Read Nyishi 2 NWD 12 Bible Online

2 NWD 12 - Nyishi bible

2 NWD 12

¹Hwdlo Rehoboam pvvb bwwl doorab gviyikho hoo mwv atornum, mwv At Swg pvvbam apaq kunum, hoo mwwg lvgab Israel mwlwngv nyibanum.

²‍Lvpw at Rehoboam vnyw nywng go swwyikho, bulv At Swn mwwjw kumanum, hoggab Ijipt ngv lvpw at Sisak Jerusalem mam nyob patab caanum

³‍mwwg lvgab ceriot tulungv 1,200 go hoo svpur xarg bo nyi tulungv 60,000 go caagnum. Hoo Ijipt, Libyan tulungv, Sukkiim, hoo Itiopiya nyi tulungv mwwg lvgab wmin gvnbo nyiilungam xila kumanum.

⁴‍Hoo mwv Judag gurum nwqtumnam bopam tulungam naanum hoo Jerusalem namgub haaknum.

⁵‍Ho Nyiqry benbo Semaiya Rehoboam la Judag lvpw atwg ko tuup tulungv Sisak pagoqgab Jerusalemho dookum koob haanum, hoo bulam benum, “Soq sib At Sw bedo, ‘Nulv ngam apaq paku, hoqgab ngo nulam Sisakwg alaqho apaq gvi kun.’”

⁶‍Ho Israelwg lvpw atwg ko tuup tulungv la lvpw atv bulv atv atam yan suknv hoo benum, “At Sw jvqtw dvn.”

⁷‍Hwdlo bulv atv atam yannam mam At Sw kaapa yin, At Swg gomcwrv Semaiyanvn haanum: Bulv atv atam yan paku. Ngo bulam twryum ram, hvbmabde ngo meeg bulam naalin tayin, hoo ngoqg hang lingtwr twryanam mam Jerusalemho Sisakwg alaq lvgab haajaqb hengpa mvram.

⁸‍Hvbsujaqkam, bulv mwam nyera-paqn swwj tayin, ho ngam bon nyijnam mam la gvdag lvpw-hatiam bon nyijnam mam bulv cengtayin.”

⁹‍Hoqgab Ijipt gv lvpw at Sisak Jerusalem mam nyob patab caanum. Mwv At Swg namlo ngamla lvpw atwg nombu hoqg gumn uddum mam bvqyiql baqxaqnum. Mwv hog mwlwngam baql wgnum. Mwv Solomonwg hun svtam mvnam mamkam baql wgnum,

¹⁰‍hoo Lvpw at Rehoboam hoq tulu kwlib tama svtam mam mvtwl hoo hoq tulu ham lvpw atwg namlongam rvkil daqg bo saab tulug alaqho gvqlwq kunum.

¹¹‍Hoo hog hwdlo lvpw atv At Swg namlob wtayin hwd kalam go rvky bo tulungv hoq tulu ham baql wg peel hoo ham rvky ko wrwb bvqlwql boqkur dukun.

¹²‍Hoo hwdlo mwv atv atam yan yukun, At Swg hang lingtwrnamv mwwg hoqgv wkurnum, ho hoqham twryum maanum. Hoq aoho, Judaho hog mwlwngv alkunum.

¹³‍Hoqgab Lvpw at Rehoboam ator jaqb swwrab kunum hoo Jerusalem mam pvvb bwwl doognum. Rehoboam hwdlo mwv pvvb bwwl doorab gviyikho mwv vnyw campy leq nywkin go akamnum, hoo Israelwg nyob tulug bopam pengko hoqgv At Swg mwwg eminam doom dvb xuqnam bopam Jerusalemho, mwv vnyw camleq kvn go pvvb bwwl doognum. Mwwg ann hoqg eminv Naama, mwn Ammon nyi ngv.

¹⁴‍Hoo mwv alman boam nyinum, hoggab mwwg hangv At Swn mwv meegaq maanum.

¹⁵‍Rehoboamwg asaq nyinam mwlwngam, nyirab hoqgv nyitwr-nyinya namgub, nyiqry benbo Semaiya la Iddog nwd xeqpko ho xeqp maap nvi yv? Rehoboam la Jeroboam bunyig pengko ho nyob pakil doonum.

¹⁶‍Hoo Rehoboam mwwg ab tulug sinam hvb siknum hoo mwwg ab Debidg bopam ho liiknum, hoo mwwg kwlib mwwg ko tuup Abija pvvb bwwl doognum.