Read Nyishi 2 NWD 10 Bible Online

2 NWD 10 - Nyishi bible

2 NWD 10

¹Rehoboam Sekemb wnum, hoggab mwam lvpw at gob mvdwb Sekem ho Israel mwlwngv hookumnum.

²‍Hoo Nebatwg ko tuup Jeroboam puiyam tapa twqda kalam (hoggab mwv Lvpw at Solomon hoqgv keleqlayil Ijipt ho mwv dooxiqnum), ho Jeroboam Ijipt hoqgv hookurnum.

³‍Hoo bulv nyi kanam tvl mwam goqa mvnum. Hoo Jeroboam la Israel nyi mwlwngv hookumnv hoo Rehoboamnvn benum,

⁴“Noqg abv ngulam vigo vgw dvb mvnum. Hoqgab sija noqg ab ngulam vcjaqb vgw dvb bon nyimnam sam hvrab dvb mvto, hoo ngulv nam bon nyij tayin.”

⁵‍Mwv bulam benum, “Ngoqg dookub lokta aal loum kokwngam hookur ta.” Ho nyiilungv hoqgv wleqnum.

⁶‍Ho Lvpw at Rehoboam nyiixa tulu hoqgv tomswr-honynam mam naanum, hiyv mwwg ab Solomonwg swwl dooyikho mwwg agaho daqm tvl mwv begamv, “Hoggub soq nyiilu sam birwq dvb ngam nulv tomswrl tayin?”

⁷‍Hoo bulv mwam benum, “No soq nyiilu sam al dvb la hemp dvb nyij baloqkam hoo bulam albo agam mam birwql baloqkam, ho bulv noqg nyera-paqnwb nwrba xaqb swwtayin.”

⁸‍Hvbmabde mwv nyiixa bo tulug tomswr-honynam mam apaqnum hoo mwwg agaho mwwg swwtam yaapa acam go daqn bo hoqgv tomswr-honyam naanum.

⁹‍Hoo mwv bulam benum, “Noqg abwg vgw dvb bon nyimnam sam ngulam hvrab dvb mvtbv hvl benbo tulu sam, ‘birwq dvb nulv ngam hoggv tomswr tayin’?”

¹⁰‍Hoo mwwg swwtam yaapa tuluhv mwam soq sib benum, “Noqg ab ngulam vgw dvb mvpa ku, hvbmabde no ngulam hvrab dvb mvtbv hvl, nam benbo nyiilu sam, no soq sib soq nyiilu sam beto, ‘Ngoqg lvqcw cwwnyia ri si ngoqg abwg xarpongam jwwkam yaadwn.

¹¹‍Hoo ngoqg abv nulam vgw dvb mvpa loqkam, ngo nulug vgwngam vbw yaiya tayin. Ngoqg ab nulam xoociq lvgab gwrnyiaq paloqkam, hvbmabde ngo nulam svvda lvgab gwrnyiaq tayin.’”

¹²‍Hoqgab “Aal loum kokwngam ngoqg dookub lokta hookur ta hvl benam hvb,” Jeroboam la nyiilungv aal loum kokw so lvpw at Rehoboam dookub haanum.

¹³‍Hoo lvpw atv mwam nyiixa tulug tomswr-honynam mam apaqtvl, mwv nyiilungam kur-karaq dvb birwqnum,

¹⁴‍bulam yaapa tulug tomswr-honynam hvb mwv agam gool begamv, “Ngoqg abv nulam vgw dvb mvnum, hvbmabde ngo nulug vgwngam vi yaiya dvb mvtayin. Ngoqg ab nulam xoociq lvgab gwrnyiaq paloqkam, ngo nulam svvda lvgab gwrnyiaq tayin.”

¹⁵‍Hoqgab lvpw atv nyiilu benam mam tamanum, hoggab hoqhv Pwnbo At Sw Silon nyi Ahijanvn Nebatwg ko tuup Jeroboamnvn mwwg agam gooknamv niqtuq lengm dvb nyinum.

¹⁶‍Hoo hwdlo Israel mwlwngv kaaknamv lvpw atv bulug benam mam tama yin, nyiilungv lvpw atam birwqnum, “Hoggv ngulv Debid ho naas doodwn? Ngulv Jesse ko tuup ho otu naas dooma. Israel nyi tulunga, nyiicwr-cwrxiv nulug tombu doogwb wtku! No Debid nombungam atv kaato.” Ho Israel mwlwngv bulug tombu doogwb wknum.

¹⁷‍Hvbmabde Juda bopam ho doonbo Israel nyiilungam Rehoboam pvvb bwwl doognum.

¹⁸‍Ho Lvpw at Rehoboam, nyera-paqn hvb nwwteq tvl bon nyin boam kaaya bo Hadoramnvn kanamnum, hoo Israelwg nyiilungv mwam wlw lvgab sidwb hurxnum. Hoo Lvpw at Rehoboam nyebia jaqb mwwg ceriot ho caolayil Jerusalem keknum.

¹⁹‍Hoqgab soq aal namgub Israelv Debidg nombungam ceekol taleqnum.