Read Nyishi 1 NWD 21 Bible Online

1 NWD 21 - Nyishi bible

1 NWD 21

¹Ho Uiyv Israelam ceekol daqnum hoo Debidnvn nwqduq tvl Israelam xika mvnum.

²‍Ho Joabnvn la gaml jinbo sipai tulungam Debid benum, “Wn, Israelam Beerseba hoqgv Dan namgub xika ta, hoo ngam puiyam baqa ta, ho bulv hog hwd dvn ham ngo cengkam yin pv.”

³‍Hvbmabde Joab benum, “At Sw nyiilungam lwwg aoho lwwg ya naleqgo bulam vbw jignvka! Ngoqg bir lvpw ata, soq bul mwlw si, ngoqg bir atwg nyera tulu maai yv? Hog gab ngoqg bir at soq pagoq sam nyidwb mwwdwn? Hog gab soq nyinam si Israelam nyimur mvta dvn?”

⁴‍Hvbmabde Joabnvn lvpw atwg gomcwrv ceekol mviyanum. Hoqgab Joab Israel mwlwngam wiyiqnum hoo Jerusalemb hookur kunum.

⁵‍Hoo Joab nyiilungam xikanam mam Debidnvn jinum. Israel ho lyoqr orioq bwwlaq bo nyegangv 1,100,000 go doonum, hoo Judaho lyoqr orioq bwwlaq bov 470,000 go doonum.

⁶‍Hvbmabde mwv Lebi ngamla Benjamin nyobam xitaq maanum, hoggab Joab lvpw atwg gamlam tamanum.

⁷‍Hvbmabde Pwnbo soq pagoq sam oyumnum hoo mwv Israelam mengnum.

⁸‍Hoo Debid Pwnbon benum, “Ngoqg soq pagoq nyiknum si ngo koi jaqb nyic nyipa ku. Hvbmabde sija, anya mwwpa gvdwl noqg nyera nyixiaqkam naapaq tvbka, hoggab ngo paca loodab nyit kuba.”

⁹‍Hoo At Sw Debidg nyiqry benbo Gadnvn agam goonv, begamv,

¹⁰“Wn hoo Debidnvn beta, ‘Soq sib At Sw bedo, Pagoq goqoum go ngo nam jitayin; Oum hoqgv akwn xuqto, ho noqgab ngo ham nyitayin.’”

¹¹‍Hoqgab Gad Debid dookub haanum hoo mwam benum, “Soq sib At Sw bedo, ‘Hoggv no mwwlwq pan xuqto:

¹²‍vnyw nywum go dwr-kanongam yv, ho maalo noqg ceebio tulungam no pool borum gob lyoqr orioq lvgab mviya kob yv, ho maalo At Sw gumtw lvgab Israel gvda bumpw ho aal loum go iicw-tobum dooi lvgab gvda nyiingam mingtwr mvb yv.’ Sija hwwbwqto hoggv ngo wkur layil ngam kanam boam ngo betam tayin.”

¹³‍Ho Debid Gadnvn benum, “Ngo vcjaqb mwwdwq duku. Ngam At Swg alaq uraho haam tvbv; hoggab mwwg aya mwwpanamv koi dvn, hvbmabde ngam nyi alaqho haam mvmabv.”

¹⁴‍Hoqgab At Sw iicw-tobum dooiyam Israel aoho kanamnum, hoo Israel nyiingv 70,000 go sinum.

¹⁵‍Hoo Pwnbov gumtwngam Jerusalem mam twrm dvb kanamnum, hvbmabde hwdlo mwv ham twryum taikoam, At Sw kaanum, hoo mwv hentwr-kaasam nyim mvma dvb mwwkurnum. Hoo mwv twryum dvb bon nyidubo gumtwngam benum, “Hoqhv jot paku; sija noqg alaqkam loqtum tuku.” Hoo At Swg gumtwngv Jebus nyi akwg Ornanwg jurpy deela ho doonum.

