Read Nyishi 1 NWD 19 Bible Online

1 NWD 19 - Nyishi bible

1 NWD 19

¹Soq kokw so Ammon gv lvpw at Nahas siknum, hoo mwwg kwlib mwwg ko tuupv pvvb bwwl doognum.

²‍Hoo Debid benum, “No Nahaswg ko Hanunnvn anyangam kaakin tayin, hoggab mwwg abv ngam anyangam kaakinum.” Hoqgab Debid pui baqn boam kanaml mwwg abwg pagoqkam mwam bet-bela mvnum. Hoo Debidg nyera tulungv Ammon nyi tulug Hanun gvdaho mwam bet-bela taab haanum.

³‍Hvbmabde Ammon gv nyi tulungv saab tuupv Hanunnvn benum, “No hvb mwwd yv Debid nam bet-bela boam kanaml ho mwv noqg abam xid-paqdwb nyid nvi yv? Mwwg nyera tulungv noqg dookub haan si hvb nyiloqkam nam kvvi-kaamil kaam dvb hoo gvdangam mvqky-maqlam mvl hoo ham mviya dvb nyima yv?”

⁴‍Hoqgab Hanun Debidg nyera tulungam nootunum hoo bulug nvm mam reqpaq tvl hoo bulug xarpo vjam lvpa ra ho peeko tvl, hoo bulam kanam tvl wwm kunum,

⁵‍hoo bulv wknum. Hwdlo hoqham Debidnvn betam yin, mwv bulam kvvrwq mvdwb pui baqn bo tulungam kanamnum, hoggab nyi tuluhv vcjaqb hvnywnum. Hoo lvpw atv benum, “Nulug nvmv buqlin maad deedib Jeriko ho doonu to hoo hookur to.”

⁶‍Hwdlo Ammon nyi tulungv bulv Debidg ceebio gob nyipa ku hvl cengyi kukam, Hanun la Ammon nyi tulungv Mesopotamiya hoqgv, Aram-maaka hoqgv hoo Joba hoqgv ceriot tulungam la svpur xarg bo nyi tulungam nyemaq goqdwb rup 1,000 telent go jilwqnum.

⁷‍Bulv 32,000 go ceriot tulungam hoo Maakag lvpw at lvgab mwwg sipai tulungam nyemaq goqnum, ho bulv haalayil Medebag otuqho svmcw mvl doonum.

⁸‍Hoo hwdlo Debid hoqham tapa yin, mwv Joabnvn la atorbo sipai nyi mwlwngam kanamnum.

⁹‍Hoo Ammon nyi tulungv nyob pvrwq mins ko haagag toggoqho hvvnwqnum, hoo lvpw atam tulungv svka taab haan bo tulungv bulv nyoro lvpa ho dooiyanum.

¹⁰‍Hwdlo Joab kaaknamv mwam nyob pvrwq deenbov otuq bvla kokwb dooiyikam, ho mwv mwlwngam alyanbo Israel nyi tulungam daalinv hoo Siriya nyi tulungam ceekol nyob pvrwq mvdwb bulam daqmnum.

¹¹‍Ho hvb xuqngo mwwg nyi tulungam mwv mwwg bor Abisainvn nyig mvdwb jitwl, hoo bulv Ammon nyi tulungam nyob pvrwq dvb daqmnum.

¹²‍Hoo mwv benum, “Siriya nyi tulungv ngoqgab vigo ator baloqkam, ho nulv ngam svka laka, hvbmabde Ammon nyi tulungv nulgab vigo ator baloqkam, ho ngo nulam haal svka tayin.

¹³‍Atorto, hoo kuj ngulug nyiilu gab la ngulug Pwnbog bopam tulu gab, ngulug atorsam tortuj hoo At Sw hoggv mwv al kaapa dvn ham mwam nyij yin pv.”

¹⁴‍Hoqgab Joab la mwwg lvgab dooba bo nyiilungv Siriya nyi tulungam nyob pvrwq taab ogumb hvvnwqnum, hoo bulv mwwg aga hoqgv keknum.

¹⁵‍Hoo hwdlo Ammon nyi tulungv Siriya nyi tulug kenam mam kaapa yin, bulv kam Joabg bor Abisaiywg aga hoqgv keknv hoo bopam urab haanum. Ho Joab Jerusalemb haaknum.

¹⁶‍Hvbmabde hwdlo Siriya nyi tulungv bulam Israelv mviya paku hvl cengyi kun, bulv pui baqn boam kanam tvl Iupratas lvvg hoqg Siriya nyi tulungam, Hadadejerwg sipai saab Sopaknvn bulug otuqb hookum mvdwb goqanum.

¹⁷‍Hoo hwdlo ham Debidnvn betam yin, mwv Israel mwlwngam goqkumnum hoo Jordonam rabnum hoo mwwg sipai tulungv bulam ceekol nyob panum. Hoo hwdlo Debidnvn Siriya nyi tulungam nyob pvrwq dvb soorwq yin, bulv mwwg lvgab nyob panum.

¹⁸‍Hoo Siriya nyi tulungv Israel aga hoqgv kenum, hoo Debid Siriya nyiingam mengnum, ceriot xarg bov 7,000 go, lvpiab wnbo sipai tulungam 40,000 go mengnum, hoo bulug sipai saab Sopaknvn kam mengnum.

¹⁹‍Hoo hwdlo Israelv bulam mviya kunam mam Hadadejerwg nyera tulungv kaapa yukun, bulv Debid lvgab swrso pvvbam mvnum hoo mwwg nyera-paqn gob swwknum. Hoqgab Siriya nyi tulungv Ammon nyi tulungam lokta svkal ywwlin dukub mwwk maanum.