Read Nyishi 2 LVPW ATWG 25 Bible Online

2 LVPW ATWG 25 - Nyishi bible

2 LVPW ATWG 25

¹Hoo vnyw kiya gola pool bvrywg aal looyw dvb mwwg pvvb bwwl doog yukho, Bebilonwg lvpw at Nebukadnejjar mwwg sipai lvgab Jerusalem mam ceeko taab haanum, hoo hoqham doqyum apnum. Hoo bulv doqyumnam bonam tulungam taqg-loosaqb mutumnum.

²‍Lvpw at Jedekiyag vnyw camleq nywg swwnam xaqb bopam mam hwwiyuml doognum.

³‍Pool bvrpig aal kiya deenho bopam urag gvdag nyiilungv vc loodab dwr wggam gab dvs cigkam doomab nyinum.

⁴‍Ho bopamho ung ak roqkonum, hoo nyob palaqbo nyi mwlwngv keleqnum, hoo hwdlo Kaldiya nyi tulungv bopam mam hwwiyuml doqdu gviyikho lvpw atwg boolu gurum vnyig toggoq pengko hoqgv ai bopam hoqgv lvvgwb lengnum. Hoo bulv Araba daiyab wnum.

⁵‍Hvbmabde Kaldiyag sipai tulungv lvpw atam la mwam ruqmin gvnv Jeriko lywpa ho ruqtinum, hoo mwwg sipaiyv mwwg hoqgv cwrsaq-bvraqb kes-ketwr kenum.

⁶‍Ho bulv lvpw atam nootunum hoo mwam Bebilonwg lvpw at dook Ribla gvdaho boanum, hoo mwam bulv mengd kub hwwbwq kunum.

⁷‍Bulv Jedekiyag ko tuup tulungam mwwg vnyiq kaagaho mengnum, hoo Jedekiyag vnyiqkam harlinum hoo mwam tag kvrlwq tvl hoo mwam Bebilonwb booknum.

⁸‍Bebilonwg lvpw at Nebukadnejjar vnyw camleq kiya gola pool bargwg aal kvn go swwl dooi yikho-hiyv Bebilonwg lvpw atgab bon nyinbo, kepten ceetorbo Nebujaradan, Jerusalem urab haanum.

⁹‍Hoo mwv At Swg dvrwq namlongam la, lvpw atwg nam mam hoo Jerusalemwg nam mwlwngam wm rampaqnum; nam namtbo nvmcw namtam mwv wm rampaqnum.

¹⁰‍Hoo Kaldiyag sipai mwlwngv, hiyv xeq ceetorbo kepten lvgab yvnbov, Jerusalem gurum mwlwngam mvpianum.

¹¹‍Hoo ceetorbo kepten Nebujaradan, jwwgw gwwtaq bo nyiilungam hoo bopam hoqg boumnam nyi tulungam hoo hiyv Bebilonwg lvpw atam haqpaqbo mwlwngam dumtwq-miily dvb lvkin gob nyumwb boonum.

¹²‍Hvbmabde ceetorbo kepten jwwgw gwwtaqbo nyi tulu gon roo boolungam la rongo tulungam mvm dvb apaqnum.

¹³‍Hoo At Sw dvrwq namlo ho tama rwwda diilwqnam tulungam la, hoo hoq daqn boam, hoo At Sw dvrwq namlo ho tama lvgab iss hengkum koob mvl apnam mam, Kaldiya nyi tulungv vmwq yumgub mvlayil, hoo tama tulungam Bebilonwb baql wgnum.

¹⁴‍Hoo bulv pwcw tulungam, hoo tuqn nan tulungam hoo nexaqnan tulungam hoo hwrxaqnan pukaqkam hoo sulum mwwnnan dupum-dvrab pam hoo dvrwq namlo ho nyin mvnnan tama dupum-dvrab mwlwngam baql wgnum,

¹⁵‍hoq lvg-lvgab loora tulungam hoo pukaq tulungam baql wgnum. Ceetorbo kepten akv hoggv hunam hunwb, hoo rupam rupwb baql wgnum.

¹⁶‍Hoqg rwwda dvvnyi gab, daagwn hv iss hengkum koob mvpnam ho daqm dvb At Swg dvrwq namlo ho Solomonwg mvnamv, hoqg tama dupum-dvrab tuluhv xila maanum.

