Read Nyishi 2 NWD 16 Bible Online

2 NWD 16 - Nyishi bible

2 NWD 16

¹Asa vnyw cammum leq nywx go pvvb bwwl doog yukho, Israelwg lvpw at Baasa Judangam ceekonum hoo Ramangam mvnum, ho mwv nyi akkam Judag lvpw at Asag dookub haam kama ho lengm kamanum.

²‍Ho Asa rupam la hunam, At Swg namlo ho gumn doon boam la lvpw atwg namho gumn doon boam naanum hoo hoq tulu ham Damaskas ho doonbo Siriyag lvpw at, Ben-hadadnvn jilwql begamv,

³“Ngoqg ab la noqg ab pvvb mvnam hvb, ngunyig pengko lo no la ngo birnam pvvb mvnam ak doodwn. Kaato, noqgab ngo rupam hoo hunam kanam gviyin. Wn, noqg Israelwg lvpw at Baasa lvgab birnam pvvb ham pvvb juqbo to, ho mwv ngoqg soqgv wkur taikun.”

⁴‍Hoo Ben-hadad Lvpw at Asag benam mam tanum hoo mwwg sipai tulu gaml jinbo tulungam Israel bopam tulungam nyob pamnum hoo bulv Ijon, Dan, Abel-maim, hoo Naptali alo noosu bopam tulu mwlwngam naaknum.

⁵‍Hoo hwdlo Baasa hoq ham tapa yin, mwv Ramangam mvk maanum, hoo mwwg bonam nyikmanum.

⁶‍Ho Lvpw at Asa Juda bumpwngam naanum, hoo Baasag Rama ho mvn nan wlw tulungam la hoqg svvtaqkam bulv Rama hoqgv baqnum, hoo hoq tulu hoqgv mwv Geba la Mijpa gvdangam nwqtumnum.

⁷‍Hoq moodho nyiqry benbo Hanani Judag lvpw at Asag dookub haanum hoo mwam benum, “Hoggab no Siriyag lvpw atam svqgw do, hoo noqg Pwnbo At Swn no svqgw maado, Siriyag sipaiyv nam keleq paku.

⁸‍Itiopiya nyi tulungv la Libyan tulug sipaiyv, ceriot tulungv hoo svpur xarg bo nyi tulungv naleqgo maan mvi yv? Hvbsujaqkam no At Swn svqgw ko-gab, mwv bulam noqg alaq uraho jilwqnum.

⁹‍Hoggab At Swg nyiqm tuuriv swcw mwlwngam tuuyum doodwn, hiyvg hangv mwwg daiyab dvrwq tvl doon boam ator svkangam jidwb. No soq sam paca loodab nyipa ku, sija soqgv no lwxiam nyob patayin.”

¹⁰‍Ho Asa nyiqry benbo akkam hang lengnum hoo mwam tapia taql pvtwq lwqnum, hoggab mwam soq pagoq gab mwv vc loodab hang lengnum. Hoo hoq mood akin ho Asa nyiilu tuugin hentwr-kaas looda dvb mvnum.

¹¹‍Asag bon nyinam mam, nyirab hoqgv nyinya namgub, Judag gvla Israel Lvpw at tulu Kitap lo xeqp pakun.

¹²‍Asa cammum leq kiya vnyw go pvvb bwwl doog yukho, mwwg lvpia ho un nyil vcnum, hoo mwwg un vcv vc loodab cigwqnum. Mwwg vcv cigwq sujaqkam mwv At Swn meegaq maanum, hvbmabde doktor tulu galoq kviya svkangam meegaqnum.

¹³‍Hoo Asa mwwg campy leq nywkin go pvvb bwwl doog yuk vnyw ho, mwwg ab tulug sinam hvb siknum.

¹⁴‍Debidg bopam ho mwwgab atv mwv nyubu roqpnam ho bulv mwam liinum. Bulv mwwg svma aoho hoolu deedy sungam bo kuty mvnam mam nyiilwqnum, hoo bulv mwwg yuunam eminho koi jaqb wm parnum.