Read Nyishi 1 NWD 12 Bible Online

1 NWD 12 - Nyishi bible

1 NWD 12

¹Hoq moodho soq nyi tulu si Jiklag ho Debid dookub haanum, Kiswg ko tuup Soulwg pagoq gab, mwv swrsob gaql yvla maanum. Hoo soq nyi atorbo tulu si mwam nyob pak ho svkanum.

²‍Bulv illy-uppuq ablaq bov hoo uppuq kamla swwxw-lvqminam laqc-lvqbwqb ablaqnum; bulv Benjamin nyi tulungv, Soulwg imiq lwrwngv.

³‍Gibea hoqgv Semaag ko tuup tulu Ahiejer ho Joas bunyiv peelob nyinum; Jejiyel la Pelet, Ajmabet gv ko tuupv; Anatot hoqgv Beraka la Jehu,

⁴‍Gibeon hoqgv Ismaia, cammumwg pengko hoqgv mwv atorbo akwb nyinum hoo cammum nyi aoho nyig-wgbo akwb nyinum; Gedera hoqgv Jerimiya, Jahajiyel, Johanan, Jojabad,

⁵‍Elujai, Jerimot, Bealiya, Sem-ariya, Sepatiya Harup nyiingv;

⁶‍Elkana, Issiya, Ajarel, Joyejer, hoo Jasobeam Kora nyi tulungv;

⁷‍Hoo Gedor hoqgv Jerohamwg ko tuupv Joyela la Jebadiya.

⁸‍Gad nyi tulu hoqgv atorbo la nyob pvx keenbo tulungv svtam lvgab nwwxo pwbwb cilaqbo tulungv Debidg cwwgwl dook nyoro roodwb wnum, bulug nyuqtuq-moorv sony nyot tulu hvb nyinum hoo bulv puutu aoho sudum hvb xargaql yvnum.

⁹‍Ijer peelo bov, vnyi deenv Obadiya, oum deenv Eliya,

¹⁰‍vpy deenv Mismanna, ang deenv Jerimiya,

¹¹‍Ax deenv Attai, kvn deenv Eliel,

¹²‍piin deenv Johanan, kiya deenv Eljabad,

¹³‍wyw deenv Jerimiya, camleq akin deenv Makbannai.

¹⁴‍Soq Gad nyi tulu si sipai saab tulungv; anyo nyootwr bov sipai lwwgam nyig bob nyinum hoo xitor jaqb nyig bov lwwywngam nyig bob nyinum.

¹⁵‍Vnywg otuq pool ho Jordon pobungv nyiipo bvleql tol dooyikho, soq nyi tulu si kvtinb rabnum, hoo lywpag dou-caga haaga nyi tulungam cwrsaq-twqb ruqpaqnum.

¹⁶‍Hoo Benjamin la Judag nyob hoqg nyi tuugin Debidg cwwgwl dook ho haanum.

¹⁷‍Debid bulam kvvrwqtab lvvgwb wnum hoo bulam benum, “Nulv ngam ajinb svka taab haad nyiloqkam, ngoqg hangv nulam loorwq tayin; hvbmabde ngam ngoqg ceebio alaqho nyepin baloqkam, ngoqg alaqkv nyimur dooma sujaqkam, ngulug ab tulug Pwnbov kaatayin hoo nulam yolu ruqtayin.”

¹⁸‍Ho cammum hoqg peelo bo Amasainvn Yalwg haanum hoo mwv benum, “Ngulv noqgv, Debid nga, hoo noqg lvgab, Jesseg ko tuupa! Swrsongv, swrsongv noqg gvku, hoo swrsongv nam svka bo lvgab dooba nvka! Hoggab noqg Pwnbov nam svka do.” Ho Debid bulam svgagvrwqnum hoo bulam mwwg sipai acam hoqg saab gob mvnum.

¹⁹‍Hwdlo mwv Palistan nyi tulug lvgab Soulnvn nyob patab haai yikho, Manasse nyi tulu gon Debidnvn haqpaqnum. (Hvbsujaqkam mwv bulam svka maanum, hoggab Palistan nyi tulungam pvvb bwwl doogbo tulungv tomswr-honynam maanum hoo mwam kanam nampaql begamv, “Ngulug xinam nyi tulungam mwwg nyiit at Soulnvn mwv puqlwq tayin.”)

