Read Nyishi 1 NWD 4 Bible Online

1 NWD 4 - Nyishi bible

1 NWD 4

¹Judag ko tuup tulungv: Perej, Hejron, Karmi, Hur, hoo Sobal.

²‍Reaiya Sobal gv ko tuupv Jahat gv abv, hoo Jahat Ahumaiyig la Lahadwg abv. Soq tulu si Jorat nyi tulug nyob dvpar tulungv.

³‍Soq tulu si Etam gv ko tuupv: Jejreel, Isma, hoo Idbas; hoo bulug bwrm hoqg eminv Hajjelelponi,

⁴‍hoo Penuel Gedorwg abv, hoo Ejer Husag abv. Soq tulu si Hurwg ko tuupv, vbw cociqkv Iprata, Betlehamg abv.

⁵‍Asur Tekoag abv, mwv nywxw vnyig doonum, Hela la Naara;

⁶‍Naara mwam Ahujjam, Heper, Temeni, hoo Haahastarinvn dwrbuqjnum. Soq tulu si Naara gv ko tuupv.

⁷‍Helag ko tuup tulungv: Jeret, Ijar, hoo Itnan.

⁸‍Koj Anubg la Jobebag abv, hoo Aharhel nyobv Harum ko tuup hoqgv lengnum.

⁹‍Jabej mwwg vbw-bor tulungam xibin yaanam gob nyinum; hoo mwwg annv mwwg eminam Jabej hvl pvvnv begamv, “Hoggab ngo mwam vc cijoywl dwrbuqnum.”

¹⁰‍Jabej Israelwg Pwnboam goql begamv, “Oa, ngam no lvqc tvbv hoo ngoqg gvda vrram koi dvb mvtbv, hoo noqg atorbo alaqkv ngam dooba tvbv, hoo ngam vc mvma dvb un-tar gvnam hoqgv hoocum tvbv!” Hoo mwv hoggv konum ham Pwnbov jinum.

¹¹‍Suhag bor Kelub Mehirwg abv, Mehir Estonwg abv.

¹²‍Bet-rapa, Pasea bunyig abv Eston, hoo Tehinna Ir-nahaswg abv. Soq tulu si Rekag nyi tulungv.

¹³‍Kenaj gv ko tuup tulungv: Otniyel la Seraiya; hoo Otniyelwg ko tuup tulungv: Hatat la Meonotai.

¹⁴‍Meonotai Oprag abv; hoo Seraiya Joabg abv, Joab Ge-harasimwg abv, hoqgab bulam jem mvlaqbo nyiv hvl benum.

¹⁵‍Jepunneg ko tuup Kalebg ko tuup tulungv: Iru, Ela, hoo Naam; hoo Elag kov Kenaj.

¹⁶‍Jehallelel gv ko tuup tulungv: Jip, Jipa, Tiriya, hoo Asarel.

¹⁷‍Ijrag ko tuup tulungv: Jeter, Mered, Eper, hoo Jalon. Soq tulu si Parog ko nyem Bitiyag ko tuup tulungv, hiyam Mered nyem naanum; hoo mwn ko gvnum hoo Miriyam, Sammai, hoo Isbanvn dwrbuqnum, Isba, Estemoag abv.

¹⁸‍Hoo Mered Juda hoqgv nywxw ak naanum, ho mwn Jerednvn dwrbuqnum, ho Jered Gedorwg abv, Heber Sokog abv, hoo Jekutiyel Janoag abv.

¹⁹‍Hodiya Nahamwg bwrm mam nywxwb naanum hoqg ko tuup tulungv Keila ho doonbo Garm nyob tulungv hoo Estemoa ho doonbo Maakat nyob tulungv.

²⁰‍Simon gv ko tuup tulungv: Amnon, Rinna, Ben-hanan, hoo Tilon. Isi gv ko tuup tulungv: Johet la Ben-johet.

