Read Nyishi 2 LVPW ATWG 9 Bible Online

2 LVPW ATWG 9 - Nyishi bible

2 LVPW ATWG 9

¹Ho nyiqry benbo Ilisa nyiqry benbo ko tuup tulu ak gon goqnv hoo mwam benum, “Noqg vjam kooto, hoo soq kuty yooxaq sam noqg alaqho bwwlayil, Ramot-gilead ho wn.”

²‍Hoo hwdlo no hvvc yin, Nimsig ko tuup hosiq hoqg Jehosapatwg ko tuup Jehunvn kaagaqta. Hoo nam urab haagdvl hoo mwwg ajin tulug pengko hoqgv mwam daqrab mvta, hoo mwam ura pwqlwb haagta.

³‍Ho kuty yooxaqkam naalin gvdwl mwwg dumpo aoho tooiyaq tvl hoo beta, “Soq sib At Sw bedo, ngo nam Israelwg aoho lvpw at gob darxaq gviyin.”

⁴‍Hoqgab nyiqry benbo nyera yaapa ak hv Ramot-gilead ho wnum.

⁵‍Hoo hwdlo mwv hvvc yin kaato, sipai saab tulungv dookum ho doonum. Hoo mwv benum, “Sipai saaba, ngo noqgab gomcwr ak doodo.” Hoo Jehu benum, “Ngulug pengko soqgv hiyam?” Hoo mwv benum, “Sipai saab aka, nam kv.”

⁶‍Hoqgab mwv gorabnum hoo nam urab haanum. Hoo yaapa ak hv mwwg dumpo aoho kutiam toolupl mwam begamv, “Soq sib Israelwg Pwnbo At Sw bedo, At Swg nyiilu aoho, Israelwg aoho ngo nam lvpw at gob mvg yin.

⁷‍Hoo noqg nyiit at Ahabwg nombungam no mengtayin, ngoqg nyiqry benbo ngoqg nyera tulug hijum kwliam daqdwb, hoo At Swg nyera tulug hijum kwliam ngo Jejebelnvn ree daqtayin.

⁸‍Hoggab Ahabwg nombu mwlwngv yuupaq tayin, hoo Ahabwg nyumwb ge ho nyiidu nyi ge nyega mwlwngam Israel hoqgv twryum tayin.

⁹‍Hoo Nebatwg ko tuup Jeroboamwg nombungam, hoo Ahijag ko tuup Baasag nombungam mvnam hvb Ahabwg nombungam ngo mvtayin.

¹⁰‍Hoo Jejebelnvn Jejreel ho iky tulungv dvtayin, hoo mwnwn svma liinbo akkam dooram.” Ho mwv viyap pam ciqko layil keleqnum.

¹¹‍Hwdlo Jehu mwwg nyiit atwg nyera tulug dookho leng yikho, bulv mwam benum, “Hog mwlwngv al sud yv? Hoggub soq rugaqbo nyi ak si noqg dookub haanum?” Hoo mwv bulam benum, “Nulv nyi akam la mwwg goonam mam cengdo.”

¹²‍Hoo bulv benum, “Hoqhv jvqtw ma; ngulam sija betam to.” Hoo mwv benum, “Soq sib mwv ngam agam goonv begamv, ‘Soq sib At Sw bedo, ngo nam Israelwg aoho lvpw at gob darxaq gviyin.’”

¹³‍Ho nyebia jaqb nyiicwr-cwrxiv bulug vjam naanv hoo ham puuptvl hoo mwam lvpia asarv daqtam mvnum, hoo bulv tuuliam miqnum hoo pui bepornum, “Jehu lvpw atv.”

¹⁴‍Nimsig ko tuup hosiqg Jehosapatwg ko tuup Jehu Joramnvn hima bwwl ceekonum (Hoq moodho Joram Israel tulu lvgab Siriyag lvpw at Hajaelnvn nyob padwb Ramot-gilead ho rvkil doodunum,

¹⁵‍hvbmabde hwdlo mwv Siriyag lvpw at Hajael lvgab nyob paiyikho Siriya nyi tulungv mwam un mvg ko-gab Lvpw at Joram mwv Jejreel ho unnam geem taab hookurnum.) Hoqgab Jehu benum, “Soq si noqg mwwlwq gonyi loqkam, hiyv gon kam bopam soqgv lvvgwb wl hoo puiyam Jejreel ho betam mvmabv.”

¹⁶‍Ho Jehu mwwg ceriotam naalayil hoo Jejreelwb wnum, hoggab Joram hoqho karl doonum. Hoo Judag lvpw at Ahajiya Joramnvn kaatab hoqho innum.

¹⁷‍Ho Jejreel soja ho rvkil daqn bo nyi akv mwv Jehu la ajin tulug haanam mam kaapanum hoo benum, “Ngo nyi acam go kaapa do.” Hoo Joram benum, “Svpur xarg bo nyi loq ak kanam tvl bulam wrwq mvto, hoo mwam bemto, ‘Nulug haanam si swrso gab yv?’”

¹⁸‍Hoqgab svpur aoho doonbo nyi ak hv mwam kvvrwqtab wnum hoo benum, “Soq sib lvpw at bedo, ‘Nulug haanam si swrso gab yv?’” Hoo Jehu benum, “Hoggv no swrso lvgab mvta dvn? Tobkur gvdwl ngoqg kokwb xarba to.” Hoo rvky bo akv betamnum, begamv, “Pui baqn bo hv bulug dookho wcnum, hvbmabde mwv hookur kuma.”

