Read Nyishi 2 NWD 11 Bible Online

2 NWD 11 - Nyishi bible

2 NWD 11

¹Hwdlo Rehoboam Jerusalemho hvvc yukho, ho Israelwg nombungam ceekol nyob pam dvb, mwv Judag nombungam la Benjaminwg nyobam goqkumnum, Rehoboam lvpw-hatiam nookur dukub, nyob pam dvb nyi tulungam 180,000 go daalinum.

²‍Hvbmabde At Swg gomcwrv Pwnbog nyi Semaiyanvn haanum:

³“Judag lvpw at Solomonwg ko tuup Rehoboam, hoo Juda hoola Benjamin ho doonbo Israel mwlwngam beto,

⁴‘Soq sib At Sw bedo, Nulv caamabv ho nulug atwg imiq dvpar Israelam ceekol nyob pamabv. Nyiicwr-cwrxiv mwwg nammwb wkur tuku, hoggab soq si ngoqg hoqgv haadwn.’” Ho bulv At Swg gomcwram tape kul hoo lokta wkurnum hoo Jeroboamnvn ceeko kumanum.

⁵‍Rehoboam Jerusalemho doonum, hoo mwv Judaho bopam tulungam ceetornan dvb mvnum.

⁶‍Mwv Betleham mam, Etam mam, Tekoangam,

⁷‍Bet-jurngam, Sokongam, Adullam mam,

⁸‍Gatam, Maresangam, Jipam,

⁹‍Adoraiyim mam, Lakisam, Ajekangam,

¹⁰‍Jorangam, Aijalonam, hoo Hebronam gurum nwqtumnam bopam tulungam mvnum, hoqhv Juda hoola Benjamin ho doonum.

¹¹‍Mwv hwngkw dvb gurum mam nwqtumnum, hoo hoq tuluho gaml jinbo tulungam pvvnum, hoo dis silin ko noosu tulungam dvs gab, kuty gab hoo twws gab mvl apnum.

¹²‍Hoo mwv svtam mvla nwwxongam bopam mwlw ho pvvl apnum hoo hoq tulu ham hwngkw dvb mvnum. Ho mwv Judangam la Benjaminam hoocuml doognum.

¹³‍Hoo Israel ho doonbo nyub tulungv la Lebi nyi tulungv bulug dook nyook hoqgv mwwg dookub bulv atv atv haanum.

¹⁴‍Hoggab Lebi nyi tulungv bulug goiya gvdangam la tuun-mee doognam tulungam apaq peekul Juda la Jerusalemb haanum, hoggab Jeroboam la mwwg ko tuup tulungv bulam At Swg nyub gob swwm kumab ruqpaqnum,

¹⁵‍hoo puutu aoho sibin la svv ko murtiam mwwg mvpnam tulu ham xumg mvdwb mwv mwwg atwg nyub tulungam xuqlinum.

¹⁶‍Hoo hiyvg hangv Israelwg Pwnbo At Swn meegaq bo Israelwg nyob tulu mwlw hoqgv bulug kokwb Jerusalemb bulug ab tulug Pwnbo At Swnvn pwr jitab haamin gvnum.

¹⁷‍Bulv Juda lvpw-hatiam hwngkw dvb mvnum, hoggab bulv Solomonwg ko tuup Rehoboamnvn vnyw nywum go svkal hwngkw dvb mvnum, ho bulv vnyw nywum go Debid la Solomonwg pvvb bwwl doognam uraho doodwn hvb nyil-wl doonum.

¹⁸‍Rehoboam Debidg ko tuup Jerimotwg ko nyem Mahalatnvn la Jesseg ko tuup Eliyabg ko nyem Abihailnvn nywxwb naanum,

¹⁹‍hoo mwn mwam ko tuupv Jeus, Semariya, hoo Jahamnvn dwrbuqjnum.

²⁰‍Mwnwg kokwb mwv Absolom gv ko nyem Maakanvn naanum, ho mwwg gab Abija, Attai, Jija, hoo Selomitnvn dwrbuqjnum.

²¹‍Rehoboam mwwg nywxw xwwda la xwwbaq mwlw pengko hoqgv Absolom gv ko nyem Maakanvn aby bobin yaanum (mwv camleq piin gob nywxw xwwdangv hoo camx go xwwbaq nywxwngv naanum, hoo mwv camnyi leq piinwg ko tuup la camx go nyem koog abwb nyinum).

²²‍Hoo Rehoboam Maakag ko tuup Abbijanvn mwwg vbw-bor pengko hoqgv peelo bo lvpw at ko tuup gob mvnum, hoggab mwv mwam lvpw at gob swsiq mvdwb mwwnum.

²³‍Hoo mwv pwbw jaqb mwwlaql hog mwlwngam nyinum hoo mwwg ko tuup tulungam Juda gvla Benjamin ho, hoo gurum nwqtumnam bopam tulungam jipin-jiranum, hoo bul gab dvs-twwsam non-poop dvb jinum hoo bulam nywxw naajnum.