Read Nyishi 2 NWD 18 Bible Online

2 NWD 18 - Nyishi bible

2 NWD 18

¹Hoq moodho Jehosapat koi jaqb nyet bvla xinam gob nyiknum, hoo mwv Ahab lvgab nyem ak naadwb riinam-maanum.

²‍Vnyw mee kokw so mwv Ahab dook Samariya ho innum. Hoo Ahab naleqgo sviyangam la hvvbam mwwg gab la mwwg lvgab wba bo nyiilu gab patab jinum, hoo mwam Ramot-gilead ho nyob pamin gvla bvk hvl benyioqnum.

³‍Israelwg lvpw at Ahab Jehosapatnvn benum, “No ngam Ramot-gilead ho nyob pamin gvb yv?” Mwv mwam birwqnum, “Ngo noq hvb nyidwn, ngoqg nyiilungv noqg nyiilu hvb nyidwn. Ngulv nam nyob pamin gvtayin.”

⁴‍Hoo Jehosapat Israelwg lvpw atam benum, “Otuqcob At Swg gomcwram taka coot ju.”

⁵‍Ho Israelwg lvpw atv nyiqry benbo tulungam lwwpy go nyiingv lvkin gob goqkumnum, hoo bulam benum, “Ngulv Ramot-gileadam nyob paiyin dvi yv, ma ngo apaq hind yv?” Hoo bulv benum, “Wn, hoggab Pwnbov ham lvpw atwg alaqho jilwq tayin.”

⁶‍Hvbmabde Jehosapat benum, “Soq so At Swg nyiqry benbo asaqkv dooma dvn yv hiyvg lvgab ngulv taka tayin?”

⁷‍Hoo Israelwg lvpw at Jehosapatnvn benum, “Nyi ak doodwn, Imlag ko tuup Mikaiya, hiyv ngul gab At Swn taka jidwb nyila dvn, hvbmabde ngo mwam oyum dvn, hoggab mwv nywywngam ngoqgab alboam nyiqry bema dvn, hvbmabde alman boam bitwq dvn.” Hoo Jehosapat benum, “Soq sib lvpw atv bema bv.”

⁸‍Ho Israelwg lvpw atv saab ak goqanum hoo benum, “Imlag ko tuup Mikaiyanvn nyebia jaqb soqb boa ta.”

⁹‍Hoq moodho Israelwg lvpw atv la Judag lvpw at Jehosapat bulug xinam vjam kootwl Samariyag haagag toggoq deela ho bulv pvlw tuluho doodunum, hoo bulug agaho nyiqry benbo tulungv nyiqry bidunum.

¹⁰‍Hoo Kenaanag ko tuup Jedekiya mwv atv yoqdwr hoqgv vrrw ata go mvnum hoo benum, “Soq sib At Sw bedo, ‘Soq tulu soqgv nulv Siriya nyi tulungam bulam twryum maady deedib ruqtayin.’”

¹¹‍Hoo nyiqry benbo tuluhv nyiqry benum, “Ramot-gilead ho wn hoo mviya ta; At Sw lvpw atwg alaqho soq sam jilwq tayin.”

¹²‍Hoo pui baqn bov Mikaiyanvn goqa taab wnv hoo mwam benum, “Kaato, lvpw atgab nyiqry benbo tulungv lvkin gob mwv altai hvl bedo. Hoqgab noqg gomcwram kam bulug ak gon benam hvb bijto, hoo mwwsw dvb agam goojto.”

¹³‍Hvbmabde Mikaiya benum, “At Sw swwl doody deedib, hoggv ngoqg Pwnbov bedwn, ham ngo ham betayin.”

¹⁴‍Hoo hwdlo mwv lvpw atwg dookho hvvc yukho, lvpw atv mwam benum, “Mikaiya, ngulv Ramot-gileadam nyob paiyin dvi yv, ma ngulv apaq hind yv?” Hoo mwv birwqnum, “Wn hoo mviya tayin; bulam noqg alaqho jilwq tayin.”

¹⁵‍Hvbmabde lvpw atv mwam benum, “Hog hwdgo ngo nam dingl benum hwdlo no agam gooikam asaq goomabv hvbmabde At Swg emin ho jvqtwngam gootam to?”

¹⁶‍Hoo mwv benum, “Sviya rvky bo dooma yin sviyangv cwrsaq-twqb nyinam hvb, Israelv cwrsaq-twqb puutu aoho doodwb ngo kaapanum. Hoo At Sw benum, ‘Soq tulu si nyiit at dooma; nyiicwr-cwrxiam mwwg atwg nammwb swrsob wkur mvto.’”

