla Judag lvpw at tulug aal hoqgv jaqb Dvtv Durum dwcwngam dvkmanum.

²³‍Hvbmabde Lvpw at Josiya vnyw camleq piin go swwyikho Jerusalemho soq Dvtv Durum dwcw ham At Swg emin ho dvrab dukub hvl benum.

²⁴‍Hoq aoho, Josiya bisiql betam bo tulungam hoo sootu nyub tulungam hoo asaq pwnbo imiq dvparam hoo murty mwlwngam hoo Juda gvla Jerusalemho bulum-kac dvb kaapanam mwlwngam aadob mvpaqnum, ho mwv nyub Hilkiya At Swg dvrwq namlo hoqgv kitap kaapanum gomcwr tulug pvvbam bwwl doog dvb mwwbwqnum.

²⁵‍Mwwg otuqho mwwg hvb nyinbo lvpw at akkam doomanum, hiyv At Swn mwwg hang lvgab hoo mwwg yvj lvgab hoo mwwg ator lvgab Mojesg Pvvb mvkjaqb nyil wnum, ho mwwg kokwb mwwg hvb nyinbo lvpw at swwlin maanum.

²⁶‍Hvbsujaqkam Judangam haaxaql ceekonam mam At Sw mwwg hang lingtwrnam mam nookur maanum, hoggab Manasse mwam vc loodab hang lengdwb hang nyiluqnum.

²⁷‍Hoo At Sw benum, “Ngo Israelam mvpaqnam hvb Judangam kam ngoqg kaaga soqgv mvpaq tayin, hoo Jerusalem mam ngoqg daalin kunam soq bopam sam ngo hurpaq tayin, hoo hogloq nammam ngo benum, Ngoqg eminv hoqho dootayin hvnam mam mvpaq tayin.”

²⁸‍Sija Josiyag asaq nyinam mwlwngam hoo mwwg hog mwlw nyinam mam, Judag Lvpw at tulug Nwd Kitap xeqp ko ho xeqp maap nvi yv?

²⁹‍Mwwg moodho Ijipt gv lvpw at Paro Neko Assiriyag lvpw atam svka taab Iupratas pobu xaqb haanum. Lvpw at Josiya mwam kvvrwqtab wnum, hoo mwam mwv kaapa kalam twqda Megiddo ho Paro Neko mwam mengnum.

³⁰‍Hoo mwwg nyera tulungv mwam sidkub svmangam ceriot ho Megiddo hoqgv mwam Jerusalemb baqa kunum hoo mwwg nyubu ho mwam liiknum. Hoo gvdag nyiilungv mwwg ko tuup Jehoahajnvn naanum, hoo mwam darxaqnum hoo mwwg abwg kwlib mwam lvpw at gob mvknum.

³¹‍Hwdlo Jehoahaj pvvb bwwl doorab gviyikho, mwv vnyw camnyi leq nywum go akamnum, hoo mwv Jerusalemho pool borum go pvvb bwwl doognum. Mwwg ann hoqg eminv Hamutal, Libna hoqg Jerimiyag ko nyemv.

³²‍Hoo mwv At Swg kaagaho hoggv almadwn, mwwg ab tulug nyinam hvb nyinum.

³³‍Hoo Paro Neko mwam Hamat gvdag Ribla ho pvtwq tuml apnum, hoqgab mwv Jerusalemho pvvb bwwl doog nyomanum, hoo lwwg telent rup go hoo telent hun go gvda gab nyooga jim dvb bepnum.

³⁴‍Hoo Paro Neko Josiyag ko tuup Eliyakimnvn mwwg ab kwlib lvpw at mvnum, hoo mwwg eminam Jehoiakim hvl kwlynum. Hvbmabde mwv Jehoahajnvn bool wgnum, hoo mwv Ijipt ho haanum hoo Ijipt alo siknum.

³⁵‍Hoo Jehoiakim Paronvn rupam la hunam jinum, hvbmabde mwv gvdag nyoogangam Parog gaml jik jaqb twngkwb jinum. Mwv rupam la hunam gvdag nyiilu hoqgv jot kvl dvb naanum, ho nyiicwr-cwrxiv mwwg jid sanam mam xika-xikal ham Paro Nekonvn jidwb nyinum.

³⁶‍Hwdlo Jehoiakim pvvb bwwl doorab gviyikho, mwv vnyw camnyi leq nywng go akamnum, hoo mwv Jerusalemho camleq nywg pvvb bwwl doognum. Mwwg ann hoqg eminv Jebida, Ruma hoqg Pedaiag ko nyemv.

³⁷‍Hoo mwv At Swg kaagaho hoggv almadwn, mwwg ab tulug nyinam hvb nyinum.