Read Nyishi 2 NWD 19 Bible Online

2 NWD 19 - Nyishi bible

2 NWD 19

¹Judag lvpw at Jehosapat mwwg nam Jerusalemb swrsob wkur kunum.

²‍Hvbmabde nyiqry benbo Hananig ko tuup Jehu mwam wrwqtab wnum hoo lvpw at Jehosapatnvn benum, “No nyic-nyia nyin boam svka dvb hoo At Swn oyum boam aby dvn yv? Hoggab soq sam nyigam gab At Swg hang lingtwrnamv nam ceeko dvb lengm paku.

³‍Hvbsujaqkam, noqg uraho meeg albov kaapanum, hoggab no gvda soqg Asera murty tulungam twryumnum, hoo noqg hangv Pwnboam meegaqnum.”

⁴‍Jehosapat Jerusalemho doonum. Hoo mwv lokta nyiilu pengko ho Beerseba hoqgv diisw gvda Iprayim namgub wnum, hoo bulam bulug ab tulug Pwnbo At Swg dookub bookur kunum.

⁵‍Mwv Judag gurum nwqtumnam bopam mwlw ho hoo bopam-bopam ho nyegam tulungam xuqlinl apnum,

⁶‍hoo nyegam tulungam benum, “Nulug bonam mwwgab to, hoggab nulv nyi gab pw-hwwram hvbmabde At Sw gab pw-hwwtayin. Mwv nulug pw-hwwk ho dooba dvn.

⁷‍Hoqgab nulug aoho At Swn bosnam mam doom to. Hoggv nulv nyita dvn ham hengab to, hoggab ngulug Pwnbo At Sw ho jvqtw maanamv, ho mwwswnamv, ho kam naanamv dooma dvn.”

⁸‍Hoq aoho At Sw gab pw-hwwm dvb hoo yolu-swcinam pvvb mvm dvb, Jehosapat Jerusalemho Lebi nyi tulu gola nyub tulungam hoo Israelwg imiq dvpar hoqgv peelo boam xuql apnum. Bulug dookv Jerusalemho doonum.

⁹‍Hoo mwv bulam nyimdvb tomswrnum: “Soq sib nulv At Swn bos gvdwl, dengky jaqb mwwjw gvdwl, hoo nulv hvvcwr baql nulug bonam nyitayin:

¹⁰‍hwdlo lajaqkam nulug vbw-bor tulungv bulug bopam tuluho doon bov sony mengtanam pagoqkam, pvvb ho gaml pagoqkam, nyicw-mwcw pagoqkam hoo pvvb bvrwq gab haai nyiloqkam, ho nulv bulam beo-belam tayin, ho At Swg agaho bulam nyimur gab kwly naam mvmabv hoo hang lingtwrnamv nulam la nulug vbw-bor tulug aoho haam mvmabv. Soq sib nulv nyib nyiloqkam, hoo nyimur gab nulam pw-hwwram.

¹¹‍Hoo kaato, At Swg bvrwq gab Amariya nyub but gob nulug aoho doodwn; hoo lvpw atwg bvrwq gab, Ismaiyelg ko tuup Jebadiya Judag nombug nyiit rad gob doodwn, hoo Lebi nyi tulungv nulam saab gob bon nyij tayin. Haakam jaqb nyito, hoo At Sw lootw bo lvgab dooba nvka!”