Read Nyishi 2 LVPW ATWG 4 Bible Online

2 LVPW ATWG 4 - Nyishi bible

2 LVPW ATWG 4

¹Nyiqry benbo ko tuup hoqg nywxw akwn Ilisanvn sogoql benum, “Noqg nyera ngoqg nyolv sin kuba, hoo noqg nyerangv At Swn bosnum ham no cengdo, hvbmabde ceegonam nyi ak hv haapa ku, ngoqg ko vnyiam naalayil mwwg raasurb mvdwb.”

²‍Hoo Ilisa mwnwn benum, “Hoggv ngo noqgab nyijtayin? Ngam betam to; hoggv noqg lvgab namho doodo?” Hoo mwn benum, “Noqg paqnv hog akkam namho doog ma, hvbmabde kuty uppum pumg dootwq dvn.”

³‍Ho mwv benum, “Lvvgwb wgdvl noqg door-doopw mwlw hoqgv uppum asar booloqkam meeg naleqgo ceegaql apto.

⁴‍Ho no atv la noqg ko tuupv haagdvl hoo viyap pam ciqtum tvl hoo kutiam hoq asarbo uppum tuluho toolwqto. Hoo hwdlo pumgwn hv bwwr yin ham bviywrho jooginl apto.”

⁵‍Hoqgab mwn mwwg hoqgv wknum hoo mwn atv la mwnwg ko tuupv viyap pam ciqtumnum. Hoo uppum asar dvb bwwlwqnam tuluho mwn kutiam toolwqnum.

⁶‍Hwdlo uppumv bwwr yin, mwnwg ko tuupam mwn benum, “Uppum pumgta ngoqg dookub bwato.” Hoo mwv mwnwn benum, “Uppum dookma.” Ho kutiv tongngin kunum.

⁷‍Mwn wknv hoo Pwnbog nyi akam betamnum, hoo mwv benum, “Wgdvl kutiam puqta hoo noqg ceegongam hiqta ku, hoo no la noqg ko tuupv swrsob swwl dootayin.”

⁸‍Aal golo Ilisa Sunem ho wnum, hogloq ho nyet bo nyem dvn ak doonum, hiyv mwam dvs-twws dvtwk hvl benum.

⁹‍Hoo mwn mwnwg nyolam benum, “Sija kaato, soq nyi ak si Pwnbog dvrwq bo nyi akv hiyv ngulug lamta wpeql wdul doodo.

¹⁰‍Kuj ngulv ngulug nam so mwwg gab kartam nan loq ak, tebol loq ak, dootam loq ak, hoo lemp loq ak mvp jituj, ho hwdlo jaqkam mwv ngulug dook so haaikam, hoqho mwam haal doonu mvtju.”

¹¹‍Aal loog mwv hoqb haanum, hoo mwv hoq pwqlwb wnv hoo hoqho doonunum.

¹²‍Hoo mwwg nyera Gehajinvn mwv benum, “Soq Sunam nyem dvn ham goqto.” Hwdlo mwnwn mwv goqanum, mwn mwwg agaho daqnum.

¹³‍Hoo mwv mwam benum, “Mwnwn sija beto, ‘Kaato, no soq hog mwlw sam ngul gab hentwr jaqb nyipa ku; hoggv noqgab nyij kubyu? Lvpw atam maalo sipai saabam noqg bid gab agam bem dvb no hog bes dood yv’” Mwn birwqnum, “Ngoqg nyiilug pengko lo ngo doogw dvn.”

¹⁴‍Hoo mwv benum, “Hoggv mwn gab nyij sv doodo?” Gehaji birwqnum, “Mwn ko tuup dooma, hoo mwnwg nyolv nyekam dukun.”

¹⁵‍Mwv benum, “Mwnwn goqa to.” Hoo hwdlo mwnwn mwv goqnum, mwn viyap yabtam ho daqnum.

