Read Nyishi 1 NWD 17 Bible Online

1 NWD 17 - Nyishi bible

1 NWD 17

¹Hwdlo Debid mwwg nam ho dooyikho, Debid nyiqry benbo Natannvn benum, “Kaato, ngo sidar svvda nam mvnam si doogw do, hvbmabde At Swg pvvb uddumv tombu lo doogw do.”

²‍Hoo Natan Debidnvn benum, “Noqg hangv hoggub nyinw dvn ham nyita, hoggab Pwnbov noqg lvgab dooba dvn.”

³‍Hvbmabde hoq ai daraho At Swg gomcwrv Natannvn haanum,

⁴“Wn hoo ngoqg nyera Debidnvn betam ta, ‘Soq sib At Sw bedo: No ngoqg nam doogwngam namlo poonyi jiram.

⁵‍Hoggab Israel nyiilungam boolin yuk aal hoqgv soq aal namgub ngo nam uraho doogw kvka ma, hvbmabde ngo tombu akwn hoqgv tombu ak gonwb hoo doogw akwn hoqgv doogw ak gonwb wdul doonum.

⁶‍Israelwg nyi tulu lvgab nyook mwlwho ngo wmin gviyikho, ngo Israelwg nyegam tulungam agam gamg goon mvi yv, hiyam ngo gaml jinum ngoqg Israel nyiilungam sviya koocum mvdwb benam tulu ham hvl ben mvi yv, “Hoggub nulv ngoqgab sidar svvda lvgab namlo pooj maadwn?” ’

⁷‍Hoqgab sija, no soq sam ngoqg nyera Debidnvn beta, ‘Soq sib nyiit At Sw bedo, ngo nam ww hwwta hoqgv sviya rool yvnboam, ngoqg Israelwg nyiilu aoho lvpw atwg ko tuup gob mvdwb naanum,

⁸‍hoo no hogloq xeqb wnum ngo nam doobanum hoo noqg ceebio mwlwngam noqg aga hoqgv mvpaqnum. Hoo ngo noqg eminam koi dvb mvtayin, swcw nvg aoso koi yib emin doonbo ak gob mvtayin.

⁹‍Hoo ngoqg Israelwg nyiilu gab nyookam xuqlin jitayin hoo bulam hoqho pvvtayin, ho bulug atwg nyookho bulam doom tayin hoo nywywngam nyi asaqkv vs-axaq gob nyikram. Hoo otuqho nyinam hvb kwdwr-kodwrbo nyi tulungv bulam hentwr-kaas dvb mvkram,

¹⁰‍ho ngoqg Israel nyiilu aoho ngo nyegam tulungam xuqlin dvk mood hoqgv jaq hvb nyiknum. Hoo noqg ceebio mwlwngam ngo munyiub tayin. Hoq aoho, ngo nam bibwq dvn, At Sw noqgab nam ak mwj tayin.

¹¹‍Hwdlo noqg aalv wnya yukun noqg ab tulug lvgab no wta yukun, noqg atwg ko tuup akwn, noqg hosiq hoqgv noqg kokwb ngo swwrab mvtayin, hoo mwwg lvpw-hatiam ngo mvko jitayin

¹²‍Mwv ngoqg emin lo namlo ak pooj tayin, hoo mwwg lvpw-haty pwqlw dootam mam ngo nwrba xaqb mvko jitayin.

¹³‍Ngo mwwg abwb nyitayin, hoo mwv ngoqg ko tuup gob nyitayin. Mwwg otuqho swwn bo tulu hoqgv ngoqg tumab abynam mam naapaqnam hvb, ngoqg tumab abynam mam ngo mwwg hoqgv naapaqram,

¹⁴‍hvbmabde ngo mwam ngoqg nambu ho hoo ngoqg lvpw-haty ho kuiyum xaqb biimab doom tayin, hoo mwwg pwqlwngam nwrba xaqb mvp jitayin.’”

¹⁵‍Soq gomcwr goonam tulu hvbjaq, hoo soq nyiqry kaanam hvbjaq, Natan Debidnvn agam goonum.

¹⁶‍Ho Lvpw at Debid urab haanum hoo At Sw agaho dootwl hoo benum, “Pwnbo At Swa, ngo hiyv, hoo ngoqg imiqkv hoggv doonum, ho no ngam soq namgub boa pakun?

¹⁷‍Hoo soq si noqg vnyiq kaagaho, Pwnboa soq tulu si anyo dvn. Noqg nyera nombu hoqgv koibo nyiv lengtayin hvl no agam goopa ku, hoo ngam kokwg hotam mam kaakin paku, Pwnbo At Swa!

¹⁸‍Hoo noqg nyerangam koi dvb mvnam sam, soq aoso Debid hoggv nam agam gook bui yu? Hoggab noqg nyerangam no cengdwn.

¹⁹‍At Swa, noqg nyera akwg emin gab, hoo noqg hang mwwlwq koob jaqb, no soq koibo mwlw sam haam paku, hoo soq koibo pagoq tulu sam cengm dvb jipa ku.

²⁰‍At Swa, noqg hvb nyinbo pwnbo dooma, hoo noqg lvvgho asaq pwnbo dooma, ngulug atwg nyuru soqgv ngulv tat kuba.

²¹‍Hoo noqg Israelwg nyiilu hvb hiyv doodwn, swcw soqgv nyob akin gon Pwnbov wnv mwwg nyiilu gob nyim dvb pvlyw pan, noqg atwg eminam koi dvb la swrdorxeq pagoqkam nyinv, noqg nyiilu aga hoqg nyob tulungam ruqpaq jinum, ho Ijipt hoqgv no bulam pvlyw maan mvi yv?

²²‍Hoo no atv noqg Israel nyiilungam noqg nyiilu gob nwrba gob doom dvb mvp kunum, hoo At Swa, no bulug Pwnbob nyiknum.

²³‍Hoo sija, At Swa, noqg nyerangam la mwwg imiq gab noqg gomcwr gooknam ham nwrba xaqb biim mvmab nyim tvbv, hoo noqg goonam hvbjaq hog mwlwngam nyim tvbv,

²⁴‍hoo noqg eminam nwrba xaqb yuumwl hoo betayin, ‘Israelwg Pwnbo, nyiit At Sw, Israelwg Pwnbov,’ hoo noqg nyera Debidg imiqkam noqg agaho mvko pvvj tayin.

²⁵‍Hoggab no, ngoqg Pwnbo, ho noqg nyerangam betaml ho mwwgab no nam ak mwj tayin hvnum. Hoqgab noqg nyerangv soq swgwnam sam noqg agaho swgw dvb haaknum.

²⁶‍Hoo sija, At Swa, no Pwnbov, hoo noqg nyerangam no soq albo bvrwq sam dingr paku.

²⁷‍Hoqgab sija no anya mwwpa gvdwl noqg nyera imiqkam lvqc citbv, ho hoqham kuiyum xaqb noqg agaho doom tvbv, hoggab hoqhv no su, At Swa, hiyv lvqcam ciknum, hoo hoqhv nwrba xaqb xinam gob dootayin.”