Read Nyishi 2 LVPW ATWG 8 Bible Online

2 LVPW ATWG 8 - Nyishi bible

2 LVPW ATWG 8

¹Ho hiyvg ko tuupam lokta turab dvb mvnam nyem akam Ilisa benum, “gorabto, hoo noqg imiq dvpar lvgab hoglo jaqkam no nyoky wto, hoggab At Sw dwr-kanongam jilwq tagdo, hoo hoqhv gvda so vnyw kvn gob nyil dootayin.”

²‍Hoqgab nyem akv gorabnum hoo Pwnbog nyi akwg gomcwr bekjaqb nyinum. Mwn mwnwg imiq dvpar lvgab Palistan nyi tulug gvdab vnyw kvn gob nyoky wnum.

³‍Hoo vnyw kvnwg vtwr-anya moodho hwdlo nyem ak hv Palistan nyi tulug gvda hoqgv wkur yukho, mwn lvpw atam mwnwg nammam la mwnwg gvda kedam jit kubwk hvl konum.

⁴‍Lvpw atv Pwnbog nyi akwg nyera Gehaji lvgab agam gool hoo begamv, “Ilisag koi jaqb bon nyinam tulu ham ngam betam tvb.”

⁵‍Hoo hwdlo mwv lvpw atam hoggub Ilisa sinbo nyiam turkur dvb mvnum ham goodul dooyikho, kaato, hiyvg nyem akwg ko tuupam turkur dvb mvnam nyem ak hv mwnwg nammam la mwnwg kedam jikur tukbvk hvl lvpw atam konum. Hoo Gehaji benum, “Ngoqg nyiit at, Lvpa ata, soq si hoq nyem dvn akv, hoo soq si mwnwg ko tuupam Ilisag turkur dvb mvnam akv.”

⁶‍Hoo hwdlo lvpw atv nyem dvn akam toxyin, hoo mwn mwam betamnum. Hoqgab lvpw atv saab ak mwn gab xuqlinv begamv, “Mwnwg hog mwlwngam jikur mvto, mwn hwdlo vnyw hoqgv sija namgub wleq yukho rongo hoqgv mvlin kunam mam jikur mvto.”

⁷‍Ilisa Damaskas ho haanum, Siriyag lvpw at Ben-hadad vcnum. Hoo hwdlo ham mwam betam yin, “Pwnbog nyi akv so haado hvikam,”

⁸‍lvpw atv Hajaelnvn benum, “Aky loq noqg lvgab baqlayil Pwnbog nyi akam kvvrwqta, hoo mwwg hoqgv At Swn tox mvka ta, begamv, ‘Ngo soq vc soqgv alyin yv?’”

⁹‍Hoqgab Hajael wnv mwam kvvrwqnum, hoo mwwg lvgab Damaskas hoqgv hog mwlw albo akiam svjin campy go pvvlwq tvl baqnum. Hwdlo mwv haai yikho hoo mwwg agaho mwv daqtwl, mwv benum, “Noqg ko tuup Siriyag lvpw at Ben-hadad ngam noqg dookub kanaml begamv, ‘Ngo soq vc soqgv alyin yv?’”

¹⁰‍Hoo Ilisa mwam benum, “Wgdvl mwam beta, ‘No hoggub nyijaqkam al tayin,’ hvbmabde At Sw ngam kaakin do mwv sidwb nyiky tai.”

¹¹‍Hoo Ilisa mwam rogab lalal kaal doonum, hwdlo Hajael hvnyw namgub. Hoo Pwnbog nyi akv xabnum.

¹²‍Hoo Hajael benum, “Hoggub ngoqg nyiit at xabdwn?” Mwv birwqnum, “Hoggab no Israelwg nyiilungam almab nyitanam mam ngo cengdo. No bulug gurum mam wm toloq tai, hoo bulug nyiid-nyiiyo tulungam lyoqr orioq hoqgv mengta yi hoo bulug ko anyongam twqmwq yi hoo bulug ko gvnboam padeq-paiyeql mvta yi.”

¹³‍Hoo Hajael benum, “Noqg nyerangv hoggv, iky twq, ho soq koibo pagoq sam mwv nyila yaaram.” Ilisa birwqnum, “At Sw ngam kaakin do, no Siriya aoho lvpw at gob swwtayin.”

