Read Nyishi 1 NWD 16 Bible Online

1 NWD 16 - Nyishi bible

1 NWD 16

¹Hoo bulv Pwnbog pvvb uddum mam baqanum hoo Debidg hoq ham dookub mvp jinam tombu uraho ham joopnum, hoo bulv boyuqnam akiam hoo swrso akiam Pwnbog agaho aky jinum.

²‍Hoo hwdlo Debid boyuqnam akiam la swrso akiam jiyum yukun, mwv nyiilungam At Swg emin ho lvqc cinum

³‍hoo Israelwg nyi mwlwngam, nyega ge hoo nyem ge nyiicwr-cwrxiam wtw kabnam pwg, vdin twqpum go hoo roo aaxy romnunam hoqgv wtw mvnam pwg jinum.

⁴‍Ho mwv Lebi nyi tulu go At Swg pvvb uddum agaho bon nyim dvb, xuml-paql nyirabl nyig mvdwb, paqyalinco paqm dvb, hoo Israelwg Pwnbo At Swn xum-paqm dvb xuqlinum.

⁵‍Asap hoqg peelo gob nyinum, hoo mwam dvqsin bov Jakariya, Jeiel, Semira-mot, Jehiel, Mattitiya, Eliyab, Benaia, Obed-edom, hoo Jeiel, hiyv rwwxw-gungga tulungam nyig-wgnum; Asap ludum pup tubnam mam tubnum,

⁶‍hoo nyub Benaia la Jahajiyel lwxiam Pwnbog pvvb uddum agaho tuuliam miqnum.

⁷‍Ho otuqco aalam Debid At Swn paqyalinco paqnam beminam bem dvb Asap nvla mwwg vbw-bor tulungam xuqlinum.

⁸Paqyalinco paqto At Swn; mwwg eminam goqto; mwwg bon nyinam mam nyiilug pengko ho cengm to!

⁹Mwam bemin bijto, mwam bemin bel paqto; mwwg hog mwlw lomdwb bon nyinam tulungam betam to!

¹⁰Mwwg dvrwqbo eminv yuunka; At Swn meegaqbo hangv hwnyir-hvmar nvka!

¹¹At Swn la mwwg atoram meegaqto; mwam dooba kudub lwxiam meegaqto!

¹²Mwwg lomdwb bon nyiknam tulungam, mwwg swrdorxeq tulungam, hoo mwwg pw-hwwl goolin kunam mam mwwgabto,

¹³Mwwg nyera Israelwg ko hosiq, mwwg daalin kunam akwg, Jakubg ko tuup tulu nga!

¹⁴Mwv lak ngulug Pwnbo At Swv; mwwg pw-hwwnamv swcw mwlw si doodwn.

¹⁵Mwwg birnam mam nwrba gob, ho mwwg gaml goopnam mam, lwwyw ko hotam ak xaqb mwwgab to,

¹⁶mwv Abraham lvgab pvvb birnam ak mvnum, mwwg dingr kunamv Aisak,

¹⁷ham mwv Jakubnvn pvvb akwb pwbwb cengm kunum, hv Israelam kuiyum xaqb birl apnam pvvb gob nyin kun,

¹⁸begamv, “Nam ngo Kanaan gvdangam nulam xibwq jiknam otu gob jitayin.”

¹⁹Hwdlo bulv jaqnyo yukho, xipa maaiyikho, hoo hoq gvdab nyiody boodu yikho,

²⁰gvda taqgwn hoqgv gvda taqgonwb gaqgaql yvi yikho, lvpw akwn hoqgv asaq nyiilu dookho,

²¹mwv akjaqkam bulam nyijab-nyiyiq mvmanum; bulug pagoq gab lvpw at tulungam mwv yolu ruqnam,

²²begamv, “Idaqmabv ngoqg xuqnam tulungam, ngoqg nyiqry benbo tulungam un mvg maabv!”

