Read Nyishi 1 NWD 29 Bible Online

1 NWD 29 - Nyishi bible

1 NWD 29

¹Hoo lvpw at Debid hookum bo mwlwngam benum, “Ngoqg ko tuup Solomonnvn Pwnbov mwam aro daalinum, akv yaapal hoo hog pwbw maata, hoo nyisv koi jaqdo, hoggab lvpw-hativ nyi gab ma hvbmabde Pwnbo At Sw gab.

²‍Hoqgab sija namgub ngoqg nyilanam mam, ngo Pwnbog dvrwq namlongam nam mvn mvdwb, hunam, rupam, tamangam, yoqdwram, hoo svvtaqkam mwx-mvaq ap jipan, hoq lvvgho deedy luuxy xinam wlwngam la takar wlw tulungam naleqgo baqp jipa kun.

³‍Hoq aoho, dvrwq namlongam namlo poon mvdwb ngoqg atwg gumn uddum mam hunam la rupam vbw jigyin, hoo ngoqg Pwnboam ngo aby ko-gab ngoqg Pwnbog dvrwq namlongam namlo poon mvdwb ngo soq tulu sam jigyin:

⁴‍Opir hoqg hunv 3,000 telent go, jiqxubnam rupv 7,000 telent go, nam cwqcam hiqlupnam dvb jinum,

⁵‍hoo nyis mwlw sam nyidy bo si yipam pwbwb pwlaqbo tulu ham nyim to, hunam hun yip pwnboam hoo rupam rup yip pwnboam pwmto. Hvnyiloq hiyv soolo atv atam darxaq layil At Swn mwwsul aky jidy bov?”

⁶‍Ho nyob dvparam nyigbo tulungv aky jinam hvb, ab tulug nombu dvparam nyigbo tulungv, lwwywngam gaml jinbo tulungv hoo lwwgam gaml jinbo tulungv, hoo lvpw atwg bonam nyinbo saab tulungv, bulug mwwlwq koob akiam jinum.

⁷‍Bulv Pwnbog dvrwq namlongam bon nyin mvdwb 5,000 telent go hoo hunv 10,000 darik go, rupv 10,000 telent go, tamangv 18,000 telent go, hoo yoqdwrv 100,000 telent go jikumnum.

⁸‍Hoo hiyv xeq xinam wlwngam doog bov At Swg dvrwq namlog gumn noosu ho jilwqnum, ham Gerson nyi Jehiel hoocumnum.

⁹‍Ho nyiilungv hemp-hvnyirnum hoggab bulug hvvjw-hara hoqgv bulv hemp-hvnyirl haareq jaqb mwwl bulug mwwsul At Swn jinum. Lvpw at Debid kam vcjaqb hemp-hvnyirnum.

¹⁰‍Hoqgab Debid, At Swn nyi mwlwg dookumko agaho paqyalinco paqnum. Hoo Debid benum: “No xinam jaqkv, ngulug ab tulug Israelwg Pwnbo At Swa, nam kuiyum hoqgv nwrba xaqb.

¹¹‍Noqgv, At Swa, koi jaqdvn hoo huqlw doodwn hoo nam yuug dvn hoo no mviya dvn hoo yuukumnamv, hoggab doa nvg ao lo hoo swcw nvg ura lo hog mwlw doonbo si noqgv su. Noqg gvku lvpw-hativ, At Swa, hoo mwlwngam aoho nam koi yaab paqnam mvku.

¹²‍Nyetv la xinamv noqg hoqgv haadwn, hoo no mwlwg aoho pvvb bwwl doodwn. Noqg alaqkv huqlwngam la atoram doogdvn, hoo noqg alaqkv koi dvb mvdwn hoo hog mwlwngam ator jidwn.

¹³‍Hoo ngulv sija nam paqyalinco, ngulug Pwnboa, hoo noqg yuunam eminam paqdwn.

¹⁴“Hvbmabde ngulv mwwsul aky jinyi dvb, ngo hiyv, hoo ngoqg nyiilungv hoggv? Hoggab hog mwlwngv noqg hoqgv haadwn, hoo noqg at gamsu ngulv nam jig yukun.

¹⁵‍Hoggab ngulug ab tulungv nyinam hvbkalam, ngulv noqg agaho nyoodo nyiingv hoo nyiogy haan bov. Swcw nvg aoso ngulug aalv yal bobo hvb nyidwn, hoo ngulv kuiyum xaqb swwl doonyiram.