¹⁴‍Ho mwv Ilisa hoqgv wknum hoo mwwg nyiit at dookho haanum, mwam mwv benum, “Hoggv Ilisa nam bede?” Hoo mwv birwqnum, “Mwv ngam betamnum no hoggub nyijaqkam altai hvde.”

¹⁵‍Hvbmabde aal loogwn so mwv vjam naalayil iss ho swwbam tvl hoo mwv sinam xaqgub ham lvpw atwg nyuqm ho pomlupnum. Hoo Hajael mwwg kwlib lvpw at swwknum.

¹⁶‍Israelwg lvpw at Ahabwg ko tuup Joram vnyw nywng go pvvb bwwl doog yukho, hwdlo Jehosapat Judag lvpw atwb swwyikho, Jehosapatwg ko tuup Jehoram Judag lvpw atwb nyinum, hoo pvvb bwwl doorab gvnum.

¹⁷‍Hwdlo mwv lvpw at gob swwrab yukho mwv vnyw cammum leq nywnyi go akamnum, hoo Jerusalemho mwv vnyw piin go pvvb bwwl doognum.

¹⁸‍Hoo mwv Israelwg lvpw at tulu gvla Ahabwg nombu hoqg nyinam wnam hvb nyinum, hoggab Ahabwg nyem kov mwwg nywxwb nyinum. Hoo At Swg kaagaho hoggv almadwn ham mwv nyinum.

¹⁹‍Hvbsujaqkam At Sw Judangam twryum dvb mwwlwq maanum, hoggab mwwg nyera Debidnvn mwv lempam la mwwg ko tuup tulungam nwrba xaqb jitayin hvl dingrnum.

²⁰‍Mwwg swwd aalho Idomv Judag pvvb uraho dooram hvl nyob panum hoo bulug lvpw atam bulv xuqnum.

²¹‍Ho Joram mwwg ceriot tulungam naalayil hoo ai gorab banv Jair gvdangam wbol wleqnum, hoo mwv la mwwg ceriot sipai saab tulungv mwam hwwiyuml doonbo Idom nyi tulungam mengnum, hvbmabde mwwg sipai tulungv nammwb keleq kunum.

²²‍Hoqgab soolo namgub Judag pvvb uraho dooram hvl Idomv taleql nyob padwn. Ho mood akin ho Libna ngvkam taleql nyob panum.

²³‍Joramwg asaq nyinam mwlwngam, hoo mwwg hoolu-deed nyinam mam, Judag Lvpw at tulug Kitap xeqp ko ho xeqp maap nvi yv?

²⁴‍Hoqgab Joram mwwg ab tulug sinam hvb siknum hoo mwwg ab tulu lvgab Debidg bopam ho liiknum, hoo mwwg kwlib mwwg ko tuup Ahajiya pvvb bwwl doognum.

²⁵‍Israelwg lvpw at Ahabwg ko tuup Joram vnyw camleq nywnyi go swwyikho, Jehoramwg ko tuup Ahajiya Judangam pvvb bwwl doorab gvnum.

²⁶‍Hwdlo mwv pvvb bwwl doorab yukho, Ahajiya vnyw camnyi leq nywnyi go akamnum, hoo Jerusalemho mwv vnyw nywg pvvb bwwl doognum. Mwwg ann hoqg eminv Ataliya; mwn Israelwg lvpw at Omrig ko hosiq hoqg nyem kov.

²⁷‍Ahabwg nombu hoq nyinam hvb mwv kam nyinum hoo mwv Ahabwg dvpar hoqg maqb gob nyigam gab, At Swg kaagaho Ahabwg nombu hoq nyinam hvb almanam nyinum.

²⁸‍Mwv Ahabwg ko tuup Joram lvgab Siriyag lvpw at Hajaelnvn Ramot-gilead ho nyob patab wmin gvnum, hoo Siriya nyi tulungv Joramnvn un mvgnum.

²⁹‍Hoo hwdlo Siriyag lvpw at Hajaelnvn Rama ho ceekol nyob paiyikho Siriya nyi tulug mwam un mvgnam mam, unnam geem dvb Lvpw at Joram Jejreel ho hookurl doonum. Hoo Judag lvpw at Jehoramwg ko tuup Ahajiya, Ahabwg ko tuup Joramnvn kaatab innum, hoggab mwv vc cil doonum.