Read Nyishi 2 LVPW ATWG 5 Bible Online

2 LVPW ATWG 5 - Nyishi bible

2 LVPW ATWG 5

¹Naaman, Siriya lvpw atwg sipai saabv, mwwg nyiit at lvgab mwv koibo nyi gob la mwwswnam gob nyinum, hoggab At Sw mwwg hoqgv Siriyangam mviya mvdwb jinum. Mwv ator jaql hoo haakam bo nyi akgob nyinum, hvbmabde mwv tviyiq nyinum.

²‍Siriya nyi tulungv lok Israelwg gvdangam nyob paiyikho nyem ko anyo bo ak baql wgnum, hoo mwn Naamanwg nywxwngam bonam nyijil doonum.

³‍Mwn mwnwg aiyam benum, “Ngoqg nyiit at, Samariya ho nyiqry benbo dookub wnyiloqkam, mwwg tviyiqkam mwv mwp jitayin.”

⁴‍Hoqgab Naama mwwg nyiit at dookub wnv hoo betamnum, “Soq sib Israel hoqgv paqn gab nyem ko ak boanamv agam goodo.”

⁵‍Hoo Siriyag lvpw atv benum, “Sija wn, hoo ngo Israelwg lvpw atam pota taqg xeqtwl jilwq tayin.” Hoqgab mwv rup hoqgv camg telent go, hunv lwwyw ax sikil go, hoo vj kooliv rumyw go mwwg lvgab baqlayil mwv wnum.

⁶‍Hoo mwv Israel lvpw atam potangam baqa jinum, hoqho hvl xeqnum, “Hwdlo soq pota si nam wc yin, ngoqg nyera Naamannvn ngo noqg dookub kanam pan hvl cengto, ho mwwg tviyiqkam no mwam mwp jito.”

⁷‍Hoo hwdlo Israelwg lvpw atv potangam poory peel, mwwg vjam mwv pumwq sul hoo benum, “Ngo Pwnbov yv, nyiingam meng gvi hoo pwrab gvi mvdwn, ho soq nyi ak si ngam mwwg tviyiq nyinbo nyiam mwp mvdwb kanam pan? Kaaka tvna, mwv ngoqg lvgab yolu doodwb soq si pagoq meegaq dvn.”

⁸‍Hvbmabde hwdlo Ilisa, Pwnbog nyi akv Israelwg lvpw atv mwwg vj pumwqnam mam tapayin, mwv lvpw atam pui bilwql begamv, “Hoggub noqg vjam no pumwqnum? Mwam sija ngoqg dookub haam to, ho Israel so nyiqry benbo ak doodwn hvl mwam cengm to.”

⁹‍Hoqgab Naaman mwwg svpur tulu ngamla ceriot tulu hoqgv haanum hoo Ilisag nam viyap yabtam ho daqnum.

¹⁰‍Hoo Ilisa mwwg gab pui ak bilwql begamv, “Jordon pobub wgdvl lw-kvn hurs ta, hoo noqg gv aiyaqkv al tayin, hoo no dvrwq taikun.”

¹¹‍Hvbmabde Naaman hang lengl hoo wleqnum, hoo begamv, “Kaato, ngo mwwnum mwv hoggub nyijaqkam ngoqgab lvvgwb lenglayil hoo daqtwl hoo mwwg Pwnbo At Swg eminam goql, hoo mwwg alaqkv miiyiq-meexeql hoo tviyiqkam mwp yin pv mwwnum.

¹²‍Israelwg pobu tulungam issam, Abana la Parpar, hoo Damaskaswg iss pobu tulungv alyama dvn yv? Bulug hoqgv ngo hursil hoo dvrwq lama dvn yv?” Hoqgab mwv vc loodab hang lengl hoo tobkurl wleqnum.

¹³‍Hvbmabde mwwg nyera tulungv ogumb haanum hoo mwam benum, “Ngoqg ab, nam nyiqry benbo koi jaqn bo agam mam goopa ku; no ham nyiram yv? Mwv nam hvl bema namyv, ‘Hurs to hoo dvrwq to’?”

¹⁴‍Hoqgab Pwnbog nyi akwg gomcwr bekjaqb, mwv Jordon pobub ilwq kunv mwv atv lw-kvn go doa-daqrabl nyinum, hoo mwwg gv aiyaqkv ko anyo bo gv aiyaq hvb hookur kunum hoo mwv dvrwq kunum.

