Read Nyishi 2 LVPW ATWG 3 Bible Online

2 LVPW ATWG 3 - Nyishi bible

2 LVPW ATWG 3

¹Judag lvpw at Jehosapat vnyw camleq piin go swwyikho, Ahabwg ko tuup Jehoram Samariya ho dootwl Israel aoho lvpw at gob swwnum, hoo mwv vnyw camleq nywnyi go pvvb bwwl doognum.

²‍Mwwg ab-ann nyinam hvb nyima sujaqkam, At Swg kaagaho hoggv almadwn ham mwv nyinum, hoggab mwwg abwg Baalwg emin gab daapo diilwqnam mam mwv mvpaqnum.

³‍Hvbsujaqkam, mwv Nebatwg ko tuup Jeroboamwg nyic nyinam mam nyil doonum, hoqgab mwv Israelam nyic nyimnum; mwv hoq nyic hoqgv wleq maanum.

⁴‍Hoq moodho Moabg lvpw atv sviya sonbo gob nyinum, hoo mwv Israelwg lvpw atam 100,000 go sviya yaan tulungam hoo yaap tvmwr hoqg vmmam 100,000 go jidwb nyinum.

⁵‍Hvbmabde hwdlo Ahab sinum, Moabg lvpw atv Israelwg lvpw atam ceekol taleqnum.

⁶‍Hoqgab Lvpw at Jehoram mood golo Samariya hoqgv lengnv hoo Israel mwlwngam hookum mvnum.

⁷‍Hoo mwv wnum hoo Judag lvpw at Jehosapatnvn gomcwr bilwqnum, “Moabg lvpw atv ngam ceekol taleqdo. No ngoq lvgab Moabam nyob pamin gvb yv?” Hoo mwv benum, “Ngo pamin gvtayin. Ngo noqgv, ngoqg nyiilungv noqg nyiilungv, ngoqg svpur tulungv noqg svpur tulungv.”

⁸‍Ho mwv benum, “Hogloq lamtab ngulv wiyin do?” Jehoram birwqnum, “Idomg deexa-rara lamtab wtayin.”

⁹‍Hoqgab Israelwg lvpw atv Juda gvla Idomg lvpw at lvgab wnum. Hoo hwdlo bulv doonu mabjaq aal kvn gob wdul dooi yikho, ho bulam wmin gvnbo sipai tulu gab la svdin tulu gab iss dook maanum.

¹⁰‍Ho Israelwg lvpw atv benum, “Oa! At Sw soq lvpw at oum sam Moabg alaqho jilwq tad nvi yv.”

¹¹‍Hoo Jehosapat benum, “Soq so At Swg nyiqry benbo dooma dvn yv, hiyv hoqgv ngulv At Swn taka dvb?” Ho Israelwg lvpw atwg nyera tulungv birwqnum, “Hiyv Ilijag alaqkam iss pwiya jinbo, Sapatwg ko tuup Ilisa soq so doodo.”

¹²‍Hoo Jehosapat benum, “At Swg gomcwrv mwwg lvgab doodwn.” Hoqg Israelwg lvpw atv la Jehosapat hoo Idomg lvpw atv mwwg dookub innum.

¹³‍Hoo Ilisa Israelwg lvpw atam benum, “Hoggv ngo noqg lvgab nyisv doodwn? Noqg abam nyiqry benbo tulug dookub hoo noqg annam nyiqry benbo tulug dookub wn.” Hvbmabde Israelwg lvpw atv mwam benum, “Ma, hvb ma; At Sw soq lvpw at oum sam Moabg alaqho jilwq dvb hvl goqnum.”

¹⁴‍Hoo Ilisa benum, “Nyiit At Sw swwl doody deedib, ngo mwwg agaho daqdwn, hoqho ngo Judag lvpw at Jehosapatnvn ximab nyiknum, hoqgab ngo nam rogab kamram hoo nam kaakam ram.

¹⁵‍Hvbmabde ngam rwwxw-gungga mvlaq boloq ak boa taab.” Hoo hwdlo rwwxw-gungga mvlaqbo hv rwwxw-gunggangam mvikam, At Swg alaqkv mwwg aoho haanum.

¹⁶‍Hoo mwv benum, “Soq sib At Sw bedo, ‘Soq pwtw bo iss kucw sam iss bwwr bo sviyin gob mvtayin.’

¹⁷‍Hoggab soq sib At Sw bedo, ‘Nulv dooi go hoo nyodo go kaapa ram, hvbmabde pobu kucwngv iss lvgab bwwr tayin, ho nulv twwtayin, no, hoo noqg tuun-mee tulungv, hoo noqg svdin tulungv twwtayin.’

¹⁸‍Soq sib At Swg kaagaho anyo ko pagoqkv. Moab nyi tulungam kam mwv nulug alaqho jitayin,

¹⁹‍hoo nulv gurum nwqtumnam vxiam hoo xuqbwql apnam bopam mam nyob patayin, hoo nulv albo svvn mwlwngam patab tayin hoo iss subuq buqlinko mwlwngam mutum tayin hoo albo gvda mwlwngam wlw lvgab muiyu-mvca tayin.”

²⁰‍Ar rogwn so akiam la pwr jid mood jaqho, kaato Idom daiya hoqgv issiv tolnum, gvdangam bwwr namgub tolnum.

²¹‍Hwdlo Moab nyi tulungv lvpw at tulug bulam ceekol nyob patab caanam mam tapayin, nwwxo-svtam bwwlaqbo mwlwngv anyo hoqgv naarab layil nyekam konguq namgub goqkumnum, hoo wlayil bulug gvda doorho doonum.

²²‍Hoo hwdlo bulv ar komc gorab yukho issam doonyi lvlaqkv dudaqyin, Moab nyi tulungv issam ui gob ya kooknum.

²³‍Hoo bulv benum, “Soq si ui go; lvpw at tulungv akwn-akwn pamin sul mengmin supa de. Ho sija, Moab nyi tulu nyob naareqnam mam naataj!”

²⁴‍Hvbmabde hwdlo bulv Israelwg svmcw ho haaikam, Israel nyi tulungv gorabnum hoo bulv bulug dook hoqgv kitwr namgub Moab nyi tulungam mengnum. Hoo bulv otuqb wnum, ho bulv hog hwdwg wnum hwdgo Moab nyi tulungam mengnum.

²⁵‍Hoo bulv bopam tulungam twryumnum, hoo albo gvda mwlwngam wlw lvgab muiyu-mvcanum. Kir-hareset ho wlw arongam doom dvb bulv iss subuq buqlinbo mwlwngam mutumnum hoo albo svvn mwlwngam patabnum, hoo swwxw-lvqmin abn bo tulungv ham doqyum tvl abnum.

²⁶‍Hwdlo Moabg lvpw atv mwam ceekol nyob podunam mam kaapayin, mwwg lvgab mwv lyoqr orioq palaqbo 700 go nyiingam boolayil Idom taqcgon ho nyobam papiaq dvb pakanum, hvbmabde bulv pala kumanum.

²⁷‍Ho mwwg kwlib swsiq deenbo mwwg ko tuup vbw cociqkam mwv boolayil mwam gurum aoho boyuqnam aky gob jinum. Hoo hoqho Israelam vcjaqb ceekol vs-axaqkv haanum. Hoo bulv mwwg hoqgv wkur kunum hoo bulug at gvdab bulv wkurnum.