¹⁷‍Hoo Israelwg lvpw atv Jehosapatnvn benum, “Ngo nam betam maan mviyv, mwv ngoqgab alboam nyiqry bema dvn, alman boam twq?”

¹⁸‍Hoo Mikaiya benum, “Hoqgab At Swg gomcwram tato: At Swn mwwg pvlw ho doodu dvb, hoo mwwg laqc-lvqbwqho ao gumtwngv mwwg bviywrho doqdu dvb, ngo kaapanum.

¹⁹‍hoo At Sw benum, “Hiyv Israel lvpw at Ahabnvn Ramot-gilead ho caal sim dvb, hiyv mwam benyioql bela tayin?’ Hoo akwn asaqb hoo akwn asaqb benum.

²⁰‍Ho yal ak haanum hoo At Swg agaho daqtwl hoo begamv, ‘Ngo mwam benyioq taden.’ Hoo At Sw mwam benum, ‘Hognvk hoqgv nyin tayin?’

²¹‍Hoo mwv benum, ‘Ngo wtayin, hoo mwwg nyiqry benbo tulungam xaalyo yal hoqgv agam goom dvb mvtayin.’ Hoo mwv benum, ‘No mwam benyioq ta, hoo no niqtuq lengtayin; wn hoo nyita.’

²²‍Hoqgab sija kaato, At Sw nyiqry benbo tulungam xaalyo bo yalam agam goom dvb jilwq paku; At Sw noqgab soq ciqcaq-bviyaq sam haam dvb bibwq paku.”

²³‍Ho Kenaanag ko tuup Jedekiya ogumb hvvnwqnv hoo Mikaiyanvn nyuqm ho pitaql hoo benum, “Hoggub At Swg Yalv ngoqg hoqgv wlayil nam agam goonam?”

²⁴‍Hoo Mikaiya benum, “Kaato, hwdlo no atv noqg urag pwqlwb haal kvsil dooikam, hoq aalam no kaapa tayin.”

²⁵‍Hoo Israelwg lvpw atv benum, “Mikaiyanvn nootu to, hoo mwam bopamg nyiit rad Amon, lvpw atwg ko tuup Joas gv dookub bookur gvno,

²⁶‍hoo bedo, ‘Soq sib lvpw atv bedo, “Soq nyi sam pvtwqho tumlwqto hoo hwdlo ngo swrsob hookur maady deedib, mwam dvs-twwsam anyo go jil dvl doogto.’”

²⁷‍Hoo Mikaiya benum, “No swrsob hookur kunam mam, At Sw ngam agam gooma.” Hoo mwv benum, “Nul nyiilu mwlwngv tato!”

²⁸‍Hoqgab Israelwg lvpw atv la Judag lvpw at Jehosapat Ramot-gilead ho caanum.

²⁹‍Hoo Israelwg lvpw atv Jehosapatnvn benum, “Ngo atv oksub gwwkub tayin hoo nyob pak urab wtayin, hvbmabde noqg kamtam no kooto.” Hoo Israelwg lvpw atv oksub gwwkub layil hoo nyob pak urab wnum.

³⁰‍Hoq moodho Siriyag lvpw atv mwwg ceriot tulug kepten tulungam gaml jinum, “Anyo jaqkam ho koi jaqkam nyob pato, hvbmabde Israelwg lvpw at aro lvgab nyobam pato.”

³¹‍Hoo hwdlo ceriot tulug kepten tuluhv Jehosapatnvn kaapayin, bulv benum, “Soq si jvqtw jaqb Israelwg lvpw at go mwwnum.” Ho bulv mwwg daiyab tobkurnv mwam ceekol nyob patanum. Hoo Jehosapat sogoq goqlinum, hoo At Sw mwam svkanum; Pwnbov bulam mwwg hoqgv wleq mvknum.

³²‍Hoo hwdlo ceriot tulug kepten tuluhv hoqhv Israelwg lvpw atv kuma hvl kaapayin, bulv mwam ruqngo peel wkurnum.

³³‍Hvbmabde nyi ak mwwg uppuqkam absam-abyam banv hoo Israelwg lvpw atwg soruq gvla tamaq pengkob mwam vblwqnum. Hoqgab mwwg ceriot ham wgbo akam mwv benum, “Tobkur tuku hoo ngam nyob pak soqgv baqlin tuku, hoggab ngo wn gvpa ku.”

³⁴‍Hoo hoq aalho nyobam podul doonum, hoo Siriya nyi tulungam tuurwq tvl lvpw atv mwwg ceriot ho yiigw tvl ariyum namgub doonum. Doonyiv haaxy kalam mwv sinum.