¹⁵‍Ho mwv Pwnbog nyi akwg dookub, mwv la mwwg wgnam dvpar tuluhv hookurnum, hoo mwv haanum hoo mwwg agaho daqnum. Hoo mwv benum, “Kaato, swcw nyodo mwlw so Pwnbo dooma hvbmabde Israel si doodo; hoqgab noqg nyera hoqgv aky loq nvvrwq tvbv.”

¹⁶‍Hvbmabde mwv benum, “At Sw swwl doody deedib, hiyv agaho ngo daqdwn, ngo hog akkam noqg akiam nvvrwq ram. Hoo mwam mwv naat jijaqk hvl benum, hvbmabde mwv haqpaqnum.

¹⁷‍Ho Naaman benum, “Hvbnyiloqkam, anya mwwpa gvdwl noqg nyerangam ked loq svdam vnyig baqg namgub jila bv, hoggab sija soqgv noqg nyerangv asaqkam pwnboam boyuqnam akiam la pwram jikram hvbmabde At Swn jitayin.

¹⁸‍Noqg nyerangam At Sw soq pagoq so apaq jila bv: hwdlo ngoqg nyiit atv Rimmon nam urab haal hoo hoqho ngoqg laqpo so yiigw tvl mwv xumdwn, hoo ngo kam Rimmon uraho pvxw dvb nyidwn, hwdlo ngo Rimmon nam uraho ngo atv pvxwl xumanam mam, noqg nyerangam At Sw soq pagoq so apaq jila bv.”

¹⁹‍Mwv mwam benum, “Swrsob wnku.” Hvbmabde hwdlo Naaman mwwg hoqgv meeg aado dvb wleq yukun,

²⁰‍Pwnbog nyi akwg, Ilisag nyera Gehaji benum, “Kaato, ngoqg nyiit atv Siriya nyi Naaman, mwwg baqanam mam mwwg alaq hoqgv hog aky naamab apaq paku. At Sw swwl doody deedib, ngo mwam ruqmin gvden hoo mwwg hoqgv hog aky loq meeg naatayin.”

²¹‍Hoqgab Gehaji Naamannvn wmin gvnum. Hoo hwdlo Naaman mwwg kokwb nyi ak xarmin gvnam mam kaapayin, mwv ceriot hoqgv ipoqnv hoo mwam kvvrwqnum hoo benum, “Hog mwlwngv al dvi yv?”

²²‍Hoo mwv benum, “Hog mwlwngv aldo. Ngoqg nyiit at ngam nam agam goom dvb kanam pan, ‘Sija da Iprayimg diisw gvda hoqgv nyiqry benbo ko tuup vnyi go haapa. Anya mwwpa gvdwl bulam telent akwb rup loq hoo vj kooly loq rumnyi jitbv.’”

²³‍Hoo Naaman benum, “Anya mwwpa gvdwl akiam telent vnyi go loorwq tvb.” Hoo mwv mwam benum hoo telent vnyi go rupam naara rvvnyi go puucw jinum, ho hoq lvgab vj kooly rumnyi go putaq jinum, hoo hoq tulu ham mwwg nyera vnyi go baqm dvb jinum. Hoo bulv hoq tulu ham Gehaji otuqb baqcol wgnum.

²⁴‍Hoo hwdlo mwv diisw gvdaho haaikun, bulug alaq hoqgv mwv naaknum hoo hoq tulu ham nam uraho apnum, hoo nyi tulungam mwv wwm kunum, hoo bulv wleqnum.

²⁵‍Mwv wknum hoo mwwg nyiit atwg agaho daqnum, hoo Ilisa mwam benum, “Gehaji, no hogloqb wpen?” Hoo mwv benum, “Noqg nyerangv hogloqkam wma.”

²⁶‍Hvbmabde mwam mwv benum, “Hwdlo nyi ak hv mwwg ceriot hoqgv tobkurl nam kvvrwqtab ipoq yukho ngoqg hangv dooma nam yv? Hoq mood hv twngkam hoo vjam, olib boolungam hoo roo boolungam, sviyangam hoo svv hvvbam, nyerangam hoo paqnam aky nvvrwq de moodv yv?

²⁷‍Hoqgab Naamanwg tviyiq nyinam hv nam la noqg hosiqkam nwrba gob nyoqsiq tayin.” Hoqgab mwwg kaaga hoqgv mwv tviyiq nyil, tapam hvb puulu tukul lvvgwb wknum.