Read Nyishi 1 NWD 14 Bible Online

1 NWD 14 - Nyishi bible

1 NWD 14

¹Hoo Taiyarg lvpw at Hiram Debid dookub pui baqn boam, hoo sidar svvnam, simit mistri-ngam la svvda mistri-ngam kanam tvl mwwg nam namg mvm jinum.

²‍Hoo At Sw mwam Israelwg aoho lvpw at gob mvko jipa kun hvl Debid cengnum, hoo mwv lvpw-hatiam mwwg Israelwg nyiilug emin gab koijaqb yuumnum.

³‍Hoo Debid Jerusalemho naleqgo nywxwngv naanum, hoo Debid naleqgo ko tuupv la ko nyemv doonum.

⁴‍Soq eminam ko tulu si Jerusalemho mwam dwrbuqjnamv: Sammua, Sobab, Natan, Solomon,

⁵‍Ibar, Elisua, Elpelet,

⁶‍Noga, Nepeg, Japia,

⁷‍Elisama, Beeliyada hoo Elipelet.

⁸‍Hwdlo Palistan nyi tulungv Debidnvn Israelwg lvpw at gob xuqpa ku hvl puiyam tapa yin, Palistan nyi mwlwngv Debidnvn meegaql nootu taab caanum. Hvbmabde Debid ham tapa tvl hoo mwv bulam ceeko taab wrwqnum.

⁹‍Palistan nyi tulungv haanum hoo Repaim Lywpa ho nyob paanum.

¹⁰‍Hoo Debid Pwnboam toxnum, “Palistan nyi tulungam ngo nyob patab caaiyin dvi yv? Bulam no ngoqg alaq so jilwq bvi yv?” Hoo At Sw mwam benum, “Caan, hoo ngo bulam noqg alaqho jilwq tayin.”

¹¹‍Hoo Debid Baal-perajimb caanum, hoo Debid bulam hoqho mengnum. Hoo Debid benum, “Pwnbov ngoqg ceebio tulungam iss buqpurnam hvb ngoqg alaq soqgv buqpor mvnum.” Hoqgab hoq nyookam Baal-perajim hvl eminum.

¹²‍Hoo Palistan nyi tulungv bulug pwnbo tulungam hoqho apaq peel wleqnum hoo Debid bulam gaml jiywl hoq tulu ham wm rampaq mvnum.

¹³‍Hoo Palistan nyi tulungv lokta hvraqb lywpa ho nyob panum.

¹⁴‍Hoo hwdlo Debid lokta Pwnbon tox yin, Pwnbov mwam benum, “No bulug kokwb caamabv; hvbmabde bulug taqg-loosaqb wiyiql yvto, hoo balsam svvn tulug dook taqcgon hoqgv nyob pvlwqto.

¹⁵‍Hoo hwdlo no balsam svvn tulug niqtuqho nyi sool wnam yalam tapa yin, ho no atv gorabto, hoggab Pwnbov noqg otuqb wco kunv Palistanwg sipai tulungam mingyum pakun.”

¹⁶‍Hoo Debid Pwnbov mwam gaml jik jaqb nyinum, hoo Palistan nyi tulungam Gibeon hoqgv Gejer namgub bulv mengnum.

¹⁷‍Hoo Debidnvn yuunamv gvda mwlw ho wiyiq kunum, hoo mwam nyob nyi asaq mwlwngam bos sokum mvdwb At Sw mvnum.