Read Nyishi 2 LVPW ATWG 7 Bible Online

2 LVPW ATWG 7 - Nyishi bible

2 LVPW ATWG 7

¹Hvbmabde Ilisa benum, “At Swg gomcwr sam tato: soq sib At Sw bedo, Aram mam soq mood so Samariyag toggoqho wtw geebwngam sikil akwb, hoo tanyeq giinyiam sikil akwb puqtwq tayin.”

²‍Ho Lvpw atv hiyvg laqpongam mwwgwnam kepten ak hv Pwnbog nyi akam benum, “At Sw mwv atv doangam kuqko sujaqkam soq tulu si nyila tai nvi yv?” Hvbmabde mwv benum, “Noqg atwg vnyiq hoqgv no sam kaapa tayin, hvbmabde no hoq ham dvparam.”

³‍Bopamg haagag toggoqho tviyiq nyinbo nyi vpy go doonum. Hoo bulv akwn-akwn bemin sunum, “Hoggub ngulv soq so ngulv sinam xaqgub doodu taikun?

⁴‍Bulv bebnyiloqkam, ‘Kuj ngulv bopam urab haanuj,’ bopam uraho dwr-kanongv doodo, hoo ngulv alo sita yi. Hoo ngulv soq so doodu baloqkam hookam ngulv sita yi. Hoqgab sija kuj, ngulv Siriya nyi tulungv svmcwb wnuj. Bulv ngulam swwm dvb jib nyiloqkam ngulv swwtayin, hoo bulv ngulam mengb nyiloqkam ngulv sitwq tayin.”

⁵‍Hoqgab bulv ariyum ho gorab layil hoo Siriya nyi tulug svmcwb wnum. Hvbmabde hwdlo bulv Siriya nyi tulug svmcw bviywrho haai yikho, kaato, hoqho nyi akkam dook maanum.

⁶‍Hoggab At Sw Siriya nyi tulug sipaiyam ceriot hoo svpur, hoo koi jaqb sipai haanam hvb yal dunam mam tapa mvdwb mvnum, hoqgab bulv akwn-akwn bemin sunum, “Kaato, Israel lvpw atv ngulam nyob padwb Hittaitwg lvpw atam hoo Ijipt gv lvpw atam nyemaq twqlayil ngulam ceekol nyob patab haad ku.”

⁷‍Hoqgab bulv ariyum ho bulug tombu doogwngam, bulug svpur tulungam, hoo bulug svdam tulungam, svmcw ho cumcumb doom peel, hoo bulug swwgab kenum.

⁸‍Hoo hwdlo hoq tviyiq nyinbo tuluhv svmcw bviywrho haai yikho, bulv tombu akwg urab haanum hoo dvn-twwnum, hoo bulv rupam hoo hunam hoo vjam naal baqlayil ham kvsil apnum. Ho bulv asaq tombu urab haanum hoo hoqg dupum-dvrab pam naal baqlayil hoo ham kvsil apnum.

⁹‍Ho bulv akwn-akwn bemin sunum, “Ngulv albo bonam nyima. Soq aal si tugu puiyv aalv. Ngulv cooikab dool aram namgub doom nyiloqkam, laqm-baqnamv ngulam mviya tai yi. Hoqgab sija haato; kuj ngulv lvpw atwg nombub wgdvl betam taaj.”

¹⁰‍Hoqgab bulv haanum hoo bopamg toggoqkam rvky bo tulungam goql hoo bulam betamnum. “Ngulv Siriya nyi tulug svmcw ho haanum, hoo kaato, hoqho nyi akkam kaapa maanum hoo yal dunam gokam tapa maanum, hoo svpur tulungam la svdam tulungam arongam rwwtu tvl tombungv biimab doonum.”

¹¹‍Ho toggoqkam rvky bo tulungv puiyam lvpw atwg nombungam betamnum.

¹²‍Hoo lvpw atv aiho gorabnum hoo mwwg nyera tulungam benum, “Siriya nyi tulungv hoggv ngulam nyiknum ham ngo nulam betam tayin. Ngulv kano do hvl bulv cengdo. Hoqgab bulv svmcw hoqgv bulv atv nyoro ho kvs taab wnum, mwwgamv, ‘Hwdlo bulv bopam hoqgv lvvgwb lengleq yin, ngulv bulam tordwb nootu dvb hoo bopam urab haadwb hvl nyido.’”

¹³‍Hoo mwwg nyera tulu ak gon benum, “Bopam soq uraso doonbo nyiilungv nyi sikbo tulug kaiyanam hvb kan twdwq tvl doodu do. Hoqgab kuj soq boumnam svpur tulu lvgab nyi loq ang go kanam nvmlwq tuj. Kuj ngulv kanam tvl hoo kaaka tuj.”

¹⁴‍Hoqgab bulv svpur xargbo nyi vnyi go naanum, hoo lvpw atv bulam Siriya nyi tulug sipai kokwb kanam nvmlwql begamv, “Wgdvl hoo kaaka ta.”

¹⁵‍Hoqgab bulam bulv Jordon namgub swqmin gvnum, hoo kaato, lamta bvvpw ho Siriya nyi tulungv nyebiab kedwb hvl bulv vjam la dupum-dvrab pam hurjoq-huryoql hurpaql apnum. Hoo pui baqn bo tulungv lvpw atam hookur kunv hoo puiyam betamnum.

¹⁶‍Ho nyiilungv lvvgwb lengb nv Siriya nyi tulug svmcwngam hubyiq-hubxeql naaknum. Hoqgab At Swg gomcwr gook jaqb, wtw geebwngam sikil akwb gob, hoo tanyeq giinyiam sikil akwb puq twqnum.

¹⁷‍Toggoq gab lvpw atv mwwg hingwnam kepten akam kaam dvb xuqlinum. Hoo hwdlo lvpw atv mwwg dookub ipoq yin, hoggub Pwnbog nyi ak hv bep kunam hvb nyiilungv mwam toggoqho caajabnum, hoqgab mwv sinum.

¹⁸‍Hoggab hwdlo Pwnbog nyi ak hv lvpw atam bedwkho, “Aram mam soq mood so Samariyag toggoqho wtw geebwngam sikil akwb, hoo tanyeq giinyiam sikil akwb puqtwq tayin.”

¹⁹‍Pwnbog nyi akam kepten akv birwqnum, “At Sw mwv atv doangam kuqko sujaqkam soq tulu si nyila tai nvi yv?” Hvbmabde mwv benum, “Noqg atwg vnyiq hoqgv no sam kaapa tayin, hvbmabde no hoq ham dvparam.”

²⁰‍Hoo hoqhv mwam nyiknum, hoggab nyiilungv mwam toggoqho caajabnum hoo mwv siknum.