¹⁹‍Ho mwv vnyi deen svpur xarn bo nyiingam kanamnum, mwv hvvcnv bulam benum, “Soq sib lvpw at bedo, ‘Nulug haanamv swrso gab yv?’” Hoo Jehu birwqnum, “Hoggv no swrso lvgab mvta dvn? Tobkur gvdwl ngoqg kokwb xarba to.”

²⁰‍Lokta rvky bo akv puiyam baqtamnum, “Mwv bulug dookho hvvcnum, hvbmabde mwv hookur kuma. Hoo xarg bo nyi akv Nimsig ko tuup Jehu hvb nyido, hoggab mwv hang lingtwr tvl xaral hoodu do.”

²¹‍Joram benum, “Mwx-mvaqto.” Hoo bulv mwwg ceriotam mwx-mvaqnum. Ho Israelwg lvpw at Joram hoo Judag lvpw at Ahajiya mwwg at-atwg ceriot ho dootwl Jehunvn kvvrwqtab wrabnum, hoo mwam Jejreel hoqg Nabotwg gumn-ran dookho wrwqnum.

²²‍Hoo hwdlo Joram Jehunvn kaapayin, mwv benum, “Jehu, no swrso gab haai nvi yv?” Mwv birwqnum, “Hwdlo noqg ann Jejebel sootu tunam mam hoo murty xumnam mam naleqgo hvraqb nyidul doog baloqkam, hogloqkv swrsongv dootayin?”

²³‍Ho Joram tobkurnv hoo kejo ywwtwl Ahajiyanvn begamv, “Ahajiya nga, gwwlyw bogo!”

²⁴‍Hoo Jehu mwwg illiam siiliam pucumnv hoo Joramwg vlw vnyig pengko jaqb vblwqnum, hoqgab uppuqkv mwwg hangam topeqnum hoo mwwg ceriot ho mwv siknum.

²⁵‍Jehu mwam svka bo Bidkarnvn benum, “Mwam naarab gvdwl Jejreel hoqg Nabotwg rongo ho mwam hurpaqto. Hoggab mwwgabto, hwdlo no la ngo mwwg ab Ahabwg taqg-loosaqb xardwkho, hoggub At Sw mwam ceeko dvb birnam mam ngulv mwwpa do;

²⁶‘Hoggub nyijaqkam ngo moiyo Nabot la mwwg ko tuup tulug hijum mam ngo kaapanum—At Sw bibwqdo—ngo nam soq deela jaq so ree daqtayin hvnum.’ Hoqgab At Swg gomcwr bepa ko jaqb, sija mwam naarabto hoo mwam soq deela aoho hurpaqto.”

²⁷‍Hwdlo Judag lvpw at Ahajiya ham kaapel, hoo mwv Bet-haggan daiyab kenum. Hoo Jehu mwam ruqmin gvnv hoo benum, “Mwam kam abto.” Hoo mwam bulv Ibleam lamtag Gur gv ogumho ceriot aoho abnum. Hoo mwv Megiddob kenum hoo hoqho mwv sinum.

²⁸‍Mwwg nyera tulungv mwam ceriot ho Jerusalemb baqknum, hoo mwam mwwg ab tulug Debidg bopam ho liiknum.

²⁹‍Ahab ko tuup Joram vnyw camleq nywkin go swwyikho Ahajiya Judaho pvvb bwwl doorab gvnum.

³⁰‍Hwdlo Jehu Jejreel ho haaikam ham Jejebel tapanum. Hoo mwn mwnwg vnyiqkam toj niilwq tvl hoo mwnwg dum mam mvdar-mvparl tuqlab-tuqcab tvl hoo pupum hoqgv rocoql kaanum.

³¹‍Hoo Jehu haagag toggoqho haada kalam, mwn benum, “Soq si swrso gab haad nvi yv, Jimri no, noqg nyiit atam sony mengn bov?”

³²‍Hoo mwwg nyuqm mam pupumb koodu nv hoo benum, “Hiyv ngam nyemaq ceemin gvdwn? Hiyv?” Nyiipium nyi vnyi-oum go mwam kaalinum.

³³‍Mwv benum, “Mwnwn hurgeq loto.” Hoqgab mwnwn bulv hurgeq lonum. Hoo mwnwg hijumv gurum aoho hoo svpur tulug aoho xvvs-xaatwrnum, hoo mwnwn bulv cumjabnum.

³⁴‍Ho mwv urab haanv hoo dvk-twwknum. Hoo mwv benum, “Sija kaato, soq biilwqnam nyem svma sam naato hoo mwnwn svma liito, hoggab mwn lvpw atwg nyem kov.”

³⁵‍Hvbmabde hwdlo bulv mwnwn svma liidwb haai yikho, bulv mwnwg dumklo alongam la lvpiangam hoo loqpup arongam kaapa twqknum.

³⁶‍Hwdlo bulv hookur layil hoo mwam betam yin, mwv benum, “Soq si At Swg gomcwram mwwg nyera Tisbeg Ilijanvn mwv agam gooknamv, ‘Jejreelwg dwrbu-dwrya ho Jejebelwg gv vdinam ikiv dvtayin,

³⁷‍hoo Jejebelwg svmangv Jejreelwg dwrbu-dwryag rongo tuluho eexa-eeya gob nyitayin, hoqgab soq si Jejebelwg svmangv hvl, nyi akkam bela kuram.’”