Read Nyishi 1 NWD 28 Bible Online

1 NWD 28 - Nyishi bible

1 NWD 28

¹Debid Jerusalemho Israelwg saab mwlwngam, nyob hoolug saab mwlwngam, lvpw atam bon nyij bo dvpar hoqg saab tulungam, lwwyw sipai gaml jinbo tulungam, lwwg sipai gaml jinbo tulungam, gumn mwlwngam hoo lvpw atwg tuun-mee-ngam hoo mwwg ko tuup tulungam gootu kaaya bo tulungam, lvpw pwqlw ho doonbo saab tulungam, atorbo nyi tulungam hoo nyob padam nyob paky bo tulungam goqkumnum.

²‍Ho Lvpw at Debid mwv daqrabnum hoo benum, “Ngoqg vbw-borv la ngoqg nyiilungv, ngam tato. Ngoqg hang ura lo ngo At Swg pvvb uddum mam joonu koob hoo ngulug Pwnbog lvpia samp koob namlo ak poodwb mwwnum, hoo ngo namlongam poodwb mwx-mvaq pakun.

³‍Hvbmabde Pwnbov ngam benum, ‘No ngoqg emin gab namlongam poonyi ram, hoggab no nyob panbo akv hoo ywlw twwn bov.’

⁴‍Hvbsujaqkam Israelwg Pwnbo At Sw ngoqg abwg nam hoqgv ngam Israel bumpw aoho nwrba xaqb lvpw atwb swwm dvb daalinum. Hoggab mwv Judangam nyig bob daalinum, hoo Juda nombu hoqgv ngoqg abwg nombungam, hoo ngoqg abwg ko tuup tulug pengko hoqgv mwv ngam hempwl naanum hoo ngam Israel bumpwg aoho lvpw at gob mvknum.

⁵‍Hoo ngoqg ko tuup mwlwngam (hoggab At Sw ngam naleqgo ko tuupv jipa ku) pengko hoqgv mwv ngoqg ko tuup Solomonnvn At Swg lvpw-haty pwqlw ho dootwl Israelwg aoho pvvb bwwl doog mvdwb daalin paku.

⁶‍Mwv ngam benum, ‘Hoqhv noqg ko tuup Solomon ngoqg dvrwq namlongam la baag tulungam mvtayin, hoggab ngo mwam ngoqg ko tuup gob daalin pakun, hoo ngo mwwg abwb nyitayin.

⁷‍Mwv soq mood so nyinam hvb, mwv atorb jaqb ngoqg gaml tulungam la ngoqg pvvb tulungam pvvb nyiloqkam, ngo mwwg lvpw-hatiam nwrba xaqb mvko jitayin.’

⁸‍Hoqgab sija Israelwg mwlw kaagaho, At Swg dookum ko ho, hoo ngulug Pwnbog tagaho, hingky jaqb tvjw gvdwl hoo ngulug Pwnbo At Swg gaml tulungam meegaq to, ho nulv soq albo gvda sam gumn doog tayin hoo hoq ham nulug ko tulungam nulug kokwb nwrba xaqb otu bwwsiq mvtayin.

⁹“Hoo no, ngoqg ko tuup Solomon, noqg abwg Pwnboam cengto hoo noqg hvvjw lvgab hoo mwwlwqnam lvgab mwam bon nyijto, hoggab At Sw hvvjw-hara mwlwngam meegaq dvn hoo hog mwlw nyidy sanam mam la mwwnam mam mwv cengdwn. No mwam meegaq baloqkam, no mwam meepa tayin, hvbmabde no mwam ludum baloqkam, nam mwv nwrba gob hurpaq tayin.

¹⁰‍Hengab jaqto sija, hoggab At Sw nam mwwg dvrwq namlongam namlo poom dvb daalin paku; atorto hoo ham nyito.”

¹¹‍Ho Debid mwwg ko tuup Solomonnvn dvrwq namlongam hog bvxeq mvdwb nyidwn ham jinum, hoo hoqg nam tulungam, hoqg gumn uddum tulungam, hoqg aoho cwwrw tulungam, hoo hoqg urag pwqlw tulungam, hoo aya mwwpa ko dootam pvvk cwwrwngam;

¹²‍hoo At Swg dvrwq namlog baag tulungam, pwqlw bviywr-bvcaram, Pwnbog dvrwq namlog gumn noosu tulungam, hoo lvqc cinam mam darxaq tvl gumn apko noosu tulungam hog bvxeq mwv mvdwb mwwnum;

¹³‍nyub tulu gab hoo Lebi nyi tulu gab, hoo At Swg dvrwq namlo ho bonam nyinbo mwlw gab; At Swg dvrwq namlo ho bon nyinan dupum-dvrab mwlwngam,

¹⁴‍hun dupum-dvrab tuluho hog hwdgo hunam vgw dvb vlwq yindwn, rup dupum-dvrab tuluho hog hwdgo rupam vgw dvb vlwq yindwn,

¹⁵‍ho hun lemp tvtamnan hoola hoq lemp tulu hoqg vgwngam, ho hog hwdgo hun lemp tvtamnan dvvx cwrho hoo hoqg lemp tulungam hunam vgw dvb vlwq yindwn, ho lemp tvtamnan hoola lemp ho rupam hog hwdgo vgw dvb vlwq yindwn, ho hogloq hooxeq lemp tvtam nanam bon nyin yindwn,

¹⁶‍wtw joopko hun tebol hoqg vgwngam, rup tebol hoqg rupam,

¹⁷‍hoo dvrwq bo hun hoqgv mvdy sanam pokuq tulungam, hwrxaqko pukaq tulungam hoo mog tulungam; hun peekar tulungam la hoqg vx-cwr hoqg vgwngam; rup peekar tulungam la hoqg vx-cwr hoqg vgwngam;

¹⁸‍yugw ho sulum mwwn nan dupum-dvrab pam dvrwqbo hun lvgab mvnam mam hoo hoqg vgwngam; mwv hun hoqgv At Swg pvvb uddum mam hun ceriotwg cerubim alap tulu lvgab lobyum dvb mwlwq dvb mwol mwwnam mam tomswr swrlwq kunum.

¹⁹‍Soq mwlw sam At Swg alaq hoqgv mwv ngam kaadar pvla dvb xeqtwl tomswrnum, ho hog mwlw bonam nyinam mam hoqg xeqp ko jaqb nyidwb nyidwn.

²⁰‍Ho Debid mwwg ko tuup Solomonnvn benum, “Atorto hoo haakam to hoo ham nyito. Bos maabv hoo mooka-saq maabv, hoggab Pwnbo At Sw, ngoqg Pwnbov noqg lvgab dooba dvn. Hwdlo At Swg dvrwq namlog nam mvnam bonam nyinam mwlw ham nyiyum maady deedib, mwv nam wleqram ho nam apaqram.

²¹‍Hoo kaato Pwnbog dvrwq namlo ho bon nyidy bo nyub tulungam la Lebi nyi tulug dvparam mwbwq pakun; hoo hoolu deed bon nyinam mam pwbw bo nyi tulungv nam svka dvb mwwx-mwaq tvl doodwn; ho saab tulungam la nyiilu mwlw ngvkam noqg gaml jik uraho dootayin.”