Read Nyishi 2 NWD 14 Bible Online

2 NWD 14 - Nyishi bible

2 NWD 14

¹Abija mwwg ab tulu sinam hvb siknum, hoo mwam Debidg bopam ho liiknum. Hoo mwwg kwlib mwwg ko tuup Asa pvvb bwwl doognum. Hoo mwwg swwd moodho gvdangv vnyw nywyw go swrsob doonum.

²‍Hoo Asa mwv mwwg Pwnbo At Swg kaagaho alboam nyinum.

³‍Mwv nyoodo yugw tulungam hoo puutu aoho xumk nam tulungam mvpaqnum hoo murty swwrw tulungam la Aserim murtiam kwrtab xaanum

⁴‍hoo bulug ab tulug Pwnbo At Swnvn meegaq tvk hvl, hoo mwwg pvvbam la gaml tulungam pvvtwk hvl gaml jinum.

⁵‍Mwv Juda hoqg puutu aoho xumk tulungam la sulum mwwk yugw tulungam mvpaqnum. Hoo mwwg uraho lvpw-hativ swrsob doonum.

⁶‍Mwv Juda hoola gvda mwlw ho gurum nwqtumnam bopam tulungam mvnum. Mwv hoq moodho nyob pakmanum, hoggab At Sw mwam swrso dvb jinum.

⁷‍Hoo mwv Judangam benum, “Kuj ngulv soq bopam tulu sam gurum nwqtuml hoo sojangam mvtuj, ho yoqdwr lvgab toggoq tulungam mutum tuj. Gvda si sija godab ngulv, hoggab ngulv Pwnbo At Swn konum. Mwam ngulv meekarnum, hoo mwv ngulug diis-paap hoqgv ngulam swrso dvb jipa ku.” Ho bulv bon nyiknv hoo swwk-geeknum.

⁸‍Hoo Asa Juda hoqgv svtam mam la nwwxo bwwnbo sipaiyv 300,000 go doonum, hoo Benjamin hoqgv svtam mam la illy-uppuq bwwn bov 280,000 go doonum. Soq nyi mwlw si atorl haak nyob paky bov.

⁹‍Itiopiya nyi hoqg Jera mwwg lvgab lwwyw lww-camg sipaiyam hoo ceriot tulungv 300 go boolayil bulam nyob panum, hoo Maresa namgub haanum.

¹⁰‍Hoo Asa mwam nyob pvrwq taab wnum, hoo bulv Maresag Jepata Lywpa ho nyobam wrwql pamin sudwb haanum.

¹¹‍Hoo Asa mwwg Pwnbo At Swnvn sogoql xabnum, “At Swa, atorbo la laanyi maan pengko ho, noq hvb svka bo akkam dooma dvn. Ngulug Pwnbo At Swa, ngulam svka tvb, hoggab ngulv nam svqgw dvn, hoo noqg emin ho ngulv soq nyi mvqlw sam nyob pvrwq taab haaiyin. At Swa, no ngulug Pwnbov; nyiingam nam nyob paiya kumabv.”

¹²‍Hoqgab At Sw Itiopiya nyi tulungam Asa gvla Judag agaho mviyanum, hoo Itiopiya nyi tulungv kenum.

¹³‍Asa la mwwg lvgab dooba bo nyiilungv bulam Gerar namgub ruqmin gvnum, hoo Itiopiya nyi tulungam akkam dooma dvb mengknum, hoggab bulv At Sw gvla mwwg sipai tulug agaho ocu-aiya kunum. Juda nyi tulungv nyob pareq layil naleqgo dupum-dvrab pam baql wgnum.

¹⁴‍Hoo bulv Gerar diis-paap hoqg bopam tulungam nyob panum, hoggab At Swn bosnamv bulug aoho doonum. Bulv bopam tulu hoqgv naleqgo naareqnum, hoggab hoqho naareq sanamv naleqgo doonum.

¹⁵‍Hoo bulv tuun-mee doog bo tulug tombu tulungam papianum hoo sviyangam la svjin tulungam naleqgo naal wgnum. Ho bulv Jerusalemb wkurnum.