Read Nyishi 2 NWD 13 Bible Online

2 NWD 13 - Nyishi bible

2 NWD 13

¹Lvpw at Jeroboam vnyw camleq piin go swwyikho, Abija Judangam pvvb bwwl doorab gvnum.

²‍Mwv Jerusalemho vnyw nywum go pvvb bwwl doognum. Mwwg ann hoqg eminv Mikaiya, Gibea hoqg Uriyelwg ko nyemv. Ho Abija la Jeroboam bunyig pengko ho nyob panum.

³‍Abija sipai haakam bo 400,000 go nyiingam daalin layil nyob patab wnum. Hoo Jeroboam mwam nyob pvrwq dvb sipai nyob paky boam 800,000 go daalin layil wnum.

⁴‍Ho Abija Iprayimg diisw gvdag Jemaraim Puutu aoho daqtwl hoo benum, “Jeroboam la Israel nyi mwlw nga, ngam tato!

⁵‍Nul mwlwngv cengto, Israelwg Pwnbo At Sw Debidnvn la mwwg ko tuup tulungam Israelwg aoho nwrba xaqb lvpw at gob swwky mvdwb pvvbam mvpia lama dvb pvvb mwr maan mvi yv?

⁶‍Hvbsujaqkam, Nebatwg ko tuup Jeroboam, Debidg ko tuup Solomonwg nyera ak swwrabnum hoo mwwg nyiit atam taleql ceekonum,

⁷‍hoo dooxa-xaaram bo nyi acam go mwv goqkumnum hoo Solomonwg ko tuup Rehoboam yaapa tvl hog mwlwngam pwbwl bulam dvqrwq nyoma yukho, bulv Rehoboamnvn ai yeenum.

⁸“Hoo sija nulv mwwgamv At Swg lvpw-hatiam Debidg ko tuup alaqho doon boam ceeko dvb mwwdo, hoggab nulv nyiingv mvqlw do hoo nulgab Jeroboamwg hun svv ko murtiam pwnbob pwjnamv nulug lvgab doodo.

⁹‍Nulv At Swg nyub tulungam ruqpaql ruqlinl, Aaron gv ko tuup tulungam la Lebi nyi tulungam, hoo asaq gvdag nyiilug nyinam hvb nulv atv nyub tulungam daalin maan mvi yv? Hiyv lajaqkam hvvb dorg la yaap tvmwr kvn go boal haanbo tulungv pwnbo tulu maag nyub gob nyiknum.

¹⁰‍Hvbmabde ngul gab nyiloqkam ngulug Pwnbov At Sw, hoo ngulv mwam haqpaq maadwn. Aaron gv ko tuup tulungv ngulug nyubwb nyitwl At Swn bon nyidu jidwn, hoo Lebi nyi tulungv bulam bon nyimin gvdwn.

¹¹‍Bulv At Swn ar roxiam hoo ariyum riumxiam boyuqnam akiam hoo sungam bo sulum mam mwwjdvn, loodwrbo hun tebol ho wtw hucam joop dvn, hoo hun lemp tvtam maanam tulungam hoo hoqg lemp tulungam ariyum riumxiam wm rwgab dvn. Hoggab ngulv ngulug Pwnbo At Swg gamlam pvvdwn, hvbmabde nulv mwam apaq paku.

¹²‍Kaato, Pwnbov ngulug otuqb ngulug lvgab wdwn, hoo mwwg nyub tulungv nyob paikam tuuly miqnam mam miql nulam nyob patayin. Israelwg ko tulunga, nulug ab tulug Pwnbo At Swn ceekol nyob pamabv, hoggab nulv niqtuq lengnyi ram.”

¹³‍Jeroboam mwwg sipai tuugin bulug langk ho tooiyal nyob paa mvdwb kanamnum. Soq sib mwwg lvgab sipai yvnbo tulungv Judag haabo ho hoodunum, hoo langk hoqgv paa deen bov bulug langk ho tooiyanum.

¹⁴‍Hoo hwdlo Judangv kaaknamv nyobv langk-haabob paa kunum. Hoo bulv At Swn sogoql xabnum, hoo nyub tulungv tuuliam miqnum.

¹⁵‍Ho Juda nyi tulungv nyob padwb vcjaqb goqrnum. Hoo hwdlo Juda nyi tulungv vcjaqb goqr yin, Pwnbov Jeroboam nvla Israel nyi mwlwngam Abija gvla Judag aga hoqgam mviyanum.

¹⁶‍Ho Israelwg nyi tulungv Judag aga hoqgv kenum, hoo Pwnbov bulam bulug alaqho jilwqnum.

¹⁷‍Abija la mwwg nyiilungv bulam vc loodab mviyanum, ho Israel xuqnam nyiingam 500,000 go mengnum.

¹⁸‍Soq sib Israelwg nyi tulungam hoq moodho munyiubl doognum, hoo Juda nyi tulungv mviyanum, hoggab bulug ab tulug Pwnbo At Swg aoho bulv svqgwnum.

¹⁹‍Hoo Abija Jeroboamnvn ruqmin gvnum hoo mwwg bopam tulungam naanum, Betel lvgab hoqg nampam tulungam hoo Jesana lvgab hoqg nampam tulungam hoo Epron lvgab hoqg nampam tulungam naanum.

²⁰‍Abijag swwd moodho Jeroboam lokta mwwg atorbo kaapa kumanum. Hoo At Sw mwam jwwtabnum, hoo mwv siknum.

²¹‍Hvbmabde Abija ator jaqb swwrabnum. Hoo mwv camleq vpy go nywxw naanum hoo ko tuupv camnyi leq vnyi go hoo ko nyemv camleq ax go doonum.

²²‍Abijag hog mwlw bon nyinam mam, mwwg lamta tulungam hoo mwwg agam goonam tulungam, nyiqry benbo Iddog gon xeqpnam ho xeqpan.