Read Nyishi 1 NWD 22 Bible Online

1 NWD 22 - Nyishi bible

1 NWD 22

¹Ho Debid benum, “Soq so At Swg dvrwq namlongam mvtayin hoo soq yugw so Israel gab boyuqnam akiam jitayin.”

²‍Israel gvdaho nyoodo nyi doonbo tulungam Debid lvkin gob goqkum mvdwb gaml jinum, hoo mwv bulam Pwnbog dvrwq namlongam nam mvn dvb wlw taqlinl pvmwq mvdwb gaml jinum.

³‍Debid dvcw xublo gab la toggoq tulug viyap yvbgw tulungam paqyinnan dvb naleqgo dvvcwngam jinum hoo tamangam kam naleqgo xila maadwb jinum,

⁴‍hoo sidar svvtaqkam xila maadwb jinum, hoo Sidon nyi tulungv la Taiyar nyi tulungv Debidnvn sidar svvtaqkv naleqgo baqa jinum.

⁵‍Hoggab Debid benum, “Ngoqg ko tuup Solomon yaapa xiqdo hoo hog pwbw-rolo maata, hoo At Sw gab nam mvtanam hv hoggub nyijaqkam mwlwngam kangam yaadwb hoo gvda-gvt so mwlwg yuunam gob nyidwb nyido. Hoqgab ngo nammam mvn mvdwb mwx-mvaql ap jitayin.” Hoqgab Debid mwwg sima taab naleqgo nam mvnnan svvda-teriam door tiol ap jinum.

⁶‍Ho mwv mwwg ko tuup Solomonnvn goqnv hoo mwam Israelwg Pwnbo, At Swg dvrwq namlongam mvm dvb gorgy tolwqnum.

⁷‍Debid Solomonnvn benum, “Ngoqg ko tuup, ngoqg Pwnbo, At Swg emin ho ngoqg hangv namlo ak mvdwb mwwnum.

⁸‍Hvbmabde At Swg gomcwrv ngam begamv, ‘No naleqgo ywlw twwpa ku hoo koibo nyobam papa ku. No ngoqg eminho nam mvnyi ram, hoggab no naleqgo swcw nvg aoso ywlw twwpa ku.

⁹‍Kaato, ko tuup ak nam dwrbuqj tayin hoo mwv swrsob dootayin. Mwwg diis-paap ceebio tulu hoqgv mwam ngo swrsob doonu mvdwb jitayin. Hoggab mwwg eminam Solomon hvl pvvtayin, hoo ngo swwd aalam Israelam swrsob jampwb doom dvb jitayin.

¹⁰‍Mwv ngoqg emin gab nam ak mvtayin. Mwv ngoqg ko tuupwb nyitayin, hoo ngo mwwg abwb nyitayin, hoo ngo mwwg xinam pwqlwngam Israel ho nwrba xaqb mvko jitayin.’

¹¹“Ngoqg ko tuup, mwv noqg pagoqkam agam gooknam hvb, sija, At Sw noqg lvgab dooba nvka, noqg Pwnbo At Swg nammam niqtuq mvlin mvdwb nam svka gvnka.

¹²‍At Sw arro nam mwwlaqkam la cenglaqkam jignvka, hwdlo mwv nam Israel aoho pvvb bwwl doog mvdwb jiyikam, noqg Pwnbo At Swg pvvbam bugil swwla ka.

¹³‍Ho Israel gab Mojesnvn At Swg gaml jinam mam no hengab jaqb nyij-mujam hoo pvvb tulungam nyib nyiloqkam no swwta-geetayin. Ator to hoo haakam to. Bos maabv; mooka-saq maabv.

¹⁴‍Ngo vcjaqb hentwr henl At Swg dvrwq namlo gab 100,000 telent hun go, lwwyw lww-camg rup go, hoo tamangam hoo yoqdwram xila maadwb naap paku, hoq hvbkalam naleqgo svvtaqkam la wlwngam ngo naap pakun. Hoq tulu lvgab no vbw-ata gvnka.

¹⁵‍Noqg lvgab naleqgo bonam nyinbo nyiingv doodwn: wlw taqnbo tulungv, simit mvnbo tulungv, svvtaq jem mvnbo tulungv, hoo hoolu deedy jem mvlaq bov xila maab doodwn,

¹⁶‍hunam, rupam, tamangam, hoo yoqdwr bonam pwbwb nyilaq bov doodwn. Gorab to hoo bonam nyito! At Sw noqg lvgab dooba dvn!”

¹⁷‍Mwwg ko tuup Solomonnvn svka mvdwb Debid Israel nyiilo mwlwngam kam gaml jil begamv,

¹⁸“Noqg Pwnbo At Sw noqg lvgab dooba maai yv? Hoo mwv nam taqg-loosaq hoqgv swrsob doom dvb jima yv? Hoggab mwv gvdaho doonbo nyi tulu mwlwngam noqg alaq uraho jilwq pakun, hoo gvdangv At Sw gvla mwwg nyiilug uraho doodkun.

¹⁹‍Hoqgab sija noqg mwwnam mvla hangv noqg Pwnbo At Swn meegaq to. Gorabto hoo Pwnbo At Swg dvrwq namlongam mvto, ho hoqho At Swg pvvb uddum mam la Pwnbog dvrwqbo dupum-dvrab pam At Swg eminho dvrwq namlo mvnam urab bvqlwq dvb nyitayin.”