¹⁶‍Hoo Debid mwwg vnyiqkv koodul kaanamv At Sw gumtwngv doa gvla swcw nvg pengko ho doqdunam, hoo mwwg alaqkv lyoqr orioqkam puseq tvl Jerusalem aoho tvdaqnum. Ho Debid la nyiixa tulungv tuila vjam kootwl bulug nyuqm mam kedho nywtinum.

¹⁷‍Hoo Debid Pwnboam benum, “Ngo ma yv nyiilungam xika mvdwb gaml jilin bov? Ngo lak so sam nyic nyipa kun, hoo koijaqb almanam nyipa kun. Hvbmabde soq sviya tulu si bulv hoggv nyijnum? Anya mwwpa gvdwl noqg alaqkam, ngoqg Pwnbo At Swa, ngam ceeko to hoo ngoqg abwg imiq dvparam ceeko to. Hvbmabde soq swlin-mominam sam noqg nyiilug aoho haam mvmabv.”

¹⁸‍Hoq moodho At Swg gumtwngv Gadnvn gaml jitwl Debidnvn bemnum, Jebus nyi akwg Ornanwg jurpy deela ho Debid caagdvl hoo At Sw gab yugw ak mvdwb nyido.”

¹⁹‍Hoqgab At Sw emin ho Gadwg agam googam gab Debid caanum.

²⁰‍Hoq moodho Ornan wtw am jurpy deela ho yvnum. Mwv tobkurnum hoo gumtwngam kaapanum, hoo mwwg lvgab yvba bo mwwg ko tuup vpiv la mwv atv kvsnum.

²¹‍Debid Ornan dookub haaikam, Ornan Debidnvn kaanv hoo kaapanum hoo jurpy deela hoqgv lengnum hoo mwwg nyuqm mam kedho nywtinl Debidnvn modunum.

²²‍Hoo Debid Ornannvn benum, “Jurpy deela sam ngam jitbv, hoqho ngo At Sw gab yugw ak mvtayin—soqg koram ngo bumpwb jitayin—ho soq swlin-mominam si nyiilu hoqgv wpaq kamyi nvpv.”

²³‍Ho Ornan Debidnvn benum, “Ham naato, hoo ngoqg bir lvpw atv hoggv mwwg gab al kaapa dvn ham nyin to. Kaato, hvvb sam boyuq aky gab hoo jurpy riinnan pvtaq tulu sam wswb hoo wtw am sam dvs aky gab jitayin; ngo soq mwlw sam jigyin.

²⁴‍Hvbmabde Lvpw at Debid Ornannvn benum, “Ma, hvbmabde ngo hoq tulu ham koram jot dvb jil rvtayin. Noq gam ngo At Sw gab naala ram, ho boyuqnam aky jidwb hog kor jimab naaram.”

²⁵‍Hoqgab Debid deelangam xikanv Ornannvn 600 sikil hun go jinum.

²⁶‍Hoo Debid hoqho At Sw gab yugw ak mvnum hoo boyuqnam aky tulungam la swrso akiam jinum hoo At Swn goqnum, hoo At Sw mwam ao gvda hoqgv yugwg boyuqnam akiam wmmwb gual mwam wm lvgab birwqnum.

²⁷‍Ho At Sw gumtwngam gaml jinum, hoo mwv mwwg lyoqr orioqkam buqxab xwqkurl xwqlwqnum.

²⁸‍Hoq moodho, hwdlo Debid At Sw Jebus nyi akwg Ornan jurpy deela ho mwam birwqnam mam kaapa yin, mwv hoqho pwr jinum.

²⁹‍Hoggab At Swg xumk pirram Mojes deexa-raraho mvknamv la yugwg boyuqnam aky jinamv hoq moodho Gibeon puutu aoho dooxiqnum,

³⁰‍hvbmabde Debid hoq agaho Pwnbon tox taab haanyi maanum, hoggab mwv At Sw gumtwg lyoqr orioqkam bosnum.