²¹‍Juda gv ko tuup Sela gv ko tuup tulungv: Ir Leka gv abv, Laada Maresa gv abv, hoo Bet-asbea ho pud-pos vj mvnbo nyob tulungv;

²²‍hoo Jokim, Kojeba nyi tulungv, hoo Joas, la Sarap, hiyv Moab ho pvvb bwwl doognum hoo Lehem ho wkurnum (soqg xeqpnam si koljaq gvku).

²³‍Soq tulu si pwcw mvnbo dvparv, bulv Netaim la Gedera ho doonum. Lvpw atam bon nyij dvb bulv hoqho doonum.

²⁴‍Simeonwg ko tuup tulungv: Nemuyel, Jamin, Jarib, Jera, Soul;

²⁵‍Sallum mwwg ko tuupv, Mibsam mwwg ko tuupv, Misma mwwg ko tuupv.

²⁶‍Mismag ko tuup tulungv: Hammuyel mwwg ko tuupv, Jakkur mwwg ko tuupv, Simei mwwg ko tuupv.

²⁷‍Simei ko tuupv camleq ax go hoo nyem kov ax go doonum; hvbmabde vbw-bor tulungv ko naleqgo doomanum, ho bulug nyob dvpar Judag nyi tulungv hvb mipar-gooiyiq maanum.

²⁸‍Bulv Beerseba, Molada, Hajar-sual,

²⁹‍Bil-ha, Ejem, Tolad,

³⁰‍Betuel, Horma, Jiklag,

³¹‍Bet-markabot, Hajar-susim, Bet-biri hoo Saaraim ho doonum. Soq tulu si Debidg pvvb bwwl doog maatab bulug bopamv.

³²‍Hoo nampam tulungv Etam, Ain, Rimmon, Token, hoo Asan, ho bopam ang go doonum,

³³‍bulug soq nampam tulu lvgab soq bopam tulu si taqg-loosaqb Baal namgub doonum. Soq si bulug nvmcw doogw kov, hoo bulug nwdam bulv xeqtul apnum.

³⁴‍Mesobab, Jamlek, Josa Amajiya gv ko tuupv,

³⁵‍Joyel, Jehu Josibiya gv ko tuupv, Seraiya gv ko tuupv, Asiyel gv ko tuupv,

³⁶‍Elioenai Jaakoba, Jeshohaiya, Asaiya, Adiel, Jesimiyel Benaia,

³⁷‍Jija Sipi gv ko tuupv, Allonwg ko tuupv, Jedaiya gv ko tuupv, Simrig ko tuupv, Semaiyag ko tuupv—

³⁸‍soq emin bepanam tulu si bulug nyob dvpar hoqg lvpw atwg ko tuup tulungv, hoo bulug ab hoqg nombu dvparv mvqlw jaqb swwlinum.

³⁹‍Bulug tuun-mee nwmw dvs gab bulv Gedor lywpag haaga namgub nyiogy wnum,

⁴⁰‍hoqho bulv diibuqbo, nwmw aljaqb doonbo, hoo rooto malo bo, cumciq bvla swrso ko gvdangam kaapanum, hoggab hoq gvda hv Hamwg otuqho dook gvdangv.

⁴¹‍Soq emin xiqlwqnam nyi tulu sam Judag lvpw at Hejekiyag moodho nyinum, hoo bulug doogw tombu tulungam la Meun nyi tulungam mvpaqnum, hoo soq aal namgub bulam twryumnum, hoo bulug nyookho bulv doonum, hoggab hoq nyook hv bulug tuun-meegab nwmw dvkv aljaqb doonum.

⁴²‍Hoo Simeon nyi dvparv lwwng go Seir Puutub wnum, bulam nyig-wgbo tulungv Pelatiya, Neariya, Repaia, hoo Ujjiyel Isig ko tuup tulungv.

⁴³‍Hoo bulv boumnam kelinbo Amalek nyi tulungam mviyanum, hoo soq aal namgub bulv hoqho doodwn.