Read Nyishi 2 NWD 17 Bible Online

2 NWD 17 - Nyishi bible

2 NWD 17

¹Mwwg kwlib mwwg ko tuupv Jehosapat pvvb bwwl doognum hoo mwv atv atam Israelam ceeko dvb ator torabnum.

²‍Mwv sipai acam mam Judag gurum nwqtumnam bopam mwlw ho doomnum hoo Juda gvdangam la, mwwg ab Asag naareqnum Iprayim bopam tulungam doqyum mvnum.

³‍At Sw Jehosapat lvgab doonum, hoggab mwv mwwg ab Debidg lamtangam wnum. Mwv Baal pwnboam xumanum,

⁴‍hvbmabde mwwg abwg Pwnboam xumnum hoo mwwg gaml tulungam tvjwnum, hoo Israelwg nyinam hvb nyimanum.

⁵‍Hoqgab At Sw mwwg alaqho lvpw-hatiam mvko jinum. Hoo Judag nyi mwlwngv Jehosapatnvn gvda nyoogangam baqa jinum, hoo mwv koi jaqb nyet gvi hoo xinam gob nyinum.

⁶‍Mwwg hangv At Swg lamta tulungam haakam jaqnum. Hoo hoq aoho, mwv puutu aog xumkam la Aserim murtiam Juda hoqgv naapaqnum.

⁷‍Mwwg vnyw nywum go pvvb bwwl doog yukho mwv mwwg saab tulungam Ben-hail, Obadiya, Jakariya, Netanel, hoo Mikaiyanvn Judag bopam tuluho tomswr mvdwb kanamnum;

⁸‍hoo bulug lvgab Lebi nyi tulungam Semaiya, Netaniya, Jebadiya, Asael, Semiramot, Jehonatan, Adonija, Tobi-ja, hoo Tobadonija; hoo soq Lebi nyi tulu lvgab, nyub Elisama nvla Jehoramnvn kanamnum.

⁹‍Hoo At Swg Pvvb Kitapam bulug lvgab baqtwl, bulv Judaho tomswrnum. Bulv Judag bopam mwlw ho wnum hoo nyiilug pengko ho tomswrnum.

¹⁰‍Hoo At Swnvn bosnamv Judag diis-paap mwlw gvdaho haanum, hoo bulv Jehosapatnvn ceekol nyob pamanum.

¹¹‍Palistan nyi tuugin Jehosapatnvn gvda nyooga gab rupam aky baqa jinum, hoo Arab nyi tulungv mwam yaap tvmwrv 7,700 go hoo sibinv 7,700 go lvqc gob boa jinum.

¹²‍Hoo Jehosapat koi-koi yaiya go swwrabl swwdul doonum. Mwv Judaho gurum nwqtumnam mam la dvg boqkumko bopam tulungam mvnum,

¹³‍hoo Juda bopam tuluho mwv koi jaqb dis silin ko doognum. Jerusalemho mwv ator jaqb haakaml nyob panbo nyiingam doognum.

¹⁴‍Ab dvpar-dvpar hoqgv bulam lvkin gob goqkumnum: Juda hoqgv gaml jinbov lwwyw go: Adna gaml jinbo lvgab atorl haakam bo sipaiyv 300,000 go;

¹⁵‍mwam dvqsin bo gaml jinbo Jehohanan, mwwg lvgab 280,000 go doonum;

¹⁶‍mwwg dvqsinv Jikri gv ko tuup Amasiya, mwv atv atam At Swg bonam nyidwb haanum, mwwg lvgab atorl haakam bo nyiingv 200,000 go doonum.

¹⁷‍Benjamin hoqgv Eliyada, mwv atorl haakam bo nyi akv, mwwg lvgab illy-uppuq hoo nwwxo-svtam bwwn bov 200,000 go;

¹⁸‍hoo mwwg dvqsinv Jehojabad, mwwg lvgab nyob pamin gvdy bov 180,000 go doonum.

¹⁹‍Soq tulu si lvpw atwg bonam nyil doonum, ho soq nyi tulug lvvg ho Judag gvdag gurum nwqtumnam bopam mwlw ho lvpw atv bon nyin boam doomnum.