¹⁶‍Hoo mwv benum, “Haata bo vnywg soq mood so, no ko tuup ak cegabl jootayin.” Hoo mwn benum, “Ma, ngoqg nyiit at, Pwnbog nyi aka; noqg paqnam vm mvvmabv.”

¹⁷‍Hvbmabde nyem ak hv ko gvnum, hoo mwnwn Ilisag benam hvb, mwn dug poolwg hoq moodho nyega ko ak bwwnum.

¹⁸‍Hwdlo ko ak hv akam yukho, aal golo mwwg abwg vly naanbo tulug lvgab mwv wnum.

¹⁹‍Hoo mwwg abam mwv benum, “Aiya, ngoqg dumpo si, ngoqg dumpo si! Abv mwwg nyerangam benum, “Mwam mwwg annam bvqj ta.”

²⁰‍Hoo mwv mwam joorab layil hoo mwam mwwg ann dookho baqanum, ho ko akv mwnwg xarpo aoho aal lvpa namgub doonum, hoo mwv siknum.

²¹‍Hoo mwn mwam Pwnbog nyi akwg kartam ko ho jooca layil joopnum hoo mwam viyap xwrtum peel hoo lvvgwb lengleqnum.

²²‍Ho mwn mwnwg nyolam goqnum hoo benum, “Ngam nyera lo ak la svdam lo ak kanam tvb, ho ngo Pwnbog nyi akwg dookub nyebia jaqb wtayin hoo lokta hookur tayin.”

²³‍Hoo mwv benum, “No hoggub soolo mwwg dookub wjwq tayin? Soq mood si nit pool kama ho Doonu aal kama.” Mwn benum, “Hog mwlwngv al sudo.”

²⁴‍Hoo mwn svdamb caonum, hoo mwn mwnwg nyerangam benum, “Svdin sam nyebia jaqb rooduql wgto; ngo betam deedib vcwr gokam nyinyiaqb wwm mvmabv.”

²⁵‍Hoqgab mwn wknv hoo Pwnbog nyi akwg dook Karmel puutu ho haanum. Hwdlo Pwnbog nyi ak hv mwnwg haanam mam kaapayin, mwwg nyera Gehajinvn mwv benum, “Kaato, aloq v Sunam nyem dvn ak hv.

²⁶‍Mwnwn wrwq dvb nyebia jaqb xarn hoo mwnwn beta, ‘Noqg hog mwlwngv al sud yv? Noqg nyolv al sud yv? Noqg kongv al sud yv?’” Hoo mwn birwqnum, “Hog mwlwngv al sudo.”

²⁷‍Hoo mwn Pwnbog nyi akwg dook puutu ho hvvc yin, mwn mwwg lvpiangam gwrgabnum. Hoo Gehaji mwnwn tuugin taab haanum. Hvbmabde Pwnbog nyi ak hv benum, “Mwnwn vpwb apaqto, hoggab mwn vc loodab mwwdwq do, hoo At Sw ham ngoqg hoqgv kvsil ap pa hoo ngam betam ma.”

²⁸‍Ho mwn benum, “Ngoqg nyiit atam ngo ko tuup kon mvi yv? Ngo bema namyv, ‘Ngam xaalyo maab ka.’”

²⁹‍Mwv Gehajinvn benum, “Noqg vjam kooto hoo noqg alaqho ngoqg beqnyiangam naalayil hoo wn. Nam nyi kvvrwq yin loqkam. No mwam salam jimabv, hoo nam nyi gon salam jiyi nyiloqkam, birwqmabv. Hoo ngoqg benya sam ko nyuqm aoho tvdaql apta.”

³⁰‍Ho koog annv benum, “At Sw swwl doody deedib hoo no atv swwl doody deedib, ngo nam apaq peel wram.” Ho mwv gorabnum hoo mwnwn wmin gvnum.