²³At Swn swcw mwlwngv bemin bijto; mwwg ywwlinam mam aal looxiam betam to.

²⁴Mwwg yuunam mam nyi tulug pengko ho, mwwg swrdorxeqb bonam nyinam tulungam nyiilu mwlwg pengko ho bibwqto!

²⁵Hoggab At Sw koibov, hoo vcjaqb paqdwb nyidwn; hoo mwlwg pwnbo pengko hoqgv mwv bos sodynamv.

²⁶Hoggab nyiilug pwnbo mwlwngv murtiv, hvbmabde At Sw doangam pwnum.

²⁷Kaangam mvla yuunamv mwwg agaho doodwn; ator rvla hempv mwwg dookho doodwn.

²⁸Nyob luuxig nyiilu nga, At Swn paqto, yuunam mvla atorv At Swn paqto!

²⁹Mwwg yuudynam emin hoqgv At Swn paqto; akiam bval hoo mwwg agaho haato! Dvrwqbo kangam hoqgv At Swn xumto;

³⁰swcw soqg mwlwngv mwwg agaho tvmdwrto; vjaq, gvda gvt sam pwnum; hoqhv nywywngam biikram.

³¹Hoqgab doangam hemp pomto, hoo swcw sam hwnyir-hvmar mvmto; hoo nyob nyi tulug pengko bem to, “At Sw pvvb bwwl doogdo!”

³²Sa-svlongam rumdwl romd mvto, hoo mwlwngam bwwr mvto; rongongam, hoo hoqho hog mwlw doon boam koijaqb hwrcw mvmto!

³³Ho nyorog svvn mwlwngv hemp gab bemin betayin At Swg agaho, hoggab mwv swcw sam pw-hwwtab haatayin.

³⁴At Swn paqyalinco paqto, hoggab mwv aldo, hoggab mwwg tumanam abiv nwrba gob doodwn!

³⁵Hvla kam beto: “Ngulug ywwlin bo, Pwnboa, ngulam ywwlin tvb, hoo ngulam nyob asaqg pengko hoqgv boocuml hoo naalin tvb, ho ngulv noqg dvrwqbo eminam paqyalinco paqla tayin hoo nam paqnamv yuunka.

³⁶Israelwg Pwnbo, At Swn paqto, kuiyum hoqgv kuiyum nagub!” Ho nyiilu mwlwngam bemto, “Amen!” hoo At Swn paqto!

³⁷‍Hoqgab Debid Asap nvla mwwg vbw-bor tulungam At Swg pvvb uddum agaho aal looxiam pvvb uddum agaho bonam lwxiam nyim dvb pvvl apnum,

³⁸‍hoo Jedutun gv ko tuup Obed-edom nvla mwwg vbw-bor camx leq piin nyiingam, hoo Hosa nyi tulungam toggoq tulungam rvky mvdwb pvvl apnum.

³⁹‍Hoo nyub Jadok nvla mwwg vbw-bor tulungam At Swg gaml xumk pirr agaho Gibeon puutu aog xumk nyookho pvvl apnum

⁴⁰‍ariyum mam aram lwxiam At Swg yugw ho boyuqnam akiam At Sw jim dvb pvvnum, ho bulv At Swg pvvb xeqp ko jaqb hog mwlwngam Israelam gaml jinam mam nyignum.

⁴¹‍Bulug lvgab Heman nvla Jedutunnvn xuqnum hoo asaqkam At Swg emin ho vcjaqb paqyalinco paqm dvb xuqnum, hoggab mwwg tumanam abiv nwrba gob doodwn.

⁴²‍Heman la Jedutun tuuliam miqnum hoo dvrwqbo beminam rwwxw-gungga lvgab beminum. Jedutun gv ko tuup tulungam toggoq gab xuqlinum.

⁴³‍Ho nyiilu mwlwngv nyiicwr-cwrxiv mwwg nammwb wknum, hoo Debid mwwg imiq nombungam lvqc citab wnum.