Read Nyishi 1 NWD 26 Bible Online

1 NWD 26 - Nyishi bible

1 NWD 26

¹Toggoqkam rvky mvdwb mwbwqnam dvparv soq tulu si: Korag nyi tulu hoqgv, Kore gv ko tuup Meselemiya, Asapwg ko tuup tulu hoqgv.

²‍Hoo Meselemiya ko tuup tulu go doonum: Jakariya vbw cociqkv, Jediael vnyi deenv, Jebadiya oum deenv, Jatniel vpy deenv,

³‍Elam ang deenv, Jehohanan ax deenv, Eliehoenai kvn deenv.

⁴‍Hoo Obed-edom ko tuup tulu go doonum: Semaiya vbw cociqkv, Jehojabad vnyi deenv, Joa oum deenv, Sakar vpy deenv, Netanel ang deenv,

⁵‍Ammiel ax deenv, Issakar kvn deenv, Peulletai piin deenv, hoggab mwam Pwnbov lvqc cinum.

⁶‍Mwwg ko tuup Semaiya hoqgv kam ko tuupv doonum, bulv bulug ab tulug nombu tuluho pvvb bwwl doog bob nyinum, hoggab bulv koi jaqb nyilaq-belaqbo nyiib nyinum.

⁷‍Semaiyag ko tuupv hoqgv: Otni, Repael, Obed hoo Eljabad, hiyvg vbw-bor, Elihu la Semakiya nyilaq-belaq bo nyiib nyinum.

⁸‍Soq mwlw si Obed-edom ko tuup tulungv hoo hoq lvgab bulug ko tuup tulungv la bulug vbw-bor tulungv koi jaqb bon nyilaq dvb pwbwnum; Obed-edom hoqgv nyiingv camx leq vnyi go.

⁹‍Hoo Meselemiya ko tuup tulu gola vbw-borv, hoo pwbw bo nyiingv camleq piin go doonum.

¹⁰‍Hoo Merarig ko tuup tulu hoqgv Hosa, ko tuup tulu go doonum: Simri peelo bo akv (hoggab mwv tuup vbw cociq maas jaqkam, mwwg abv mwam peelo bo gob mvnum),

¹¹‍Hilkiya vnyi deenv, Tebaliya oum deenv, Jakariya vpy deenv: Hosag ko tuup tulu ngvla vbw-borv camleq oum go doonum.

¹²‍Bulug vbw-bor tulungv At Swg dvrwq namlo ho bon nyinam hvbkalam bulug peelo bo tulungv toggoqkam rvky bo tulungam at-atwg bonam mwbwq jinum.

¹³‍Hoo bulv anyo ge hoo koi ge bulug ab tulug dvparam bulam aiyin lvkin dvb toggoq tulungam rvky mvdwb tak cingnum.

¹⁴‍Dou-cagag gab Selemiyanvn tak cinglinum. Bulv mwwg ko tuup aljaqb tomswr-hony bo Jakariya gab tak cingnum, hoo mwam nyoodum gab tak cinglinum.

¹⁵‍Obed-edomnvn nyooko gab tak cinglinum, hoo mwwg ko tuup tulungam toggoq nammam rvky yaan bob jibwqnum.

¹⁶‍Ho Suppim la Hosanvn dou-haagag Salleketwg toggoq odum yaab caanbo lamta gab tak cinglinum. Rvky bov rvky boam cengmin sunum.

¹⁷‍Dou-caga daiya ho aal looxiam nyi ax go, ho nyoodum daiya ho aal looxiam nyi vpy go, nyooko daiya ho aal looxiam nyi vpy go, hoqg hvbkalam toggoq namho vnyi gogab rvky boam doom dvb jinum.

¹⁸‍Hoo dou-haagag baag lamta gab vpy go hoo baag looda gab vnyi go daqmnum.

¹⁹‍Kora nyi tulu ngvla Merarig ko tuup tulug pengko ho soq tulu sam toggoqkam rvky bo tulungam mvdwb jibwqnum.

²⁰‍Hoo Pwnbog dvrwq namlog gumn noosungam la darxaqnam aky tulungam darxaq kaaya mvdwb Lebi nyi tulu hoqgv Ahijanvn xuqlinum.

²¹‍Ladanwg ko tuup tulu gv, Gerson nyi tulu ko tuup tuluhv Ladan hoqgv, ab tulug nombu tulu hoqg peelo bov, hoo Gerson nyi Ladan galoqkv: Jehiel.

²²‍Jehiel gv ko tuup tulu gv, Jetam, hoo Joyel mwwg borv, bulv At Swg dvrwq namlog gumn noosungam kaaya mvdwb xuqlinamv.

²³‍Amram nyi tulu gv, Ijar nyi tulu gv, Hebron nyi tulu gv, hoo Ujjiyel nyi tulu gv—

²⁴‍hoo Sebuyel Gersomwg ko tuupv, Mojes ko tuupv, mwv gumn noosungam kaaya bo peelo bo saabv.

²⁵‍Mwwg vbw-bor tulungv: Eliejer hoqgv mwwg ko tuupv Rehabiya, hoo mwwg ko tuupv, hoo mwwg ko tuupv Jesaiya, hoo mwwg ko tuupv Joram, hoo mwwg ko tuupv Jikri, hoo mwwg ko tuupv Selomot.

²⁶‍Soq Selomot la mwwg vbw-bor tulungv bulug ab tulug nombu tulu hoqg peelo bob nyil lvpw at Debidg gumn aky noosungam la darxaqnam aky tulungam kaaya bob nyinum hoo sipai saab tulug lwwyw aoho hoo lwwg aoho hoo gaml jinbo sipai saab tulungam darxaq yaanum.

²⁷‍Nyob paal naareqnam At Swg dvrwq namlongam bwqn-yaqn dvb bulv ham darxaq yaanum.

²⁸‍Nyigbo Samuyel hoo Kisig ko tuup Soul hoo Nerwg ko tuup Abner hoo Jeruiyag ko tuup Joab aky baqanam mwlwngam darxaq yaanum—akiam darxaq kunam hog mwlwngam Selomot la mwwg vbw-bor tulungv hoocuml doognum.

²⁹‍Ijar nyi tulu gv, Kenaniya la mwwg ko tuup tulungv Israelwg lvvg bvrwqkam kaam yaadwb saab bvla nyegam tulu gob xuqnum.

³⁰‍Hebron nyi gv, Hasabiya la mwwg vbw-bor 1,700 nyi pwbwb nyilaqbo tulungam Israelwg dou-haagag Jordon pobu daiyag At Swg dvrwq namlog bonam la lvpw atwg bonam nyim dvb xuqlinum.

³¹‍Hebron nyi tulu gv, Jerija mwwg nwd hogloq gvjaqkam ho ab tulu nombu tulu sujaqkam, Hebron nyi tulu gab peelo bov. (Debidg vnyw campy dvb pvvb bwwl doog yikho soq pwbwb nyilaqbo nyi dvparam hwwdil hwwkanamv bulam Gilead gvdag Jajer ho doodwb kaapanum.)

³²‍Lvpw at Debid mwam la mwwg vbw-bor pwbwb nyilaqbo nyiv 2,700 go, bulug ab tulug nombu tulu hoqgv peelo gob, ho Reubenwg dvparam, Gadwg dvparam hoo Manasseg dvpar papo gon nyi tulug hog mwlw Pwnbo pagoqkam la lvpw atwg pagoqkam kviyw-tadal bon nyig mvdwb xuqlinum.