²⁰‍Mwv Jiklag ho wiyikho, soq Manasse nyi tulu si mwam haqpaqnum: Adna, Jojabad, Jediael, Maikel, Jojabad, Elihu, hoo Jilletai Manasseg nyi lwwyw-lwwyw hoqg peelo tulub nyinum.

²¹‍Nyob pady bo tulungam ceeko nv bulv Debidnvn svkanum, hoggab bulv haakam atorbo hoo sipai gaml jinbo tulu gob nyinum.

²²‍Hoggab aal looxiam Debidnvn nyiingv svka taab haanum, hwdlo sipai tulungv Pwnbog sipai hwdgo mvqlw maady deedib.

²³‍At Swg gomcwr gook jaqb, soq sipai tulu si Soulwg lvpw-hatiam Debidnvn jidwb hvl bulv mwwg dookub Hebron ho haanum.

²⁴‍Juda hoqgv svtam mam la nwwxongam bwwn bo sipai acamv 6,800 go haanum.

²⁵‍Simeon nyi tulu hoqgv haakaml nyob pady bov 7,100 go.

²⁶‍Lebi nyi tulungv hoqgv 4,600 go haanum.

²⁷‍Aaron gv imiqg lvpw atwg ko tuup Jehoiada la mwwg lvgab 3,700 go haanum.

²⁸‍Yaapa haakam bo Jadok, la mwwg ab tulug imiq dvpar hoqgv camnyi leq vnyi go gaml jinbo sipaiyv haanum.

²⁹‍Soulwg imiq lwrw Benjamin nyi tulungv hoqgv 3,000 go, hiyv hoq mood namgub Soulwg nombungam nyemaq ceemin gvnbo tulu ngvkam haanum.

³⁰‍Iprayim nyi tulug bulug ab tulug nombu hoqgv atorl haakam mam yuunamv 20,800 go nyinum.

³¹‍Manasseg nyob papo gon hoqgv 18,000 go nyinum, hiyv dardar jaqb emin mingnv Debidnvn lvpw at gob mvdwb haanum.

³²‍Hoggv Israelv nyita dvn, ham Issakarwg nyi tulungv moodam cengnum, bulug peelo bo tulungv 200 go, hoo bulug lwrw mwlwngv bulug gaml jikho doonum.

³³‍Jebulun sipai tulu hv hoolu deedy nyob panan nwwxo-uppuq lvgab nyob palaq bov Debidnvn svka taab hang pwkinl mwwtw kwlwl haanbov 50,000 go.

³⁴‍Naptali hoqg gaml jinbo sipaiyv 1,000 go hoo svtam mamla nwwxo bwwn bov 37,000 go haanum.

³⁵‍Dan nyi tulu hoqgv 28,600 go nyob palaqbo nyiingv haanum.

³⁶‍Aser nyi tulu hoqgv nyob pamin gvdy bov 40,000 go nyiingv haanum.

³⁷‍Ho Reuben la Gad nyi tulu ngvla Manasseg nyi papo gon Jordon kvtin hoqgv haan bov 120,000 go nyiingv nyinum, bulv nyob panan nwwxo-svtam lvgab haanum.

³⁸‍Soq tulu si, nyob palaqbo nyi tulungv, nyob padwb mwx-mvaq bov, hoq lvg-lvgab Debidnvn Israel bumpw gab lvpw at mvky tvs mwwl, Hebron ho haanum. Hoq hvbkalam Israelwg nyi mwlwngv Debidnvn lvpw at gob mvdwb tuugab lalnum.

³⁹‍Hoo bulv Debid lvgab aal loum go dvmin-twwminl doonum, hoggab bulug vbw-bor tulungv bul gab mwx-mvaq jinum.

⁴⁰‍Hoo bulug lvqry-laqso nyi tulungv Issakar, Jebulun hoo Naptali nyi tulungv dvsam, wtwngam, taoq wtw kabnam mam, roo aaxy losinam mam, roo alangam hoo kutiam, hvvbam hoo sviyangam bulug svdam lvgab, svjin lvgab hoo svpur lvgab naleqgo baqa jinum, hoggab Israel ho hemp-hvnyirnum.