Read Nyishi 2 NWD 15 Bible Online

2 NWD 15 - Nyishi bible

2 NWD 15

¹Pwnbog Yalv Odedg ko tuup Ajariya aoho haanum,

²‍hoo mwv wnv Asanvn kvvrwqnum hoo mwam benum, “Asa la Judag nyi mwlwngv hoo Benjamin nyiingv, ngam tagabto: At Sw nulam dooba tayin hwdlo nulv mwwg lvgab dooba yin. Nulv mwam meegaq baloqkam, mwam nulv meepa tayin, hvbmabde nulv mwam haqpaq baloqkam, mwv nulam haqpaq tayin.

³‍Israelv mood oyum jaq gob jvqtw Pwnboam doog kuma, hoo nyub tomswrbo akkam dooma hoo pvvb doog maab doonum,

⁴‍hvbmabde hwdlo bulv hentwr-kaas yukam Israelwg Pwnbo At Swg dookub bulv tobkurnum, hoo mwam meegaqnum, ho mwam bulv meepanum.

⁵‍Hoq moodho wl-kel yvnbo nyiingv swrso doomanum, hoggab gvda hoq doonbo nyi mwlwngam koi jaqb hentwr-kaas vdwq-ak dvb nyinum.

⁶‍Bulv cwrsaq-bvraq twqb nyinum. Gvda akwn gvda asaqkam nyob pal mucu-mviyanum hoo bopam-bopamv nyob pamin sunum, hoggab Pwnbov bulam hoolu deedy hentwr-kaasam kaapa mvnum.

⁷‍Hvbmabde no, haakam to! Noqg alaqkv ator maab nyimabv, hoggab noqg bonam nyinam mam lvqc citayin.”

⁸‍Odedg ko tuup Ajariyag nyiqry benam gomcwr tulungam Asa tapa kalam twqda, mwv haakamnum hoo Iprayim diisw gvdangam mwwg naanam hoqgv niqtuq dooma bo murtiam Juda gvda mwlw hoqgv hoo Benjamin hoqgv hoo bopam tulu hoqgv mvpaqnum, hoo mwv At Swg dvrwq namlog haagaho At Swg yugwngam mvdarnum.

⁹‍Hoo mwv hoqho doobam bo Juda la Benjamin, hoo Iprayim, Manasse, hoo Simeon mwlwngam goqkumnum, hwdlo Pwnbo At Sw mwwg lvgab doobanam mam bulv kaapa yin, hoggab nyiv naleqgo Israelam haqpaqpel mwwg dookub haanum.

¹⁰‍Asag vnyw camleq nywng go la pool borum go pvvb bwwl doog yukho bulv Jerusalemho hookumnum.

¹¹‍Bulv nyob palayil naareqnam hoqgv bulv hoq aalho At Swn hvvbv 700 go hoo sviyangv 7,000 go pwr jinum.

¹²‍Hoo bulug hvvjw lvgab hoo bulug yvj lvgab, bulug ab tulug Pwnbo At Swn meegaq dvb bulv pvvb birwl haanum,

¹³‍hvbmabde hiyv lajaqkam Israelwg Pwnbo At Swn meegaq maan boam anyo jaqkam ho axa jaqkam, nyega jaqkam ho nyem jaqkam mengpaq dvb hvl benum.

¹⁴‍Bulv At Swn vcjaqb sogoql hoo goqr rol hoo vrrw tulu hoqgv tuuly miql dingrnum.

¹⁵‍Hoo Juda nyi mwlwngv dingrnam mam hemp-hvnyirnum, hoggab bulug hvvjw lvgab bulv dingrnum hoo bulug mwwbynam lvgab bulv mwam meegaqnum, hoo mwam bulv meepanum, hoo At Sw bulam hog mwlwngam swrso dvb jinum.

¹⁶‍Lvpw at Asa, mwwg ann Maakanvn jijaqkam vi-koorib swwn boam mvpaqnum hoggab mwn bulum-kac dvb nyidwb Aserag guss sam mvmnum. Asa mwnwg guss sam patabnum, ham vmwq gob mvnum, hoo ham Kidron kucw ho wm rampaqnum.

¹⁷‍Hvbmabde puutu aoho xumk nam tulungam Israel hoqgv naapaq maanum. Hvbsujaqkam, Asag hangv mwwg swwnam bumpw ho jvqtwb swwnum.

¹⁸‍Hoo mwv Pwnbog dvrwq namlo uraho mwwg abwg la mwwg atwg dvrwqbo lvqc tulungam, rupam, hoo hunam, hoo dupum-dvrab pam baqanum.

¹⁹‍Hoo Asag vnyw cammum leq nywng namgub pvvb bwwl doog yukho nyob akkam pakmanum.