Read Nyishi 2 NWD 1 Bible Online

2 NWD 1 - Nyishi bible

2 NWD 1

¹Debid ko tuup Solomon mwv atv mwwg lvpw hatiam mvp sunum, hoo mwwg Pwnbo At Sw mwwg lvgab doobanum hoo mwam vc loodab koi dvb mvnum.

²‍Solomon Israel mwlwngam, lwwywngam la lwwgam gaml jinbo tulungam, nyegam tulungam, hoo Israelwg nyigbo mwlwngam, ab tulu nombu tulug peelo bo tulungam goonum.

³‍Hoo Solomon la mwwg lvgab hookuml dooba bo mwlwngv xumk puutu aob caanum hoqhv Gibeon ho doonum, hoggab At Sw nyera Mojesg deexa-raraho Pwnbog kvvrwq minsko tombungv hoqho doonum.

⁴(Hvbmabde Debid Pwnbog pvvb uddum mam Kiriat-jearim hoqgv baqa kunv Debidg hoqham pvvkwb mwx-mvaqko dookho apnum, hoggab mwv hoqgab Jerusalemho tombu ak mvp jinum.)

⁵‍Hoq aoho, Hurwg ko tuup, Hurwg ko tuup Uri, Urig ko tuup Bejalelwg tama yugw mvnam ak hv At Swg xumk pirr agaho doonum. Hoo Solomon la hookum bo nyi tulungv hoqham meepanum.

⁶‍Hoo kvvrwq minsko tombug At Swg tama yugw agaho Solomon caanum, hoo lwwyw go boyuqnam akiam hoqho jinum.

⁷‍Hoq aiho Pwnbov Solomon dookho haanum, hoo mwam benum, “Koto hoggv ngo nam jitayin.”

⁸‍Hoo Solomon Pwnboam benum, “No ngoqg ab Debidnvn koi jaqb tumanam abiam kaakin paku, hoo mwwg kwlib ngam lvpw at gob mvpa ku.

⁹‍Pwnbo At Swa, ngoqg ab Debidnvn noqg gomcwr gooknam ham niqtuq lengm tuku, hoggab no swcw nvg aog diimwr hvb nyiilu mvqlw ko aoho ngam lvpw at gob mvp paku.

¹⁰‍Soq nyiilug agaho so ngam nyig-wgnan pumb-rwnam mam la cenglaqkam jitbv, hoggab hwdgo koibo noqg nyiilu sam hiyv yu pvvb bwwl doog latayin?”

¹¹‍Pwnbov Solomonnvn birwqnum, “Hoggab soq si noqg hvvjw ho doonum, hoo noqg gumn gab, nyet gab, xidwb yuunam gab, noqg ceebiongam sim dvb, hoo swwiyu dvb koma, hvbmabde no pumb-rwnam mam la cenglaqkam no atv kopa ku, ho nam ngoqg nyiilug aoho hingkib pvvb bwwl doog mvdwb, ngo nam lvpw at gob mvpa kunum,

¹²‍ho pumb-rwnam mam la cenglaqkam nam jig yukun. Ngo nam nyetam, gumnam, hoo xidwb yuunam ham kam jitayin, soq sib lvqc cinam hiyv kam noqg otuqho lvpw at doomanum hoo noqg kokw bvkam soq sib dooram.”

¹³‍Hoqgab Solomon Gibeon puutug kvvrwq minsko tombu aga hoqgv Jerusalemb haaknum. Hoo mwv Israelam mam pvvb bwwl doognum.

¹⁴‍Solomon ceriot tulungam la svpuram xarg boam nookumnum. Mwv 1,400 go ceriotv doonum hoo 12,000 go svpuram xarg bov doonum, mwv hoq tulu ham bopam tulu hoola lvpw at lvgab Jerusalemho pvvl apnum.

¹⁵‍Hoo lvpw atv rupam la hunam Jerusalemho wlw hvb goiyab doomnum, hoo Sepelag taoq svvn tulu hvb sidar svvnam naleq-baceq dvb mwv liilwql apnum.

¹⁶‍Hoo Solomon svpur tulungam Ijipt la Kue hoqgv naanum, hoo lvpw atwg kwm-kor mvnbo tuluhv svpur tulu ham Kuv hoqgv rvlayil boanum.

¹⁷‍Bulv ceriot akinam Ijipt hoqgv rup 600 sikil go, hoo svpur dorkinam 150 go. Hoq hvbkalam bulv Hittait la Siriyag lvpw at tulungam puqsiqnum.