Read Nyishi 1 NWD 27 Bible Online

1 NWD 27 - Nyishi bible

1 NWD 27

¹Soq si Israelwg nyiilu, bulug ab tulug nombu tulu hoqg peelo bo tulungv, lwwywngam la lwwgam gaml jinbo tulu, hoo bulug saab tulungv hiyv pagoq goqx ho lvpw atam at-atwg moodam la poolam ho vnyw nywpwngam hvvsiq-hvvsiqnv hog mwlw bonam nyij bov xikumnamv 24,000 go.

²‍Jabdielwg ko tuup Jasobeam otuqco dvparam otuq pool ho nyig-wgnum; mwwg dvpar uraho 24,000 go.

³‍Mwv Perej gv hosiq akv hoo gaml jinbo mwlw hoqg peelo bov. Mwv otuq pool gab bon nyijnum.

⁴‍Dodai nyi Aho dvparam pool bvrnyi deenho nyignum; mwwg dvpar uraho 24,000 go.

⁵‍Nyub but Jehoiadag ko tuup Benaia, oum deen gaml jinbov, borum deen pool gab; mwwg dvpar uraho 24,000 go.

⁶‍Soq si Benaia hiyv atorbo nyi cammum hoqgv nyi akwn hoo cammum mam gaml jinbov; mwwg ko tuup Ammijabad mwwg dvparam nyignum.

⁷‍Asahel Joabg borv vpy deen dvparam, pool bvrpy deen gab, hoo mwwg ko tuup Jebadiya mwwg kokwb nyinum; mwwg dvpar uraho 24,000 go.

⁸‍Ijra nyi Samhut, ang deen gaml jinbov, pool barng gab; mwwg dvpar uraho 24,000 go.

⁹‍Tekoa nyi Ikkes ko tuup Ira, ax dvb, pool barx deen gab; mwwg dvpar uraho 24,000 go.

¹⁰‍Pelon nyi Helej, Iprayimg ko tuup tulungv, kvn dvb, pool kvn deen gab; mwwg dvpar uraho 24,000 go.

¹¹‍Husat nyi Sibbekai, Jera nyi tulungv; piin dvb, pool piin deen gab; mwwg dvpar uraho 24,000 go.

¹²‍Anatotwg Abiejer, Benjamin nyi akv; kiya dvb, pool kiya deen gab; mwwg dvpar uraho 24,000 go.

¹³‍Netopatwg Maharai, Jera nyi tulu hoqgv; wyw dvb, pool bvryw deen gab; mwwg dvpar uraho 24,000 go.

¹⁴‍Piratonwg Benaia, Iprayimg ko tuup tulungv, camleq akin dvb, pool camleq barkin deen gab; mwwg dvpar uraho 24,000 go.

¹⁵‍Netopat nyi Heldai, Otniyel hoqgv; camleq vnyi dvb, pool camleq bvrnyi deen gab; mwwg dvpar uraho 24,000 go.

¹⁶‍Israel nyob hoolu bumpw aoho, Reuben nyi tulu gab Jikri gv ko tuup Eliejer saab peelo bov; Simeon nyi tulu gab, Maakag ko tuup Sepatiya;

¹⁷‍Lebi gab, Kemuyel gv ko tuup Hasabiya; Aaron gab Jadok;

¹⁸‍Juda gab Elihu, Debidg vbw-bor akwn; Issakar gab, Mikael gv ko tuup Omri;

¹⁹‍Jebulun gab, Obadiyag ko tuup Ismaia; Naptali gab, Ajrielwg ko tuup Jerimot;

²⁰‍Iprayim nyi tulu gab, Ajajiyag ko tuup Hosea; Manasseg nyob papo gon gab, Pedaiag ko tuup Joyel;

²¹‍Gilead ho doonbo Manasseg nyob papo gon gab, Jakariyag ko tuup Iddo; Benjamin gab, Abnerwg ko tuup Jaasiyel;

²²‍Dan gab, Jerohamwg ko tuup Ajarel. Soq tulu si Israelwg nyob hoolungam nyigbo tulungv.

²³‍Debid vnyw camnyi ako boam xitaq maanum, hoggab Israelam doa aog takar tvvb mvqlw dvb mvtayin hvl At Sw dingrnum.

²⁴‍Jeruiyag ko tuup Joab nyi hwlwngam xika dvb xirabnum, hvbmabde xinya nyomanum. Hoq mood hookam Israelam laqm-baqnamv haanum, hoo Lvpw at Debidg nwd xiqlwqko ho xiqlwq maapwn.

²⁵‍Lvpw atwg gumn noosungam Adielwg ko tuup Ajmabetnvn kaaya mvdwb jinum; hoo gvdag, bopam tulug, nampam tulug, soja tulug gumn noosungam Ujjiyag ko tuup Jonatannvn kaaya mvdwb jinum;

²⁶‍hoo Kelubwg ko tuup Ijrinvn rongo ngamla rongo mvnbo tulungam kaaya mvdwb jinum;

²⁷‍hoo Ramat nyi Simeinvn roo boolungam; hoo Sip nyi Jabdinvn roo aaxy mvlinam mam la roo ala twws mvlin koam kaaya mvdwb jinum.

²⁸‍Geder nyi Baal-hanannvn Olib la taoq svvn tulungam kaaya mvdwb jinum; hoo kuty noosungam Joasnvn kaaya mvdwb jinum.

²⁹‍Saron nyi Sitrainvn Saron gvdag sibin svv-ngam kaaya mvdwb jinum; lywpag sibin svv-ngam Adlaiyag ko tuup Sapatnvn kaaya mvdwb jinum.

³⁰‍Svjin tulungam Ismaiyel nyi Obilnvn kaaya mvdwb jinum; hoo svdam tulungam Meronot nyi Jedeiyanvn kaaya mvdwb jinum. Sibin-sviya tulungam Hagrait nyi Jajijnvn kaaya mvdwb jinum.

³¹‍Soq tulu si Lvpw at Debidg tuun-meengam gootu kaaya bov.

³²‍Jonatan Debidg vkv, tomswr-hony bo akv, cenglaq hoo xeqlaqbo nyi akv. Mwv la Hakmonig ko tuup Jehiel lvpw atwg ko tuup tulungam kvvyw-tadanum.

³³‍Ahitopel lvpw atam tomswr-hony bov, hoo Arkit nyi Husai lvpw atwg ajinb nyinum.

³⁴‍Benaiyag ko tuup Jehoiada Ahitopel kokwb swwsiqnum, hoo Abiyatar. Joab lvpw atwg sipai tulungam gaml jinbov.