Read Nyishi 1 NWD 18 Bible Online

1 NWD 18 - Nyishi bible

1 NWD 18

¹Soq kokw so Debid Palistan nyi tulungam mviyanum hoo bulam mwwg uraho doomnum, hoo mwv Gat la hoqg nampam tulungam Palistan nyi tulug alaq hoqgv naareq kunum.

²‍Hoo mwv Moabam mviyanum, hoo Moab nyi tulungv Debidg nyerab swwknum hoo gvda nyoogangam baqa jinum.

³‍Debid mwwg mwiyw-mvcnam mam Iupratas pobuho mvp taab wiyikho, Joba-Hamatwg lvpw at Hadadejer nvkam mwv mviyanum.

⁴‍Hoo Debid mwwg hoqgv 1,000 go ceriot tulungam, 1,700 svpur xarg bo nyi tulungam, hoo 20,000 go lvpia wnbo sipai tulungam naareq kunum. Hoo Debid 100 ceriot svpuram ap tvl hoo mwlwngam lukum-laqca dvb mvnum.

⁵‍Hoo hwdlo Damaskaswg Siriya nyi tulungv Jobag lvpw at Hadadejernvn svka taab haan boam, Debid 22,000 go Siriya nyi tulungam mengnum.

⁶‍Ho Debid Damaskaswg Siriya svmcwngam hwwiyuml doognum, hoo Siriya nyi tulungv Debidg nyerab swwknum hoo gvda nyoogangam baqa jinum. Hoo Debid mwv hogloq-hogloqb wjaqkam At Sw mwam mviya mvdwb ator jinum.

⁷‍Hoo Debid Hadadejerwg nyera tulug hun svtam baqnam mam naareqnum hoo hoq tulu ham Jerusalemho baqanum.

⁸‍Hoo Hadadejerwg bopam tulu Tibat hoqgv hoo Kun hoqgv Debid naleqgo tamangam naaknum. Hoq lvgab Solomon tama iss sviyinam hoo rwwda tulungam hoo tama dupum-dvrab pam mvnum.

⁹‍Hwdlo Hamatwg lvpw at Tou, Jobag lvpw at Hadadejerwg sipai tulungam Debidg mviyanam mam tapa yin,

¹⁰‍mwv mwwg ko tuup Hadoramnvn Lvpw at Debid dookub kanam tvl, ho mwwg al-kornam mam tox mvnum hoo mwam aljaqb nyipa hvl paqnum hoggab mwv Hadadejernvn nyob paiya paku, hoggab Hadadejer lwxiam Tounvn nyob paky twqnum. Hoo mwv hoolu deedy dupum-dvrab pam hunam, rupam, hoo tamangam jilwqnum.

¹¹‍Hoq tulu ham kam Lvpw at Debid At Swn gvqlwqnum, ho mwv nyob asaqkam, Idom, Moab, Ammon, Palistan hoo Amalek nyi tulu hoqgv mviya tvl rup hoo hun mwwg naak nammam kam darxaq tvl lvkin gob gvqlwqnum.

¹²‍Hoo Jeruiyag ko tuup Abisai Al Lywpa ho Idom nyi tulungam 18,000 go mengnum.

¹³‍Ho mwv Idom mam hwwiyum tvl doognum; hoo Idom nyi mwlwngv Debidg nyerab swwknum. Hoo Debid mwv hogloq-hogloqb wjaqkam At Sw mwam mviya mvdwb ator jinum.

¹⁴‍Hoqgab Debid Israel bumpwngam pvvb bwwl doognum, hoo mwv lootw bvla homyin dvb mwwg nyiilu mwlwngam pvvb bwwi-bvcal doognum.

¹⁵‍Jeruiyag ko tuup Joabnvn sipai tulungam kaam dvb jinum; hoo Ahiludwg ko tuup Jehosapatnvn xiqtul ap mviya dvb jinum;

¹⁶‍hoo Ahitubwg ko tuup Jadok nvla Abiyatarwg ko tuup Ahimeleknvn nyub gob mvnum; hoo Sabsa svkretvri gob nyinum;

¹⁷‍hoo Jehoiadag ko tuup Benaianvn Keret nyi tulungam la Pelet nyi tulungam kaam dvb jinum; hoo Debidg ko tuup tulungv saab tulug pengko ho peelo gob nyil lvpw atwg bonam nyignum.