¹⁶‍Ngulug Pwnbo At Swa, noqg dvrwqbo eminam doogw ko nammam mvn mvdwb ngulug soq naleqgo jinam si noqg alaq hoqgv haadwn hoo soq mwlw si noqg atgv.

¹⁷‍Ngoqg Pwnbo, ngo cengdo, no hangam pooka dvn hoo lootwngam hemp dvn. Ngoqg lootw hang hoqgv ngo soq mwlw aky sam hog mwwkur maab jigyin, hoo sija noqg nyiilungam ngo kaapa ku, hiyv so doon mwlwngv, akiam at mwwkwb hoo hemp-hvnyirl nam jipa kun.

¹⁸‍Abraham gv, Aisakwg, hoo Israelwg, ngulug ab tulungv, Pwnbo At Swa, soq svkwg pagoqkam la mwwlaqkam noqg nyiilu hang ura lo nwrba xaqb pvvj pa, hoo bulug hangam noqg daiyab mwwxam mvm mvpa.

¹⁹‍Ngoqg ko tuup Solomonnvn hvvcwr baql ho mwv noqg gaml tulungam, noqg nyij-mwj tulungam, noqg pvvb tulungam, hog mwlwngam nyil, hoo ngoqg soq deedy luuxy door tipnam soqgv mwv lvpw namlongam poom lvqc cilwq jitbvka.”

²⁰‍Ho Debid hookumbo mwlwngam benum, “Nulug Pwnbo At Swn paqto.” Hoo hookum bo mwlwngv bulug ab tulug Pwnbo At Swn paqnum, hoo At Sw nvla lvpw atam bulug dumpongv pvxwl xumnum.

²¹‍Hoo bulv At Swn pwr akiam jinum hoo aal loogwn so At Swn boyuqnam aky jinamv, hvvb 1,000 go, yaap tvmwrv 1,000 go, hoo sviya yaan 1,000 go, hoq lvgab twws akiam, hoo Israel mwlw gab naleqgo pwr tulungam jinum.

²²‍Hoo bulv hoq aalho At Swg agaho dvl-twwl vc loodab hemp-hvnyirnum. Hoo bulv lwnyi dvb Debidg ko tuup Solomonnvn lvpw at gob mvnum, hoo bulv mwam At Swg lvpw at ko tuup akwb xuqnum, hoo Jadoknvn nyub gob.

²³‍Ho Solomon mwwg ab Debidg kwlib lvpw at gob nyitwl At Swg pvlw dootam ho doonum. Hoo mwv swwn-geenum, hoo Israel mwlwngv mwam tvjwnum.

²⁴‍Nyig-wgbo mwlwngv hoo atorbo nyi tulungv, hoo Lvpw at Debidg ko tuup mwlw ngvkam, bulug Lvpw at Solomonnvn bugil swwtayin hvl dingrnum.

²⁵‍Hoo At Sw Solomonnvn Israel mwlwg kaagaho koijaq dvb mvnum hoo mwwg otuqho swwn bo Israelwg lvpw atam mwam xikuml yuunam hvb yuuka maanum.

²⁶‍Soq sib Jesseg ko tuup Debid Israel bumpwg aoho pvvb bwwl doognum.

²⁷‍Mwv Israelam vnyw campy mood go pvvb bwwl doognum. Hebron ho mwv vnyw kvn go pvvb bwwl doognum hoo Jerusalemho vnyw cammum leq nywum go.

²⁸‍Ho mwv dumpo-xiima dvb swwnum, swwtar peekul, nyet bvla xinam paqnam nyipe kul siknum. Hoo mwwg kwlib mwwg ko tuup Solomon pvvb bwwl doognum.

²⁹‍Sija Lvpw at Debidg nyirab hoqgv nyinya namgub nyinam hog mwlwngam nyigbo Samuyelg Nwd xeqnam tuluho, hoo nyiqry benbo Natanwg Nwd xeqnam tuluho, hoo nyigbo Gadwg Nwd xeqnam tuluho,

³⁰‍mwwg pvvb bwwl doognam mam hoo mwwg atornam mam hoo mwwg aoho hoo Israelwg aoho hoo gvdag lvpw-haty mwlw aoho hoolu deedy haanam moodam xeql ap pakun.