¹⁷‍Rwwda daagwn hoqg aongv camleq piin kiubitnum, hoo hoqg aoho dumtup purlwqnam ak hv tamangv. Hoqg dumtup purlwqnam hv oum kiubitnum. Tama hoqgv dumtup purlwqnam ham anya jaqb annar aaxiam taqg-loosaqb mwiyw-mvcil mwlwqnum. Hoo dvvnyi deen swwrw ham kam aiyin dvb gaiyam hvmsiq-hameqnam oj lvgab mwlwqnum.

¹⁸‍Hoo ceetorbo keptenv peelo bo nyub Seraiya nvla dvqsinbo nyub Jepaniyanvn hoo haagangam daqg bo rvkybo oum mam,

¹⁹‍hoo bopam hoqgv nyob pal gaml jinbo saab tulungam, hoo lvpw atam tomswrbo ang go bopam uraho kaapanam mam; hoo gvdag nyiilungam tomswrl gaml jinbo sipai saab svkretvringam, hoo gvda hoqg nyiingv camx go bopam ho kaapanam mam boonum.

²⁰‍Hoo ceetorbo kepten Nebujaradan bulam nootu layil Bebilonwg lvpw at dook Ribla ho bulam boanum.

²¹‍Hoo Bebilonwg lvpw atv bulam jwwtabnum hoo Hamat gvdag Ribla ho bulam mengnum. Hoqgab Judangam hoqg gvda hoqgv nyumwb boolinum.

²²‍Hoo Juda gvdag boumnum nyiilu aoho, Bebilonwg lvpw at Nebukadnejjar Sapanwg ko hosiq, Ahikamwg ko tuup Gedalianvn nyiit rad gob xuqnum.

²³‍Ho hwdlo kepten mwlwngv hoo bulug nyi tulungv Bebilonwg lvpw atv Gedalianvn nyiit rad gob xuqlinam mam tapayin, bulug nyi tulu lvgab bulv Gedalia dook Mijpa ho haanum, soq haan bo tulu soqg eminv Netaniyag ko tuup Ismaiyel, hoo Karea gv ko tuup Johanan, hoo Netopat hoqg Tan-humetwg ko tuup Seraiya, hoo Maaka gv ko tuup Jaajaniya haanum.

²⁴‍Hoo Gedalia bulam la bulug nyi tulungam dingrwl begamv, “Kaldiyag saab tulu gab bos maabv. Gvda ho dooto hoo Bebilonwg lvpw atam bon nyij to, hoo hoqhvb nyim nyiloqkam noqg lvgab swrso tvl dootayin.”

²⁵‍Hvbmabde pool kvn yukho, Netaniya ko tuup Ismaiyel, Elisamag ko tuup xinam imiqkv nyi wyw lvgab haanum hoo Gedalianvn patabnum hoo mwam mengnum hoo mwwg lvgab Juhudi nyi tulungam la Kaldiya nyi tulungam mwwg lvgab Mijpa ho doon boam mengnum.

²⁶‍Ho nyiilu mwlwngv anyo ge hoo koi ge, hoo sipai hoqg kepten tulungv gorab layil Ijiptwb wnum, hoggab bulv Kaldiya nyi tulungam bosnum.

²⁷‍Hoo Judag lvpw at Jehoiakin vnyw cammum leq kvn gola pool bvryw leq bvrnyig camnyi leq kvn aalho, Bebilonwg lvpw at Ebil-merodak, hwdlo vnyw ho mwv Bebilonwg lvpw atwb swwyikho, Judag lvpw at Jehoiakinnvn pvtwq hoqgv anya mwwpal tolin kunum.

²⁸‍Hoo mwv mwam anya agam goonum hoo Bebilonho mwwg lvgab dooba bo lvpw at tulug pengko ho mwam dook xinam jaqkam jinum.

²⁹‍Hoqgab Jehoiakin mwwg pvtwq hoqg vj koonam mam pipaq kunum. Hoo aal looxiam mwv lvpw atwg tebolho lwxiam lvkin gob dvbam twwbam kunum,

³⁰‍hoo mwv swwl doody deedib, mwwg aal looxiam nyin-wnanam, mwwg naady sanam mam lvpw atv mwam kvxaqmab jikil doonum.