Read Nyishi 2 LVPW ATWG 24 Bible Online

2 LVPW ATWG 24 - Nyishi bible

2 LVPW ATWG 24

¹Mwwg moodho Bebilonwg lvpw at Nebukadnejjar haanum, hoo Jehoiakim mwwg nyerab vnyw nywum go swwnum. Ho mwv mwam taleql hoo ceekol mwam ceebio baqnum.

²‍Hoo At Sw mwwg nyiqry benbo nyera tulug gomcwr goonam hvb jaq, mwwg dookub Bebilonwg nyi acam go hoo Siriyag nyi acam go, hoo Moab nyi acam go hoo Ammon nyi acam go bulam Judangam ceekol twryum mvdwb kanamnum.

³‍Jvqtw jaqb soq si At Swg gaml jikwb Judaho haanum, ho bulam mwwg kaaga hoqgv mvpaqnum, Manasseg nyic nyigam gab, hoggab mwv soq tulu sam nyimnum,

⁴‍hoo nyiisam nyiam mwv ywlw twwgam gab soq sam nyimnum. Hoggab mwv Jerusalemho nyiisam nyiam ywlw twwnamv bwwr tvl doonum, hoo At Sw ham paqnyil apaq nyomanum.

⁵‍Jehoiakimwg asaq nyinam mwlwngam hoo mwwg hog mwlw nyinam mam, Judag Lvpw at tulug Nwd Kitap xeqp ko ho xeqp maap nvi yv?

⁶‍Hoqgab Jehoiakim mwwg ab tulug sinam hvb siknum, hoo mwwg kwlib mwwg ko tuup Jehoiakin pvvb bwwl doognum.

⁷‍Hoo Ijipt gv lvpw at mwwg gvda hoqgv lvvgwb lengk maanum, hoggab Bebilonwg lvpw atv Ijipt gv gvdangam naaknam mam Ijipt kucw hoqgv Iupratas pobu namgub naareq kunum.

⁸‍Hwdlo Jehoiakin pvvb bwwl doorab gviyikho, mwv vnyw camleq piin go akamnum, hoo mwv Jerusalemho pool borum go pvvb bwwl doognum. Mwwg ann hoqg eminv Nehusta, mwn Jerusalem hoqg Elnatanwg ko nyemv.

⁹‍Hoo mwv At Swg kaagaho hoggv almadwn, mwwg abwg nyinam hvb nyinum.

¹⁰‍Hoq moodho Bebilonwg lvpw at Nebukadnejjarg nyera tulungv Jerusalemho haanum, hoo bopam mam naareqnum.

¹¹‍Hoo mwwg nyera tulungam bopam mam naareq mvtwl, Bebilonwg lvpw at Nebukadnejjar bopam urab haanum,

¹²‍hoo Judag lvpw at Jehoiakin mwv atv, hoo mwwg annam hoo mwwg nyera tulungam hoo mwwg saab tulungam hoo mwwg pwqlw dootam mam Bebilonwg lvpw atam jipaqnum. Mwwg vnyw piin dvb pvvb bwwl doog yukho Bebilonwg lvpw atv mwam nyumwb bool wgnum

¹³‍hoo At Swg dvrwq namlo hoqg gumn mwlwngam hoo lvpw atwg nam hoqg gumn mwlwngam baql wgnum, hoo At Sw betam cootwl Israelwg lvpw at Solomonwg At Swg dvrwq namlo gab hun dupum-dvrab mvknam mwlwngam pvmwqnum.

¹⁴‍Mwv Jerusalemwg hog mwlwngam baql wgnum hoo saab tulungam hoo atorb nyob paky bo nyiingam 10,000 go, hoo jem mvlaqbo nyi mwlwngam hoo yip-pwlaqbo mwlwngam nyumwb booknum. Gvdag jwwgw gwwtaq bo nyiilungam apaq twqtwl, nyi akkam apaq maanum.

¹⁵‍Hoo mwv Jehoiakinnvn Bebilonwb booknum. Lvpw atwg annam, lvpw atwg nywxw tulungam, mwwg saab tulungam, hoo gvda hoqg peelo bo nyi tulungam mwv Jerusalem hoqgv Bebilonwb nyumwb booknum.

¹⁶‍Hoo Bebilonwg lvpw atv Bebilon ho atorb nyob paky bo nyiingam 7,000 go hoo jem mvlaqbo mwlwngam hoo yip-pwlaqbo nyi tulungam 1,000 go nyumwb boanum, bul mwlwngv atorl hoo nyob padwb jotnum.

¹⁷‍Hoo Bebilonwg lvpw atv Jehoiakinwg vk Mattaniyanvn mwwg kwlib lvpw at gob mvnum, hoo mwwg eminam Jedekiya hvl kwlynum.

¹⁸‍Hwdlo Jedekiya lvpw atwb swwyikho mwv vnyw camnyi leq nywg akamnum; hoo mwv Jerusalem mam vnyw camleq nywg pvvb bwwl doognum. Mwwg ann hoqg eminv Hamutal, Libna hoqg Jerimiyag ko nyemv.

¹⁹‍Hoo mwv At Swg kaagaho hoggv almadwn, Jehoiakimwg nyinam tulu hvb nyinum.

²⁰‍Hoggab At Swg haaxaqnamv Jerusalem mamla Judangam mwwg kaaga hoqgv hurpaq dvb nyiknum. Hoo Jedekiya Bebilonwg lvpw atam ceekol taleqnum.