Read Nyishi 1 NWD 23 Bible Online

1 NWD 23 - Nyishi bible

1 NWD 23

¹Hwdlo Debid nyekaml swwtar yukho, mwv mwwg ko tuup Solomonnvn Israelwg aoho lvpw at gob mvnum.

²‍Debid Israelwg nyiilo bo mwlwngam la nyub tulungam hoo Lebi nyi tulungam goqkumnum.

³‍Lebi nyi tulu hoqgv vnyw cammum boam la hoq odum gam xikal xikumnamv nyiingv 38,000 go.

⁴“Hoq boloqkv camnyi leq vpy lwwyw gon,” Debid benum, “Nulv At Swg dvrwq namlongam bonam nyig gvnka, ho 6,000 go ham saab bvla nyegam gob mvnum,

⁵‍toggoqkam rvky bo tulungv 4,000 go, hoo 4,000 gon rwwxw-gungga lvgab At Swn bemin bel xumg-paqg mvdwb ngo mvnum.”

⁶‍Hoo Debid Lebi ko tuup tulu ham jak oum gob mvpin-mvranum: Gerson, Kohat, hoo Merari.

⁷‍Gersonwg ko tuupv Ladan la Simei.

⁸‍Ladan ko tuup tulungv: Jehiel peelo bob nyinum, hoo Jetam, hoo Joyel oum deenv.

⁹‍Simeig ko tuup tulungv: Selomot, Hajiel, hoo Haran bul oumv. Soq tulu si Ladanwg ab dvpar hoqg peelo bov.

¹⁰‍Hoo Simeig ko tuup tulungv: Jahat, Jina, hoo Jeus hoo Beriya. Soq tulu si Simeig ko tuup vpiv.

¹¹‍Jahat peelo gob nyinum, hoo Jija dvqsinb nyinum; hvbmabde Jeus la Beriya bunyiv ko tuup viyig doomanum, hoqgab bulam ab akinwg nombu gob xinum.

¹²‍Kohat gv ko tuup tulungv: Amram, Ijar, Hebron, hoo Ujjiyel, bul vpiv.

¹³‍Amramwg ko tuup tulungv: Aaron la Mojes. Aaronnvn mwlwngam dvrwq yaanbo pagoqkam darxaql nyig mvdwb xuqbwql apnum, ho mwv la mwwg ko tuup tulungv nwrba xaqb At Swg agaho aky jim dvb la mwam bon nyim jidwb hoo nwrba xaqb mwwg eminho lvqcam gamlin mvdwb xuqpnum.

¹⁴‍Hvbmabde Pwnbog nyi Mojes ko tuup tulungam Lebig nyob dvpar pengko ho eminum.

¹⁵‍Mojesg ko tuup tulungv: Gersom la Eliejer.

¹⁶‍Gersomwg ko tuup tulungv: Sebuyel peelo bo akv.

¹⁷‍Eliejerwg ko tuup tulungv: Rehabiya peelo bov. Eliejer asaq ko tuup doomanum, hvbmabde Rehabiyag ko tuupv mvqlwnum.

¹⁸‍Ijarg ko tuup tulungv: Selomit peelo bov.

¹⁹‍Hebronwg ko tuup tulungv: Jeriya peelo bov, Amariya vnyi deenv, Jahajiyel oum deenv, hoo Jekameam vpy deenv.

²⁰‍Ujjiyel ko tuup tulungv: Mika peelo bov hoo Issiya vnyi deenv.

²¹‍Merarig ko tuup tulungv: Mali la Musi. Mali ko tuup tulungv: Eleajar la Kis.

²²‍Eleajar ko tuup doomab sinum, hvbmabde ko nyem aronum; hoqgab bulug imiq lwrw Kisig ko tuupv bulam nyem naanum.

²³‍Musig ko tuup tulungv: Mali, Eder, hoo Jerimot, bul oumv.

²⁴‍Soq ko tuup tulu si Lebingv bulug ab tulug nombu tulu hoqgv, bulug ab tulu nombu tulug peelo bo tulungam, bulug imiq dvpar hoqg nyiimin vxiam, vnyw camnyi gola hoo ham akam yaanbo nyi vxiam hiyv At Swg dvrwq namlo ho bonam nyilaqbo hvnam mam emin xiqlwql apnum.

²⁵‍Hoggab Debid benum, “Israelwg Pwnbo, At Sw, mwwg nyiilungam swrsongam jipa kun, hoo mwv Jerusalemho nwrba xaqb doodwn.

²⁶‍Hoo Lebi nyi tulungv xumk pirr hoqg nyin-mvnnan dupum-dvrab pam joodwb nyikram.”

²⁷‍Hoggab Debidg vtwr-anya agam hoqgv tabnyiloqkam Lebi ko tuup tulungam vnyw camnyi gola hoo ham akam yaanbo tulu ham bon nyim dvb xiqlwq twqdwb nyinum.

²⁸‍Hoggab bulug nyisv hvbnyiloqkam Aaron gv ko tuup tulungam At Swg dvrwq namlo bon nyik ho svka mvdwb nyinum, ho baag tulungam la pwqlw tulungam hvvmin mvdwb nyinum, ho dvrwqbo dupum-dvrab tulu ham mvxaq-mvraq dvb nyinum, hoo Pwnbog dvrwq namlo ho hoggv bon nyisv doonam ham nyimin gvdwb doonum.

²⁹‍Bulug bon nyisv joopwl kaakinam wtwngam, wtw dvs akiam, opap kiilwq maab wtw mvnam akiam, wtw cwwnam akiam, kuty mviyo tvl aky jinam mam, hoo anyo-koi vgw-hvrab pam kam xika dvb svka yaanum.

³⁰‍Hoo bulv ar roxiam daqtwl At Swn paqyalinco hvl hoo xuml-paql doonum, hoo hoqhvb kalam ariyum mam kam nyinum,

³¹‍hoo hwdlo lajaqkam boyuqnam akiam Doonu aalam, nit pool tulungam hoo durum dwd aal tulungam At Swn aky jiyikam, bulam hoggv nyim dvb jinam hvbjaq, At Swg agaho lwxiam nyil doonum.

³²‍Hoqgab bulv kvvrwq minsko tombungam la dvrwq namlongam, kviyw-tadal doognum, hoo bulug vbw-bor, Aaron gv ko tuup tulungam At Swg dvrwq namlo ho bon nyik ho svka mingnum.