³¹‍Gehaji otuqb wnum hoo koog nyuqm ho beqnyiangam tvdaql apnum, hvbmabde hoqho swwg doomanum. Hoqgab mwv mwam kvvrwqtab wkurnum hoo mwam betamnum, “Kov huurab ma.”

³²‍Hwdlo Ilisa nam urab haai yikho, kongam mwwg kartam ho sidwb joopnam mam mwv kaapanum.

³³‍Hoqgab mwv urab haanum hoo viyap pam ciqtum tvl hoo bunyiv At Swn swgwnum.

³⁴‍Ho mwv caonum hoo mwv ko aoho bumpnum, mwwg agam mam mwwg agam aoho habgabnum, mwwg vnyiqkam, mwwg vnyiqkam aoho, mwwg alaqkam mwwg alaq aoho gagabnum. Hoo mwv atv ko aoho humtam yin koog gv-ngv og gurabnum.

³⁵‍Ho mwv lokta gorabnum hoo nam uraho wkur-wxil yvpel, hoo caonum hoo mwv atv mwwg aoho humtamnum. Kongv kvn go kvj jinum, hoo kongv mwwg vnyiqkv nyiqbionum.

³⁶‍Ho mwv Gehajinvn goqanum hoo benum, “Sunam nyem dvn ham goqta.” Ho mwv mwnwn goqanum. Hoo hwdlo mwn mwwg dookub haai yikho, mwv benum, “Noqg ko tuupam joorabto.”

³⁷‍Mwn haanum hoo mwwg lvpia lwkw ho ked namgub nywtin tvl xumnum. Ho mwn mwnwg ko tuupam joorab kunum hoo lvvgwb wknum.

³⁸‍Hoo hwdlo gvdaho dwr-kano wiyikho Ilisa lokta Gilgal ho haanum. Hoo nyiqry benbo ko tuup tulungv mwwg agaho doodu yukho, mwv mwwg nyerangam benum, “Pwcw cwwt loq hvlwq tvl, hoo nyiqry benbo ko tuup tulu gab swcwr loq mwjto.”

³⁹‍Bulug hoqg akgon nyorob wj-oo naatab wnum, hoo nyoro ter ak kaapanum hoo hoqho naleqgo nyoro aaxiv doonum, hoo ham mwv naalayil baqanum, hoo ham dwdwq dvnbo hvl cengmab, bulv piimwq tvl swcwr pwcw ho vlwqnum.

⁴⁰‍Hoo bulv meeg toolin banv nyi meegwn dvka mvnum. Hvbmabde hwdlo bulv meeg dudu yukho, bulv sogoqnum. “Pwnbog nyi aka, pwcw vv sigv doodo!” Hoo bulv hoqham dvnyi kumanum.

⁴¹‍Mwv benum, “Ho wtw loq bwato.” Hoo mwv ham pwcw urab hurlwq tvl hoo benum, “Nyi tulungam dvm dvb meeg toolin to.” Hoo pwcw ho dwdwqbo dook maanum.

⁴²‍Baal-salisa hoqgv nyi ak haanum, hoo Pwnbog nyi gab otuqcob vly axeq lengn bo hoqgv tanyeq wtw kabnam camnyi go hoo leelaq busur dvb am geqnam mam mwwg tuila ho baqa jinum. Hoo Ilisa benum, “Nyi tulungam jito, ho bulam ham dvm to.”

⁴³‍Hvbmabde mwwg nyerangv benum, “Hoggub ngo soq sam nyi lwwg agaho joop tayin?” Hoqgab mwv lokta benum, “Nyi tulungam jito, ho bulam ham dvm to, hoggab soq sib At Sw bedo, ‘Bulv dvtayin hoo meeg dvleqkv dootayin.’”

⁴⁴‍Hoqgab mwv bulug agaho ham joopnum. Hoo At Swg gomcwr gook jaqb, bulv dvnum hoo meeg dvleqkv doonum.